حفله نوع الجنين 🎉👶🎈🎂
أنا (راجل عندي 23 سنة) وبحب خَبز الحلويات. وبصراحة أنا شاطر جدًا في الكيك.
أختي حامل وطلبت مني أعمل كيكة” لحفلة إعلان نوع الجنين”. تمام، مفيش مشكلة. قلتلها تبعتلي التفاصيل علشان أجهز الحشو اللي جوه الكيكة – اللي هو الحشو التقليدي البينك أو اللبني.
قالتلي: “لأ، أنا كمان عايزة أتفاجئ!! اعمل الكيكة عادي من بره، ومن جوه خليها محايدة، ونعرف كلنا نوع الجنين مع بعض في الحفلة.”
وقتها كنت واقف كده وقلت… إيه؟ يعني أعمل كيكة إعلان نوع الجنين من غير ما أكون عارف أصلاً النوع ولد ولا بنت؟! قلتلها ده أزاي يعني؟!
قالتلي إن في حد هيبعتلي التفاصيل على الإيميل بعدين.
المشكلة أن الحد ده. عمره ما بعت حاجة.
ميعاد الحفلة قرب، ولسه محدش قالي نوع الجنين.
قلت خلاص، هي حرة بقه. عملت الكيكة رمادي من جوه… ورمادي من بره. شكلها كله كأنها قالب إسمنت بالظبط.
الطعم كان ممتاز طبعا، بس الشكل؟ بصراحة كئيب جدًا.
يوم الحفلة جه، وقطعوا الكيكة، وأختي وشها اتقلب.
جوزها كان مستغرب، والناس ابتدت يتكلموا. أختي اخدتني على جنب وقالتلي: “ليه عملتها رمادي؟ ده انت مستفز قوي.”
بكل هدوء فَكَّرتها إن مفيش حد قالي نوع الجنين. أنا هشتغل علي أساس ايه يعني. هو أنا ساحر علشان أخمن وأعرف بينك ولا لبني!
دلوقتي ماما بتقولي إني أحرجتها قدّام العيلة، وإنّي “كان لازم أحاول أكتر.”
أحاول أكتر في إيه بالظبط؟ أعرف نوع الجنين من الهوا كده؟!
🔔 تعديل:
أنا على فكرة قبلها بكام يوم سألت أختي أعملها لون ايه؟
ردّت وقالتلي “آه، في حد هيبلغك باللون.” ومفيش حد قالي حاجة.
وأنا محبّتش أزنّ عليها.
فـ… هل أنا غلطان إني عملت الكيكة لونها رمادي؟
______________________
🔔 قصة جديدة:
أنا حامل في ولد. أنا وجوزي مكنش فارق معانا قوي ولد ولا بنت المهم أن البيبي يكون بخير، علشان كده ماعملناش ضجة كبيرة لما عرفنا. قلنا بس لآهالينا وخلاص.
مرات بابا اللي “اتجوزها من ٣ سنين”. كانت دايمًا بتسألني هنعمل حفلة إعلان نوع الجنين امتي. أنا كنت واضحة جدا معاها. وقولتلها إني مش عايزة أعمل حفلة.
واضح انها اتضايقت. بس أنا ما بحبش الحفلات دي. والناس كلها عارفة ده هو مش سر يعني.
بعدها بكام يوم، مرات بابا عزمتني عندها على شاي في بيت بابا (بس بابا ماكنش موجود).
لما وصلت، فجأة خرج حوالي ١٢ شخص كانوا مستخبيين علشان يفاجئوني. وكان في زينة كلها بينك وأزرق، فالموضوع كان واضح جدًا هو إيه.
وأنا واقفة مصدومة، مرات بابا قالتلي بحماس إنهم عاملينلي حفلة مفاجأة علشان نعرف نوع الجنين. وقالتلي انها قررت تطلب كيكة، وتزيّن الشقة، وتعزم ناس كتير.
الناس اللي كانوا موجودين كانوا والدتها (اللي بيني وبينها مشاكل ومش بنرتاح لبعض)، شوية من أصحابها، حماتي، وأربعة من أصحابي. وبعد كده عرفت إن حماتي وأصحابي كانوا فاكرين إني غيرت رأيي وقررت أعمل حفلة. “مرات بابا كذبت عليهم”.
أنا كنت لسه واقفة عند الباب، بصيت عليهم كلهم وقلت: “ولد. خلاص..ممكن بقه تروّحوا دلوقتي.” ومشيت من غير ما أبص ورايا.
بعدها بساعات، بابا كان في قمة الغضب، وقالي عيب جدا اللي انت عملتيه ده. وقالي إن مراته عملت مجهود كبير. وصرفت وفلوس علشان تنظيم الحفلة، وكان لازم أقدّر ده وأحترمه. ومراته ما بطلتش عياط من ساعتها.
الموضوع كان من أسبوع تقريبًا، ولسه هما الاتنين زعلانين.
أنا كنت واضحة من الأول، بس مُصرّين إني غلطانة وكان ممكن أستحمل ساعة واحدة بس، أو حتى أقطع الكيكة على الأقل.
تفتكروا أنا عندي حق ولا أنا فعلا غلطانة؟
_________________________
القصة مترجمة من ريديت. أصحاب القصة أجانب.
#ريديت
#حواديت_الاجانب
