الأسهم بتاعتي 💰📈
لما أخويا كان عنده 16 سنة وأنا كان عندي 4 سنين، جدتي اشترت لكل واحد فينا “محفظة أسهم”.. ولما أخويا كبر شوية سحب مبلغ كبير و اشترى عربية هوندا جديدة.
أنا كنت عارف موضوع الاسهم بتاعتي، وكنت بتابعها وهي بتكبر من وقت ما فهمت هي عبارة عن إيه.
ولما كبرت وبقي عندي التحكم الكامل في الفلوس، وقتها الأسهم كانت وصلت لرقم خرافي. بابا كان دايمًا بيزن عليا أسيب الاسهم تكبر أكتر لحد ما أوصل ل لسن الاربعين. عشان كده أنا ماسحبتش الفلوس دي خالص.
أنا مش بتكلم كتير مع أخويا، لأنه عمل حاجات غبية مع العيلة كتير طول السنين اللي فاتت، كمان أنا ما اتربيتش معاه في نفس البيت.
أنا معرفش عنه غير الحاجات اللي بابا بيقولها لي. بس الجديد بقى إن حبيبته الجديدة شغالة في القانون.
أنا استلمت منهم هما الاتنين “أخويا وحبيبته”. جواب رسمي بيقول إن الأسهم اللي جدتي سابتها كانت المفروض تبقى لينا إحنا الاتنين، مش ليا أنا لوحدي، وإنه مأخدتش غير 15.000 دولار بس.
الرقم فعلاً مظبوط، بس الاسهم بتاعتي كانت قيمتها كده برضه وقت ما هو سحب فلوسه.
دلوقتي هما عايزين نص قيمة الاسهم بتاعتي، وحبيبته بلغّتني إنه لو ما ادتهمش نص الفلوس (اديهم حق الوصول للحسابات)، المصاريف القانونية والغرامات هتكون أكتر من نصيبي، وساعتها مش هيتبقي ليّا أي حاجة.
هل الكلام ده حقيقي؟ إيه احتمالية إنهم يكسبوا القضية وياخدوا مني كل حاجة؟
🌿تحديث:
أنا وأخويا ورثنا من جدتي حاجات كانت في الأصل بتاعه جدي، وهو اللي كان شاطر في الفلوس. بعد ما جدي توفى، جدتي اهتمت بالحاجات دي بنفسها، وهي اللي فتحت حسابات ليا أنا وأخويا. (هي خلت بابا هو الواصي علي فلوسي لحد ما أكبر وأقدر اتصرف فيهم).
وبابا سلمني كل حاجة من 6 سنين. ده غير انه زودلي فلوس أكتر من معاه عشان يدعمني.
بابا اعترفلي إنه زعق لأخويا السنة اللي فاتت لما جه يطلب منه فلوس تاني، وقال إنه اداله فلوس كتير قوي طول السنين اللي فاتت، وخلاص مش ناوي يساعده ب ولا سنت تاني.
أخويا اكتشف إني معايا فلوس كتير. لأن بابا وهو بيتخانق معاه قاله “مطلعتش ليه شاطر زي أخوك اللي حافظ علي فلوسه”. عشان كده أخويا عرف.
المحامي بتاعي أكد إن موقفي سليم تمامًا، وطلع أن مفيش قضية مرفوعه عليا اصلا.
المحامي بتاعي عرف أن حبيبة أخويا كانت سكرتيرة قانونية في مكتب. والجواب اللي استلمته منها كان مزور وهي كانت حاطه اسمها في منصب أعلى من اللي كانت فيه فعلاً. ومغيره معلومات الاتصال الحقيقية.
المحامي بتاعي اتواصل مع المكتب اللي كانت شغاله فيه والمكتب اعتذر وبلغ المحامي إنها اتفصلت فورًا.
بعد أسبوع من فصلها، أخويا زارني وقعد يترجاني أديله فلوس. قالي أن حبيبته عليها ديون كتيرة جدًا، عشان كده حاولت تنصب عليا علشان تاخد مني فلوس وطبعا فشلت.
كنت حاسس بالذنب جدًا وأنا برفض أساعد أخويا رغم ان هو اتحايل عليا كتير، بصراحة لو ما كانش الموضوع ليه علاقة بحبيبته والمبلغ مكنش كبير قوي كده، كان ممكن اساعده.
تاني يوم الصبح لقيت كل كاوتشات عربيتي متقطّعة. طبعا هو اللي عمل كده، أنا دلوقتي مبقتش حاسس بأي ذنب خالص.
أنا حجزت ميعاد مع مستشار مالي عشان يساعدني أكبر فلوسي أكتر.
(القصة مترجمة من ريديت..أصحاب القصة أجانب).
