الفاصوليا بتاعتي!!!
نرجع تاني للمشاكل التافهه #حواديت_الاجانب_التافهه
**(انا متأكده ان اي حد هيقرأ القصه دي هيحس انها غريبه ومش منطقيه بس لما تعرف توقيت نزولها هتفهم هما بيعملوا كده ليه)
صاحب الرساله بيقول:
مع كل الي بيحصل دلوقتي قررنا نخزن الاكل والحاجات الضروريه للبيت
وطبعا كمان الاكل المعلب
مراتي طلبت مني اشتري 30 علبه فاصوليا و 15 علبه حمص
اعتقد ان دي كميه كبيره
بس مش مشكله احنا اكيد هنستخدمها كلها
و هتكفينا لفتره طويله
امبارح كنت بفتح دولاب المطبخ ادور علي الفاصوليا المعلبه
لاني قررت اعملها مع الفلفل الحار
استغربت ان مفيش ولا علبه موجوده
ايه ده هي راحت فين؟؟؟
سألت مراتي عليها
قالتلي انها دفنت كل علب الفاصوليا في الغابه
في البدايه كنت فاكرها بتهزر
لكن اتضح انها بتتكلم جد
وأكدتلي انها فعلا عملت كده!!!
قولتلها ممكن تشرحيلي السبب؟
قالتي انها خايفه الامور تسوء اكثر
او ممكن نتعرض لاقدر الله للسرقه
وخايفه علي الفاصوليا من الحراميه!!!
قولتلها الي بتقوليه دي سخيف جدا ومش منطقي
غضبت مني وقالتي انها “بتحمي فاصوليتنا”
وقالتلي ان الفاصوليا مدفونه بشكل آمن في الغابه وراء مجمع الشقق الي احنا عايشيين فيه
وان احنا لو احتاجنا فاصوليا في يوم من الايام
نقدر نروح “المخبأ” ونحفر وناخد علبه او اتنين
لكن هي بتفضل نحتفظ بيهم دلوقتي للطواريء
قولتلها طيب واحنا ليه ندفن فاصوليا بس
ليه مش بنخبي كمان الحاجات الغاليه والمهمه الي عندنا؟؟؟
قالتلي ان الاكل المعلب هيكون اغلي قيمه من اي حاجه تانيه بعدين
وبما اننا بنقدر نطلب اكل طازه كل اسبوع اونلاين من السوبر ماركت
يبقي من المنطقي اننا نفضل نحزن فاصوليا تاني
وهي ناويه تكمل تحزين علب اكثر في الغابه كل اسبوع!!!
طبعا الموضوع ده كان جنوني بالنسبه لي
وكنت فعلا مضايق وقولتلها من فضلك قوليلي دفنتيها فين؟
رفضت تقولي علي المكان
وقالتلي انها خايفه تقولي مكانها علشان مروحش احفر في الغابه واطلعهم
قولتلها انا اكيد هعمل كده
قالتلي “مستحيل اعرض الفاصوليا للخطر ابدا” 😂
قولتلها انتي اتجننتي خلاص
زعلت مني ومخصماني من امبارح
انا شايف الموضوع ده سخيف جدا
وعايز بجد ادور علي العلب واطلعها
تفتكروا لازم اقنعها تروح للعلاج؟
هل من الطبيعي الي هي عملته ده؟؟؟
🌹#تحديث بعد يومين
قررت اني مش هستسلم ولازم اعرف مكان الفاصوليا
انا مش من النوع العنيد
بس مش عارف ليه الموضوع ده كبر في دماغي
وصممت انها لازم تقولي الفاصوليا الي انا دافع ثمنها فين؟
بصراحه كنت غبي لما عملت كده
قولتلها لو ماقولتيش المكان فين دلوقتي انا هسيب البيت وامشي
اتخانقنا ,وانا فضلت مصمم
بصراحه مش عارف ليه بالغت قوي كده
كنت اخليها تخبي الفاصوليا وخلاص
او حتي كنت سيبتها تهدي شويه
بس انا معملتش كده
وفضلت اضغط عليها
قولتلها يلا نروح الغابه دلوقتي
او ارسميلي خريطه لمخبأ الفاصوليا 😂
في النهايه للاسف انفصلت عني
انا دلوقتي حزين
ده غير كمان اني دلوقتي مجبر ادفع كل الايجار لوحدي بدل من النص بس
ودي مشكله ماديه كبيره بالنسبه لي…….
