الخيانة المالية 💰💵
أنا وخطيبتي مع بعض من 5 سنين، هي عمرها 27 سنة.
احنا لسة ناقلين لبيت جميل في “ضواحي المدينة” وأنا اللي دافع تمنة بالكامل.
أنا بشتغل في “البرمجة” وظروفي المادية “كويسة جدا”، خطيبتي ربه منزل وأنا معنديش مشكله في ده، أحنا متفقين من الأول، أنا اللي هصرف علي البيت وهي اللي هتطبخ وتغسل وتهتم بالحاجات التانية.
المشكلة أن خطيبتي بتحب أختها زيادة عن اللزوم، وبقالها سنتين بتبعت فلوس لأختها الصغيرة “إيميلي”.
إيميلي حملت وهي عندها 20 سنة، وبتشتغل نادلة في مطعم. والدهم بيغير شغله كل شوية، وإيميلي بتقول إنه كسلان جدًا. ساعات يختفي لوقت طويل من غير ما يقول لإيميلي رايح فين أو بيعمل إيه.
إيميلي كل شوية تطلب فلوس من خطيبتي. وعشان هي طيبة وجدعة بتوافق دايمًا. الموضوع بدأ بمصاريف البامبرز، ماشي مفيش مشكلة. بعدين لبس للبيبي، برضه مفيش مشكلة. بعدين حضانة، حاولت أعديها.
بس اتكلمت مع خطيبتي وقلتلها إحنا مش ملزمين نصرف عليها، وإني موافق أساعد في حاجات بسيطة، لكن مش في كل حاجة.
خطيبتي وعدتني إنها هتبطل تبعتلها فلوس قريب جدا وأن حالتها المادية خلاص بتتحسن، اوك….قولتلها ماشي وسكت، الكلام ده من شهور.
من يومين، جالي إيميل بيقول إن اتصرف من حسابي حوالي 50,000 دولار خلال الـ10 شهور اللي فاتوا! واللي فاضل في الحساب 20,000 دولار بس.
كلمت خطيبتي وسألتها، اعتذرت وقالت إن الفلوس دي بعتتها لأختها عشان لازم تقف جنبها.
أكتشفت اني كنت بدفع لاختها كل حاجة (الايجار، قسط العربية، ملابس للبيبي، التأمين، الأكل، وحاجات تانية)
المشكلة أني مكنتش براجع مصروفاتي خالص.
طلبت منها توريني الرسايل، واكتشفت أن أختها كل شويه تبعت رسالة وتقولها ” ابعتيلي مبلغ كذا عشان مش معايا فلوس” و خطيبتي تقولها حاضر و تبعتلها.
المشكلة أن بعد ما اتخانقنا مع بعض بسبب الموضوع ده، تاني يوم علي طول أختها طلبت 1000 دولار عشان تصلح العربية، ومفيش فايدة فيها بعتتلها الفلوس برضة!!
يعني مش كفاية ان الفلوس خلصت ومتبقاش غير 20.000 بس، لا كمان دلوقتي بقوا 19.000، طيب وبعدين هو أنا هعيش عمري كله أصرف علي أختها!!
وكل ما نتخانق تقولي دي أختي ومستحيل أتخلي عنها.
هي دلوقتي سابت البيت وقالتي خلينا نبعد عن بعض لحد مانهدي.
أنا قاعد لوحدي في البيت وبفكر هعمل ايه بعد كده؟؟؟
🌿تحديث:
بعتتلي رسالة بتقولي أنها مش هتتخلي عن عيلتها ابدا، وأن الفلوس دي مجرد ورق، لكن العيله مستحيل تتعوض، واننا لازم نقف جنب أخواتنا لما يحتاجولنا.
قولتلها خليكي عند أهلك دلوقتي بلاش ترجعي.
أنا دلوقتي حزين قوي وزعلان علي الخمس سنين اللي ضاعوا، أنا بحبها قوي وكنت بحلم أكمل حياتي كلها معاها. كان نفسي أخلف أطفالي منها.
قاعد بفتكر كل الذكريات والحاجات الجميلة اللي عشناها سوا.
كل أحلامي ادمرت في ثانية بسببها، أنا كنت بحاول علي اد ما اقدر أكون رجل مثالي وكنت بعملها كل اللي نفسها فيه، وفي الاخر اخدت ايه؟ 50.000 دولار اترموا علي الارض.
🌿تحديث:
قابلتها في كافية وقولتلها خلاص كل واحد فينا يروح لحاله، قعدت تبكي وتتحايل عليا ماعملش كده.
اتألمت قوي وكان موقف صعب عليا، بس كنت خلاص واخد القرار .
أنا فكرت كويس في الاسابيع اللي فاتت، وحسيت أن صعب جدا اتجوز واحده مش واثق فيها، للأسف هي كدابة وخدعتني.
لما رحت للعربية جات ورايا وقعد تتحايل عليا تاني ووعدتني أن دي اخر مره وانها مش هتبعت لأختها أي فلوس تاني، بس أنا صممت علي موقفي ورفضت أكمل.
تاني يوم جمعت كل حاجتها عشان تيجي تاخدها، جت بس كانت رافضة تمشي، قولتلها بلاش تجبريني اتصل بالشرطة.
فضلت تتحايل عليا وتترجاني بكل الطرق، ولما ملقتش فايده قعدت تزعق وتقولي انت دمرت حياتي، وإني من غيرها ما كنتش هحقق حاجة، وأن هي اللي دعمتني ووقفت جنبي لحد ما ظروفي أتحسنت.
حاولت أتماسك قدامها وأبين أن مش هاممني، بس بمجرد ما مشت انهارت حرفيًا.
الناس بتسألني لو ناوي أرفع عليها قضية؟ لاء أنا مش هعمل كده. خلاص مش عايز أشوفها تاني ولا حتي في المحكمة.
أنا دلوقتي حزين وحاسس بالوحده قوي، بس بفكر اشتري كلب يسليني.
(القصة حقيقية مترجمة من ريديت، أصحاب القصة أجانب).
