الراجل المائي..
أنا دلوقتي عايشة على الكنبة عند أختي وصاحبتها؛ بشتغل في المطعم اللي جنب البحيرة علشان أقدر أوفر فلوس للدراسة.
حالتي النفسية “معقولة” يعني مش مبسوطة قوي، بس محتاجة الشغل ومكان أنام فيه علشان أقدر أعيش.
علشان أدي لنفسي بريك من السوشيال ميديا، بروح أجري جنب البحيرة الفجر. البحيرة دي حلوة جدًا وبتجذب الغواصين “علشان يتفرجوا علي المدينة الغرقانة تحت الميه”
النهارده كنت سرحانة وأنا بجري، وفجأة شفت حاجة سودة طافية على وش المية على بعد حوالي 40 قدم “في مكان كله صخور في المايه”.
لما ركزت أكتر اكتشفت انه راجل وكان شكله ميت. مـيـت حرفيا. كان وشه بعيد عني، راسه مرفوعة لورا، وعينه مغمضة، وبيتحرك زي طعم السمك في المية. ومفيش حد حواليه!!!
فقلت أكيد ده واحد مجنون لابس معدات غطس لوحده في عز الفجر، وبيخاطر بنفسه في الميه وبيعمل أي عبث.
زي الهبلة، ما فكرتش حتى أنده عليه أتأكد إذا كان كويس ولا لاء. بدال كده، قلعت الشوز ونطيت في الميه عشان أنقذ العبقري ده.
في خيالي، كنت شايفة نفسي بجري 3 خطوات عظيمة وبنط في المية العميقة بأسلوب السباحين المحترفين. بس الحقيقة كانت مختلفة تمامًا، رجلي الحساسة خبطت في الصخور الحادة، وكنت بعمل حركات غريبة من كتر الوجع. المشكلة كمان إني كنت لابسة العدسات اللاصقة، فاضطريت أسبح في اتجاه الراجل وأنا مغمضة عيني.
لما فتحت عيني، لقيته عايش عادي و كان بيبص عليّا كأني بنت مش طبيعية، فقلت له بسرعة: “أنت كويس؟”
هو شال جهاز التنفس وقال باستغراب: “أيوه.”
مخي وقف تمامًا في الوقت ده وكنت حسة أن البحيرة عميقة جدا ومفيش قاع. قبل ما أخوف نفسي وأسمع موسيقى فيلم “الفك المفترس”، قررت أهرب بأسرع شكل، وقلت وأنا بزعق ورايا: “افتكرت إنك محتاج إنقاذ”، علشان أبرر اللي عملته!!
وأنا بلف، سمعت صوت حد بيكح من بعيد. ما توقعتش وجود حد تاني فخوفت جدًا، واتوترت، وطلعت صرخة ودني وجعتني من قوتها!
الأتنين الأغبياء دول ضحكوا، وفجأة لقيت كذا راس تانية طالعة حوالينا. اكتشفت إني محاطة بغواصين كتير كلهم مبسوطين جدًا من فشلي.
“المخلوق البحري” اللي كنت ناوية أنقذه في الأول شاور لي على الشط، وبعد ما هزيت راسي اني موافقة، بدأ يعوم ناحيتي علشان “يرجعني” تاني للبر.
الشط كان أبعد بكتير مما توقعت، فكنت بحاول أتنفس بهدوء وأخبي إني محتاجة أشفط كل الأكسجين اللي في الجو. كمان الكوميديا اللي في الموقف غلبتني وبدأت أضحك لوحدي.
في الآخر قلت له وأنا بهزر: “بس، حظك حلو إنك مكنتش بتموت بجد، عشان كنت هضطر أطلع كل طاقتي علشان أسحبك كل المسافة دي.”
هو ضحك وعرض عليا “يسحبني.”
“مستحيل! مش هيحصل أبدًا.” حتى لو اضطررت أعوم بطريقة الكلاب، مش هقبل بالهزيمة دي قدامة.
طلعوا طلاب أو خريجين جداد من كلية عسكرية، وجايين هنا في الصيف. كانوا بيتدربوا الأول في حمامات السباحة ودلوقتي بيعملوا تدريبات “في المية المفتوحة”، ولازم يعملوا التدريبات دي في الفجر.. غالبًا أنا خربت التمرين اللي كانوا شغالين عليه.
لما وصلت الشط، عملت كل جهدي إني أشد ضهري وأمشي بشموخ وأنا خارجة من المية وشكلي شبه الكتكوت المبلول 😂
عرضت عليه هو وفريقه ييجوا عندي في المطعم علشان يشربوا عصير، قبل ما أجري بسرعة مليانة إحراج ناحية الغابة عشان ارجع البيت.
🌹تعديل :
البحيرة هي بحيرة Jocassee في ساوث كارولينا.
طيب، هاعترف إن في جزء مني معجبة بشكله الغامض اللي طالع من عالم الظلال، كمان كان مضحك ولطيف. كنت مستمتعة جدًا بأسلوبه الساخر وتعليقاته الذكية، وعندي مليون سؤال نفسي أسأله.
🌹تعديل :
دلوقتي أنا في الشغل…. لكل الستات اللي كانوا بيدوني نصايح… أيوة، سيبت الشباشب الحلوة اللي عليها رسومات الحشرات في البيت، ولبست فستان صيفي لطيف.
🌹تعديل: مرت ساعة. ولسه ماجاش 😞
🌹تعديل: جــه! يا نهار أبيض، وصل من شوية.
هو لطيف وذكي وفضل يدافع عني قدام أصحابي الأغبياء اللي في المطعم، اللي كانوا على وشك ينادوه “مستر مايه” في وشه.
حاسه إني مبسوطة قوي بس بصراحة مش متأكدة هيحس بإيه لما يعرف إنه بقى مشهور .
عرفت عنه حاجات كتير، بس مش هيبقي عدل أشاركها من غير إذنه.
هو كان بيحكي لي شوية عن التريقة اللي اخدها النهارده بسبب إني “أنقذته” 😂 دمة خفيف قوي. وحاسة إن في تواصل بيننا.
🌹تعديل:
دا التحديث الأخير بجد لأنكم مش عايزين تسيبوا القصة. عارفة إن دا ممكن يبان غريب شوية لأنني شاركت الموقف على الإنترنت عشان الكل يشوفه، بس امبارح كانت مجرد قصة مضحكة عن شخص مكنتش أعتقد إني هشوفه تاني. حاجة أشاركها لما نحتاج نضحك شوية.
النهارده… الوضع مختلف. أنا معجبة بيه. في كيمياء بينا واهتمامات متشابهة، واتفقنا إننا هنشوف بعض تاني.
🌹تعديل:
“تحديثات!” انتوا لسه بتصرخوا وبتطلبوها بعد 3 أسابيع؟
الراجل المائي، الأمير الضفدع، الراجل الساحر اللي طالع من الأعماق، ملك الظلال (وكل الألقاب التانية اللي اخترعتوها) لسه جزء كبير من حياتي. هو أحسن بكتير من أي وصف أقدر اقوله.
بتمنى أن واحد فيكم يحصل له حاجة رائعة وسحرية.
خدوا بالكم من نفسكم، يا جماعة ❤️
