خاتم مراتي 💍💎
لو قولت أني غضبان جدًا ده أقل بكتير من اللي أنا حاسس بيه.
أنا راجل عمري (46 سنة) عندي ابن اسمه جيك (23 سنة). جيك كان ولد كويس قوي وهو صغير، عشان كده اللي عمله كان صدمة كبيرة جدًا بالنسبة لي.
أنا عندي بنت كمان، اسمها أمبر (16 سنة). لما مراتي توفت بسبب كورونا من سنتين، كانت عاملة وصية. (هي كانت مناعتها ضعيفة وكانت تعبانه عشان كده كتبت وصيتها).
في الوصية، مراتي قسّمت ممتلكاتها بين اولادنا. جيك أخد نصيبه خلاص لأنه كان عنده 21 سنة وقتها. هو دفع فلوس الورث في مقدم شقة، وكمان أخد عربية والدتة.
الوصية كانت بتقول إن بنتي هي اللي تاخد كل مجوهرات والدتها. مراتي كان عندها خاتم دهب قديم عليه ألماسة في النص وعلي الجانبين موجود ياقوت أزرق.
الخاتم ده موجود في عيله مراتي من زمان. هو في الأصل كان خاتم جدتها. جوز جدتها كان صايغ وهو اللي صمم لها الخاتم بنفسه.
الخاتم راح لحماتي وبعدين لمراتي وفي الاخر وصل لبنتي.
لما مراتي توفت، حزنت عليها جدًا. لكن حاولت اتماسك علشان خاطر عيلتي. وبصراحة هما دعموني قوي. عشان كده خيانة ابني كانت زي السكينة في ضهري.
جيك مرتبط ب بسارة من 8 شهور.
بصراحة هي مسيطرة على ابني تمامًا، كمان واضح عليها انها بتحب المجوهرات قوي لأنها بتلبس مجوهرات علي طول.
في يوم، ابني قال لسارة عن مجوهرات العيلة اللي مراتي سابتها لأخته، وسارة كان نفسها تشوفها جدًا. فجيك استغل إن مفيش حد في البيت، ودخل أوضتي وورّاها المجوهرات.(هو اللي اعترفلي إنه عمل كده).
لما عرفت اضايقت منه. بس كنت فاكر إن الموضوع هيقف علي كده. في الحقيقة أنا كنت غلطان.
جيك جالي وفضل يترجاني ويتحايل عليا اديله الخاتم علشان يخطب بيه سارة. قال إن سارة حبت الخاتم جدًا لما شافته، وإن ده الخاتم المثالي بالنسبه لها.
هو كان فاكرني هفرح عشان هو خلاص ناوي يخطب.
أنا قلتله إن الخاتم بتاع أمبر وهي اللي من حقها تقرر. وكمان أنا مش هاسمح له يضغط علي بنتي علشان تتنازل عنه بالعافيه.
حاولت أكون عادل، وقلتله إنه ممكن يشرح الاسباب لأخته ويطلب منها وهي حره توافق أو ترفض. ومن حقه يعمل كده مره واحده بس عشان ميضغطش عليها.
قولتله لو أختك رفضت لأي سبب، يبقى الموضوع انتهى.
جيك وافق وطلب الخاتم من أمبر قدامي. لكن هي قالت له لاء، لأنها عايزة تحتفظ بيه ضمن مجوهرات العيلة، وكمان هي دايمًا كانت بتحب الخاتم ده.
قالتله أن الخاتم بالنسبه لها “لايقدر بتمن” وانها مش ممكن تتخلي عنه.
قولت ل جيك خلاص الموضوع ده انتهي. ومش عايزين كلام تاني في نفس الموضوع.
جيك ساب البيت وكان غضبان قوي. وأنا افتكرت أنه هيسكت علي كده.
بس تاني يوم وأنا في الشغل راح تاني لأخته وطلب منها الخاتم. قعدوا يتخانقوا مع بعض. وبنتي اتصلت بيا وهي بتعيط.
