نوع الجنين 👶🤰❓✨
أنا (راجل عندي 33 سنة) ومراتي (عندها 27 سنة) ومستنيين أول طفل لينا.
أنا طفولتي كانت صعبة قوي. وعلاقتي بأبويا مكنتش حلوة خالص وكان نفسي طول عمري يكون عندي قدوة راجل ويكون بالنسبه لي مثلي الأعلي، وكنت دايمًا بتخيل إني أعوض حرماني ده مع ابني.
مراتي عارفة كويس قد إيه الموضوع ده مهم بالنسبه لي قد إيه أنا نفسي في ولد.
علي فكرة أنا العائل الوحيد للأسرة ونفسي أوفر لابني حياه كريمة، علشان كده مكنتش بروح مع مراتي عند الدكتور في شهور الحمل الأولي. لأن وقتها كان عندي رحلة شغل مهمة جدًا. الرحلة كانت طويلة ومرهقه بس مش مشكلة أهم حاجه العائد المادي الكبير علشان نقدر نعيش مرتاحين.
في اليوم اللي مراتي المفروض هتعرف فيه نوع الجنين أخدت معاها مامتها. ولما رجعت، قالتلي وهي فرحانة قوي إننا هنخلف ولد.
طبعا كنت طاير من الفرحة وبدأت أجهز أوضة أطفال لونها لبني، واشترينا حاجات كلها للأولاد، وحتى اخترنا أنا ومراتي نسمّيه على اسم جدي الله يرحمه.
بس بعدها بفترة وأنا بدردش عادي كده مع حماتي. قالت كلمة بالصدفة من “غير ما تقصد”، والكلمة دي معناها إننا هنخلف بنت مش ولد!!
سألت مراتي. واعترفت إنها كانت عارفة من الأول أن البيبي بنت. بس خبت عليا!
وحجتها.. انها عملت كده علشان مش عايزاني أزعل.
أنا اتدمرت حرفيًا، حسيت بالخيانه وكل جروح الطفولة ظهرت تاني. ومن كتر وجعي فضيت أوضة البيبي خالص، وبصراحة كمان عملت حاجة غبية ندمان عليها دلوقتي، للأسف أنا قلت لحماتي إني مش عايزها تيجي أي مناسبة عائلية تاني لأنها شريكة مراتي في الكدب.
أنا بحب مراتي وندمان على رد فعلي، بس حاسس إني تايه.
🔔 تحديث:
قعدت مع مراتي واتكلمنا بهدوء، قلتلها قد إيه أنا اتجرحت من الكدب وإن الموضوع بالنسبالي مش بسيط خالص.
هي اعتذرت واعترفت إنها عملت غلطة كبيرة، وقالتلي إنها خافت قوي إني ما اتقبلش بنتنا. كمان طلبت مني إني أعتذر لمامتها عشان هي شايفة إن حماتي مالهاش ذنب. وبالفعل اتصلت بحماتي واعتذرت لها عن الكلام اللي قولته. وحماتي قبلت اعتذاري..وان شاء الله ربنا هيرزقنا بأجمل بنوته.
_____________________
🔔 قصة جديدة:
أنا حامل في أول بيبي ليا ومتحمسة جدًا أكون أم.
مشكلتي إن جوزي دايما بيتهرب من ميعاد كشف الدكتور، وكل شوية يقولي أعذار ملهاش لازمة.
يعني عادي جدًا بالنسبه له يفوت ميعاد الدكتور عشان ماتش كورة أو علشان يروح يقعد مع أصحابه. ولما بزعل وبعاتبه بيرد بمنتهي الغلاسه ويقولي: “هو أنا اللي شايل البيبي في بطني، ليه لازم أروح معاكي للدكتور يعني؟”.
الأسبوع اللي فات بقه جبت اخري. كان المفروض ييجي معايا عشان نعرف نوع البيبي، بس في آخر لحظة رجع في كلامه وقرر ما يجيش عشان صاحبه عزمه على أكلة سمك وبطاطس.
أنا اتعصبت جدًا بس ما عملتش مشكلة معاه. وماما لما عرفت قررت انها تيجي معايا.
بعد ما خلصت ميعاد الدكتور جوزي بعتلي رسالة بيسألني (ولد ولا بنت؟) بس أنا رفضت أقوله.
فضل يتصل بيا مكالمات كتير قوي ورا بعض. بس أنا فضلت أكنسل عليه.
رجع البيت متعصب وفضل يزعق وعايز يعرف نوع الجنين.
صممت أخبي عليه وقلتله: مش إنت رفضت تيجي معايا.. خلاص أنا مش هعرفك نوع البيبي لحد ما يتولد، وعرفته إني مش هارجع في كلامي ابدا.
قالي إني انانية ودماغي صغيرة عشان بعاقبه. وإن ده ابنه وليه حق يعرف. وبعدها قالي إني بعمل دراما ع الفاضي عشان أنا مكنتش لوحدي وماما كانت معايا.
ماهتمتش بكلامة وبرضه صممت أخبي عليه.
ومن ساعتها وهو مقموص وكل شوية يحاول يستفزني، وكمان حكى لأهله وكلهم دلوقتي ضاغطين عليا وبيقولولي بطلي لعب العيال ده.
بس أنا لسه بعاقبه.
تفتكروا عندي حق ولا أنا غلطانة؟
🔔 تحديث:
جوزي حاول يتواصل مع الدكتور بتاعي عشان يعرف نوع البيبي. بس الموضوع ما نفعش عشان مامته هي اللي اتصلت ورفضوا يبلغوها.
هي خلاص بقه كبرت في دماغي وأنا اتواصلت مع الدكتور وطلبت منه محدش يقول النوع.. وخلاص لو أطبقت السما علي الارض مش هقوله يعني مش هقوله…
________________
مقتبسة من قصص ريديت.. أصحاب القصة أجانب.
#قصص
#قصص المتزوجين
