“أميرة” واقفة في المطبخ والبنات بيلعبوا في الأوضة، فجأه سمعت صوت صرخة هزت البيت.. أميرة جرت مفزوعة على الأوضة، لقت بنتها الصغيرة واقعة في الأرض وبتعيط بحرقة، والكبيرة واقفة بعيد، ملامحها متلخبطة ما بين غضب مكتوم وخوف من اللي هيحصل.
أميرة بصت للكبيرة بوجع وقالتلها: ليه كدة يا بنتي؟ دي أختك الصغيرة، كل شوية تضربيها .حرام عليكي….. ياربي أنا تعبت!
البنت فضلت تدافع عن نفسها وتقول ان اختها تستاهل لأنها أخدت لعبتها.
أميرة في اللحظة دي حست إنها بتغرق في دوامة خناق مش بتخلص، وسألت نفسها بمرارة: أنا قصرت في إيه؟ هل لازم أمد إيدي عليها عشان تتربى وتبطل؟ ولا القسوة هتخليها تكره أختها وتكرهني؟
السؤال اللي بتكرر من الأمهات كتير “بنتي الكبيرة بتضرب أختها الصغيرة كل شوية.. أعمل إيه؟”
أول حاجة:
احضني البنت الصغيرة، طيبي بخاطرها، دلعيها، وممكن تعمليلها مشروبها المفضل أو أي حاجة بتحبها. خليها تحس إنها آمنة ومحمية.
وبالنسبة للكبيرة.. بلاش تعاتبيها أبدًا، وبلاش تعامليها بأي قسوة. اهدي تمامًا. لأنك لو ضربتي الكبيرة أو زعقتي لها، هتزرعي بين الاتنين كره ومنافسة وقسوة ، واحنا أكيد مش عايزين ده.
يعني في اللحظه دي خلي كل تركيزك مع البنت اللي اتضربت.. وماتديش أي رد فعل نهائي للبنت التانية ” هو ده أحسن حل”.
لو بنتك الكبيرة استغربت إنك مأدبتيهاش وسألتك: ماما، إنتي ليه مش بتزعقيلي؟
قوليلها بهدوء: علشان أنتِ بنتي وأنا بحبك جدًا.
الكبيرة غالبًا هتتكسف وهتحس إن تصرفها كان غلط.
لازم تبقي عارفة كويس ان الضرب والعقاب القاسي مش بيصنع طفل متزن أبدًا. والطفل اللي بيتعرض للإهانة للأسف مش بيكون عنده كرامه.
وعايزة أقولكم حاجة مهمة:
الطفل بفطرته مش عنيف. لو لاحظتِ عنف زيادة عند بنتك أو ابنك، يبقى فيه سبب قوي وراه، غالبًا احتياج عاطفي أو نفسي مش مشبع.
كل سلوك سلبي وراه سبب. لما نعرف السبب، السلوك بيختفي بسهولة إن شاء الله.
المقالات الجاية إن شاء الله هتكلم معاكم بالتفصيل عن:
أسباب السلوك السلبي عند الأطفال
وازاي نعالجه بطريقة سهلة وبدون عنف أو صراخ.
#بيتنا_أحلي