كلمته وقولتله امشي من البيت وسيب أختك في حالها. قالي ان الخاتم ده ورث ومن حقه ياخده.
قولتله أنت أخدت فلوس وعربية. والمجوهرات من حق أختك. قفل السكة في وشي.
وبنتي قالتلي انه مشي.
بعد كده، وأنا في الشغل، بنتي كلمتني وقالتلي إن جيك رجع البيت. وكان لابس بدلة، دخل أوضتي وأخد حاجة، وبعدها خرج من غير ما يقول أي حاجة لأمبر. هي حاولت تمنعه من الخروج، بس هو زقها وخرج.
جريت على البيت أول ما خلصت شغلي وفتحت صندوق مجوهرات مراتي. والخاتم مكنش موجود. على طول كلمت جيك، بس مردش عليا. فبعتله رسالة وقلتله لو مرجعش الخاتم هبلغ البوليس. وحتى لو ناوي يقدمه لخطيبته، ده مش هيمنعني إني آخده تاني.
في الاخر اضطر يكلمني، وقالي ماينفعش أعمل معاه كده لأنه ابني. قلتله إنت سرقت الخاتم. ولازم ترجعه فورًا وإلا هعمل حاجات مش هتعجبك.
بدأ يكلمني بصوت واطي وقالي إن خلاص فات الأوان.
هو راح مطعم مع سارة وعملها مفاجأه وطلب إيدها بالخاتم. وهو خلاص في ايديها دلوقتي، (مش عارف لحق يعمل كل ده امتي في أقل من ساعة. بس شكله كان عايز يحطني في الأمر الواقع).
قلتله إن دي مشكلته، هو سرق الخاتم، وهو اللي لازم يرجعه. يا أما هروح أعمل محضر سرقة وأقلب الدنيا، ولو اضطررت هجيب محامي كمان.
جيك بدأ يعيط. قولتله أني مستحيل اسكت. وعنده فرصه لحد تاني يوم الصبح عشان يكون الخاتم عندي.
قعد يعيط وقالي انه هيجي بكره الصبح.
فعلاً جه الصبح وجاب سارة معاه عشان يحاول يخليني أحس بالذنب.
المشكلة إنها كانت عارفة أنه سرق الخاتم، ورغم كده عايزه برضة تحتفظ بيه، لأنها واقعة في غرام الخاتم من أول ما شافته.
قلتلها لو عجبك قوي كده ممكن تخلي صايغ يعملك نسخة منه.
جيك فضل يتحايل عليا تاني أسيبله الخاتم. بس أنا صممت علي الرفض.
سارة خلعته من ايديها ورمته لبنتي وقعدت تزعق فيا وتقول أني راجل شرير وخرجت وهي بتعيط.
ابني قالي عاجبك كده أنت خربت علاقتي بخطيبتي. وطلع يجري وراها.
أنا مقولتتش لأي حد في العيله. بس جيك هو اللي حكي. كان فاكر أن العيلة هتتعاطف معاه. بس العكس هو اللي حصل.
جالي مكالمات من العيله بيقولوا انهم في صفي. وأن اللي عملته هو الصح.
من وقتها وجيك مخاصمني ورافض يكلمني خالص.
بعتله صور الخاتم عشان يروح لصايغ ويعمل واحد زيه. بس أنا عارف أن الموضوع ده هيكون مكلف جدا.
بصراحة أخدت صندوق المجوهرات وحطيته في خزنه في البنك. عشان يكون في أمان واشيله لبنتي لحد ما تكبر ويكون عندها 21 سنة وقتها تقدر تستلمه.
أنا عارف أن عندي حق بس في نفس الوقت أنا مش عايز أخسر ابني. لو حد عنده نصيحه أزاي أصالح ابني وفي نفس الوقت أحافظ علي حق بنتي؟
(القصة مترجمة من ريديت..أصحاب القصة أجانب).