🌹انتهت الرساله
القصه دي اتكتبت في شهر 4 سنه 2020 مع بدايه جائحه كو*فيد (كور*ونا)
طبعا في الوقت ده الناس كلها كانت خايفه وكانوا بيخزنوا الاكل بكميات كبيره , ده حصل في مصر وكمان في الدول الاجنبيه
(انا فاكره وقتها شوفت فيديو لسوبر ماركت في امريكا وحرفيا الماركت كان فاضي وكل الرفوف والثلاجات مافيهاش اي بضاعه)
اعتقد ان البنت الي في القصه كانت خايفه قوي والموضوع كان عاملها هلع
لان طبعا مش كل الناس بتتعامل مع الازمات زي بعض
🌹الناس علي ريديت كتبوا تعليقات مضحكه جدا علي القصه دي
هترجم شويه منها😂 :
🌷تخيل ان جارها واقف في البلكونه بليل , وبعدين يشوفها بتتسحب بليل و ماسكه كيس ثقيل و بتتصرف بغرابه ورايحه الغابه ومعاها مجرفه
وبعدين يلاقيها راجعه من غير الكيس!!!
ياه علي المفاجأه 😂
🌷الراجل تاعب نفسه علشان يعرف مكان الفاصوليا
وعلي الناحيه التانيه في الغابه في طفل اسمه جاك اكتشف العلب واخدها
🌷لما اطفالك يسألوك عن 2020 افتحلهم الرساله دي
🌷دلوقتي هو معندوش ولا زوجه ولا حد يساعده في الايجار
اراهن ان بيتمني لو يقدر يعرف مكان الفاصوليا 😂
🌷هو مش ذكي انا لو مكانه
كنت هشتريلها علب جديده واستني لما تروح تدفنهم وامشي وراها من غير ماتحس علشان اعرف مكان الفاصوليا
🌷راجل عجوز خلاص بيموت هتجيله رساله في البريد ولما يفتح الرساله هيكتشف انها خريطه لكنز الفاصوليا المفقود
🌷انا عايز اعرف التحديث…. ايه الي حصل للفاصوليا؟؟؟
🌷انا فاكر اني وقتها كنت في سوبر ماركت وكان تقريبا فاضي , وفي واحده كانت بتشتري 12 جالون حليب
كنت عمال اضحك من التوتر ومش عارف اسيطر علي نفسي
عمال اضحك طول الوقت وانا بشوف ايه الحاجات الي نقصاني علشان اشتريها
بعد كده بكيت 3 ايام من الخوف
علشان كده انا فاهم كويس ايه سبب دفن الفاصوليا
🌷وفي ناس عرضوا علي صاحب المشكله انهم يقابلوه في الغابه ومعاهم جهاز كشف المعادن علشان يعرفوا مكان الفاصوليا
🌷بعد الف سنه مجموعه علماء بيحفروا في الارض وهيكتشفوا علب غامضه من القرن الواحد والعشرين 😂
🌷مرت سنين ولسه في اسئله غامضه محدش جاوب عليها
الفاصوليا اختفت فين؟
هل عرف مكانها في النهايه؟
هل مراته استسلمت وسابتله الخريطه؟
🌷هو استعجل
لو كان استني شويه كانت هتظهر شجره فاصوليا جديده في الغابه😂
#حواديت_الاجانب
#ريديت
