أنا ست عندي 45 سنة وعايشة جنب اتنين من أقرب اصحابي.
من 10 سنين، اشترينا أراضي جنب بعض عن قصد لأننا كنا زهقانين من الوحدة ومن إننا دايمًا عَزَبات (بيوتنا متوزعة على شكل مثلث).
من وقتها شِلنا الأسوار اللي بين الأراضي، وبقى عندنا 3 بيوت متوزعين حوالين جنينة كبيرة في النص. الجنينة فيها مكان لزراعة الخضار، وعندنا كمان فراخ، و كلبين وقطة.
أنا بصراحة بعتبر اصحابي دول عيلتي، وفعلاً السنين اللي فاتت كانت جميلة. عندي بيتي الخاص وفي نفس الوقت في ناس بشاركهم أهتماماتي، بنشتري حاجات بالجملة، نسافر، ونستمتع بوقتنا.
كمان بنساعد بعض كتير، زي لو أنا شغالة من البيت ممكن أستلم الطرود بتاعتهم، أو استقبل عامل جاي يصلح حاجة عندهم، لو أنا تعبانة حد فيهم يوصلني للدكتور ويجيب لي أكل، وأنا كمان بعمل كده معاهم.
وفي نفس الوقت عندي مساحتي الخاصة في بيتي.
عارفين الميمز اللي بتتكلم عن فكرة إنك محتاج واحد عنده حساب نتفليكس، وواحد عنده هولو، وواحد عنده أمازون برايم، دي فعليًا حياتنا.
بس صاحبتي المتجوزة زعلانة مني الايام دي علشان لما بتيجي تعمل خطط معايا أو تطلب مني خدمة، دايمًا بقول لها: “خليني أشوف الأول إذا كنت هعمل حاجة مع أليس وكلير” أو “لازم أتأكد من أليس وكلير، أعتقد كان عندنا خطط في اليوم ده”.
بصراحة أنا مش شايفة أي مشكلة في كده، هي كمان دايمًا بتقول لي: “خليني أشوف مع بوب” (جوزها).
لو هي طبيعي إنها تحط جوزها قبل اصحابها، إيه المشكلة لما أنا كمان أحط اصحابي اللي عايشة معاهم وبشارك معاهم معظم حياتي في الأول؟
عندي اصحاب متجوزين تانيين اشتكوا من نفس الموضوع ده برضه، رغم أني عمري ما زعلت منهم لما كانوا بيضطروا يحطوا أزواجهم في الأول.
مثال تاني، لو واحدة فيهم لغت ميعادها معانا علشان جوزها تعبان، ده شيء منطقي جدًا. بس لسبب ما، مش منطقي بالنسبة لهم إني ألغي ميعادي معاهم لو أليس تعبانة وكلير مش قادرة توديها الدكتور.
آخر مشكلة حصلت كانت بخصوص خطط السفر. أنا وأقرب اصحابي بنخطط نسافر المغرب السنة دي لمدة أسبوعين.
أنا و صديقتي المتجوزة كنا مخططين نروح المغرب من سنين (بالضبط من 20 سنة)، لكن لما قابلت جوزها الحالي ما رحناش أبدًا، بس أنا دايمًا كان نفسي أروح. ما كنتش فاكرة إنها لسه عايزة تروح، لكن واضح إنها لسه مهتمة.
بصراحة، يمكن ده يبان وحش، بس أنا مش عايزة أعزمها، وأليس وكلير كمان مش عايزين. هما مش قريبين منها قوي، وبصراحة إحنا كنا عايزين نسافر نرتاح ونستجم ونتكلم عن حاجات جديدة عايزين نعملها في البيت.
وكمان، هي بتسافر طول الوقت مع جوزها وما بتعزمنيش، بس دلوقتي بتقول إني أنانية عشان رايحة “وجهة أحلامنا” مع أليس وكلير وما عزمتهاش، وكمان إني دايمًا بحط أليس وكلير قبلها.
هل أنا فعلا غلطانة؟
(القصة حقيقية مترجمة من ريديت)
#قصص
قصص واقعية
