اختبارات الثقة 🔍🕵️♂️
أنا أم لشاب مجتهد وطموح جدًا، عنده ٢٧ سنة.
الحمد لله ابني دلوقتي معاه فلوس كتير وشغله ناجح ومستواه المادي كويس جدًا.
هو كان مرتبط ببنت من حوالي ست شهور، وبصراحة البنت دي كويسة ولطيفه وأنا ارتحت لها قوي. هي كمان بتحب نفس الحاجات اللي أنا بحبها زي الشعر والمكياچ والشوبينج وكنا بنتكلم كتير وبقينا اصحاب وبنخرج مع بعض.
أنا عمري ما تخيلت إن علاقتهم ممكن يكون فيها حاجة غلط، لحد الأسبوع اللي فات لما لقيتها بعتتلي رسالة بتقول لي إنها بتحبني جدًا وبتحب تقعد معايا بس مش عارفة لو كان هينفع دلوقتي نخرج مع بعض عشان هي وابني سابوا بعض وانفصلوا خلاص.
طبعًا اتصدمت جدًا وسألتها: «ليه؟»
ردت عليّا وقالتلي إنها خلاص مش قادرة تتقبل تاني موضوع إن ابني طول الوقت حاططها في اختبارات وعايزها تثبت له كل شوية انها مش معاه بس عشان خاطر فلوسه.
قالتلي إن ابني شاكك فيها من أول يوم، وبيختبرها بطرق غريبة جدًا، زي إنه مثلًا:
١) مرة ساب كشف حساب البنك بتاعه في العربية ونزل وعمل نفسه بيشتري حاجة، وهو أصلًا كان مركّب كاميرا مراقبة جوة العربية عشان يشوف هيكون عندها فضول ولا لاء، ولما رجع ولاحظ إنها مسكت الورقة وبصت فيها اتضايق منها جدًا وحس إنها طماعة! “هو اللي اعترف بموضوع الكاميرا”
٢) بياخدها مطاعم غالية جدًا هو اللي بيختارها ويطلب أكل بمبالغ كبيرة جدًا، وفي الآخر يقولها إنه نسي المحفظة في البيت، ويطلب منها تدفع هي الفاتورة عشان يشوف هتتضايق ولا هتدفع عادي ومش مهم عندها الفلوس!
٣) ده غير انه ولا مرة اشترى لها هدية، ولما كانت بتسأله ليه مش بيجيب لها حاجة كان بيرد عليها بسخرية ويقول لها: «هو انتي مادية وكل همك الفلوس والهدايا؟»
أنا بصراحة استغربت جدًا من كلامها وقلت أكلم ابني وأسأله عن الكلام الغريب ده.
قعدنا واتكلمنا وقالي إن كل كلمة قالتها صح ١٠٠٪، وإنه شايف إنه مفيش أي مشكلة إنه يتأكد إنها معاه عشان شخصه مش عشان فلوسه.
وقال لي إنه فعلًا اتعمد يحط كشف حساب البنك في العربية علشان يشوف هي هتفتحه ولا لأ، ولما شافها مسكته حس إن دي علامة إن نيتها مش صافية!
وبعدين أكد لي إنه فعلا بيتعمد يوديها مطاعم غالية علشان يختبرها وإنه خلاها مرة تدفع فاتورة بقيمة ٥٠٠ دولار عشان يشوف رد فعلها، ولما لقى إنها اتضايقت قوي. أتأكد أكتر انها طماعة!!
سألته: «طب هي مش مدرسة أطفال؟ يعني مرتبها مش كبير قوي، متوقع تدفع فاتورة بالشكل ده ليه وانت اللي جايبها مكان غالي أصلًا؟»
رد عليّا وقال لي لاء مكنش المفروض تضايق قوي كده!!
وقال لي كمان إن اللي خلاه يحس انه خلاص مش عايز يكمل لما لمحت له انها جابت له هدايا غالية وسألته انت ليه ماجبتليش ولا مره هدية؟
في الآخر واجهها وقال لها: «أنا حاسس إنك معايا بس عشان فلوسي».
ردت عليه وقالت له: «احنا مش هينفع نكمل» وسابته وعملت له بلوك من كل حتة.
دلوقتي هو زعلان جدًا وبيشتم فيها وبيقول عليها «طماعة وقليلة الأصل»، ولما أنا ضحكت على أسلوبه.. قال لي إني مش فاهمة حاجة وماينفعش أكون في صف واحدة غريية ولازم اكون في صفه هو!
قالي: «إنتي عمرك ما هتفهمي يعني إيه تبقى راجل غني وكل الناس عايزة تستغلك!»
أنا فاهمة خوفه كويس والله، بس قلت له بصراحة: «لو فاكر إن في أي بنت محترمة هتتحمل الأسلوب بتاعك ده، يبقى انت بتضحك على نفسك!
ولو خايف ترتبط بواحده طمعانه في فلوسك يبقى اتجوز واحدة مستواها المادي عالي من الأول وريح نفسك، وسيب البنات اللي مستواها أقل في حالها وما تظلمش حد بطريقتك دي!»
تفتكروا عندي حق أغلط ابني. ولا ابني من حقه يعمل اختبارات للبنت اللي هيرتبط بيها؟
