الخاتم الالماس 💍
أنا جاية من عيلة بقالها تلات أجيال بتشتغل في المجوهرات، ورغم أن عيلتي خلاص غيروا مجال البيزنس، إلا إني لسه بحب أشتري وأبيع الأحجار الكريمة لنفسي أو عشان أعمل بيها قطع مخصوصة.
علاقتي قوية جدًا بعيلة جوزي، وكتير ببيع لهم خواتم أو أحجار بسعر رمزي، أو حتى بديهم هدايا عشان يستخدموها في عروض الجواز.
أخو جوزي الكبير مرتبط ببنت من فتره ، وللأمانة هما الاتنين “حاجة تانية خالص ومختلفين قوي عن العيله” لكن علشان صله القرابه، بنحاول نستحملهم وخلاص.
أحنا بنجمع مع بعض علي طول ، بس اخو جوزي وخطيبه مبيظهروش غير لما يكون في مناسبة أو محتاجين فلوس… وهما ودائمًا محتاجين فلوس.
خطيبه أخو جوزي “إيميلي”، بالرغم إنها ساعات بتبقى لطيفة، بس هي غالبًا مدلعة، مغرورة، صوتها عالي، ومصدر دراما في حياتي.
كل أول سبت في الشهر، العيلة بتتجمع على الفطار.
بدأ اليوم بشكل طبيعي، لحد ما أعلنوا إنهم أخيرًا قرروا يتجوزوا. كلنا فرحنا واتحول الفطار لإحتفال.
لكن وأحنا خلاص بنحاسب علشان نمشي، طلبوا إنهم يجوا بيتي عشان يختاروا خاتم ! كده ببساطة!
الطلب ده صعقني عشان هما مفكروش يسألوا أو حتى يناقشوا معايه أنا أو جوزي الأول، وكأنهم متوقعين إني هطلع لهم ألماس من الهوا من غير أي كلام!
قلت لهم “لأ”، قلت ممكن أساعدهم يلاقوا حاجة تناسب ميزانيتهم في السوق.
البنت خطيبته “إيميلي” طلعت “التنين” اللي جواها و الدنيا ولعت.
هي بدأت تتنرفز وتقول اشمعني ساعدت أخوات جوزي التانيين وجيبتلهم خواتم هديه، طبعًا الكل اتكسف. الموضوع ده بنخليه بينا، ومش بنتكلم فيه ونحرج الناس.
أخو جوزي بدأ يهدد جوزي ويقوله إنه لازم “يعلمني إزاي أتصرف وأني مش طبيعيه”.
كل ده كان بيأكد لي إن قراري كان صح.
الدراما اشتغلت، والكل حاول يهدي الموقف عشان نخرج من المطعم، حماتي، اللي كان مفروض تهدي الأمور، زودت النار وقالت إن أنا أنانية، وإني لازم اساعدهم.
أنا وحماتي كان بينا شوية مشاكل زمان، لكن كنا متصالحين في الفترة الأخيرة.
جوزي، زي البطل هو اللي نخرجنا من المطعم، ومن وقتها أنا وهو قفلنا تليفوناتنا عشان مش عايزين نكمل في الدراما دي.
دلوقتي إحنا الاتنين غضبانين.
🌹 تحديث:
حماتي وحمايا جم عندنا البيت عشان نتكلم عن اللي حصل. حمايا اعترف إن أخو جوزي وخطيبته كانوا غلطانين واعتذر نيابة عنهم.
بعد ما قال كده، حماتي انهارت. كانت شايفة إن “إيميلي” تستاهل الخاتم، ولما شرحت لها موقفي.
حماتي قالت علشان هما مش قادرين يشتروا خاتم ، يبقى لازم أساعدهم”.
كنت هفقد أعصابي معاها، لكن خرجت من البيت بدل ما أرد عليها.
حمايا طلع وهداني شوية، وفضل جوزي يتكلم مع مامته.
بعد كلام طويل، قررت أتنازل شوية. عندي حجر مويسانيت على شكل كمثرى اشتريته زمان من باب الفضول “مويسانيت هو حجر بديل للألماس”.
قولت ليه لأ، أديهم حاجة وخلاص، بشرط إنهم يعتذروا لي ولكل العيلة، وإنهم يتصرفوا في تركيب الحجر في الخاتم على حسابهم.
حمايا الأول كان رافض إني أعرض عليهم الحجر، لكن وافق في الآخر.
كلم أخو جوزي وشرحه له شروطي. أنا كمان كلمتهم وشرحت مواصفات الحجر عشان أتأكد إنهم فاهمين كويس.
لما جم عندي البيت، اعتذروا لي فورًا، وحتى حماتي اعتذرت لي كمان. بس أخو جوزي كان بيبصلي بغضب!
وريتهم الحجر، وإيميلي بدأت تبكي من الفرحة. بصراحة، لو الأمور ما كانتش اتطورت بالطريقة دي، كان ممكن أبكي معاها من فرحتي ليها.
بعد ما وريتها الحجر وأديتها شهادته “مكتوب في الشهاده أنه مش الماس، الأمور قلبت تاني ١٨٠ درجة.
فجأة، هم قلبوا واعتبروا إن الحجر ده مش “ألماس حقيقي” واعتبروه إهانة مع إن شرحت ده من الأول.
إيميلي بدأت تكلم مامتها فيديو وتوريها الحجر، وأخو جوزي بدأ يتهمني إني بهين خطيبته، لحد ما جوزي ادخل.
حماتي كان عندها الجرأة إنها تطلب تشوف لو عندي حاجة “حقيقية” عشان تختار هي بنفسها.
في اللحظة دي، أنا كنت فعلاً غضبانه لدرجة إني طلبت منهم يخرجوا من بيتي بأعلى صوتي. والدنيا سكتت فجأة.
وقتها أخذت منهم الحجر ورميته بالغلط، الحجر ضاع ومش عارفين هو فين. ضحكت ضحكة مليانة غضب لأني كنت في قمة انفعالي.
جوزي وحمايا طلعوا الكل من البيت، ودلوقتي أنا قررت أقطع علاقتي بيهم، ومش ندمانة…..
🌹 تحديث
لحد دلوقتي محدش كلمني شخصيًا، لكن سمعنا إن “حماتي” غضبانه جدًا (ومش عارفة ليه هي مضايقة بالشكل ده بصراحة)، وعرفت أن أخو جوزي وخطيبته بيفكروا يعملوا تاتوهات بدل الخواتم!!
جوزي حاسس إنه السبب في كل ده، بس فهمته إني أكيد مش بلومه على تصرفات عيلته. هو شايف إني كنت طيبة بزيادة لما عرضت عليهم حاجة أصلاً.
أحنا دورنا على الحجر، ولحد دلوقتي، معندناش أي فكرة ممكن يكون فين . بصراحة، في حاجة مش مريحة في الموضوع ده.
*لأي حد قلقان، أنا معنديش كميات كبيرة من الأحجار الكريمة والمجوهرات في البيت. عندي مجوهراتي اللي بحطها في خزنة مخفية،الحاجات اللي ليها قيمة زي القطع العائلية والأنتيكات متخزنة في خزائن آمنة في البنك من أيام أهلي.
هل أنا غلطانة إني رفضت أساعدهم مع إني ساعدت باقي العيلة؟ الحقيقية… أوقات بفكر أغير موقفي. محتاجة حكمكم!!!
#قصص
