اتفاقية الزواج 💍🤝
أنا (33 سنة) وجوزي (35 سنة) متجوزين من 6 سنين، وعلاقتنا من 10 سنين (إحنا نعرف بعض من زمان أوي). عندنا 3 أولاد.
إحنا الاتنين صيادلة. بعد جوازنا بسنتين، جوزي فتح بيزنس عائلي مع والده، والحمد لله الشغل ماشي كويس جدًا.
جوزي بياخد 50% من صافي الأرباح وعنده مبلغ ممتاز، بس الفلوس كلها مرتبطة بالشركة، والرصيد بيزيد كل سنة مع توسع الشغل.
أبوه قلقان إن لو اتطلقنا في يوم من الأيام، أنا هاطلب منه نص فلوس الشركة. عشان كده، هو عايزني أمضي على ورقة واتنازل عن الحق ده.
عشان أوضح الصورة، إحنا مسلمين، وفي الإسلام الست ليها الحق في المبلغ اللي اتفقنا عليه من قبل الجواز في (حالة الطلاق). بالنسبة لي، المبلغ ده حوالي 120,000 دولار، وبيتنا أصلًا ملك لينا بالتساوي 50/50، وأنا مش هاطلب أي حاجة زيادة. بس بصراحة، أنا مش عايزة أمضي على أي حاجة.
حاسه إن جوزي المفروض يثق فيا لما بقوله إني مستحيل أطلب نص نصيبة من الشغل.
وكمان قلتله إن أبوه عمره ما طلب من أمه تمضي على ورقة زي دي، ف اشمعني أنا اللي لازم أعمل كده؟
هل أنا غلطانة عشان برفض إني أمضي؟
🌿التعليقات علي الريديت:
من حقك الفلوس دي من الناحية القانونية، لأنك باعتبارك مراته كنتي جزء من البزنس ده. لو هو عايزك تتنازلي عن حاجة من حقك، لازم يكون في مقابل لده. الموضوع مش مسألة ثقة، بس المفروض متتعامليش بظلم كده.
لازم تكلمي محامي يقف جنبك.
🌸رد صاحبة المشكلة:
هو بيقول إن من حقي بس اللي اتفقنا عليه وقت الجواز، الـ120 ألف وخلاص. وأنا موافقة عشان ده اللي دينّا بيقوله، حتى لو عايشين في كندا.
أنا كنت عايزة أقوله إني كمان بشتغل معاه عشان يبني ثروته، ومش عادل إني مخرجش بأي حاجة لو اتطلقنا، بس مش عايزة أوصل للنقطة دي دلوقتي. يعني لما بيسافر، أنا اللي بقعد مع الولاد وبشيل مسؤوليتهم 100%، وده شغل برضه! ولو مش بعمل كده، هو نفسه مش هيعرف يركز في شغله ولا ينجح فيه.
🌿رد علي ريديت:
إنتي فاهمة القوانين الإسلامية غلط. ماينفعش تختاري اللي يعجبك وتسيبي الباقي.
أولًا، المؤخر كان لازم تستلميه وقت العقد، لأن الجواز مش صحيح من غير ما تستلمي المؤخر (مش بهزر).
ثانيًا، لو هما متمسكين بالقيم الإسلامية للدرجة دي، يبقي ماكانش المفروض يخلوكي تساهمي بأي سنت من فلوسك في البيت، وكان لازم هو اللي يدفع كل مصاريفك ومصاريف الأولاد بالكامل.
ثالثًا، حتى بعد الطلاق، جوزك ملزم يدفع كل حاجة تخص أولاده، وأقصد كل حاجة حرفيًا. يعني التسوية في حالة الطلاق هتكون أكبر بكتير من اللي إنتي متخيلاه.
المضحك إن الناس بتستخدم الدين بس لما يكون على مزاجهم! هما بيلعبوا عليكي. أي تسوية هتاخديها في محكمة كندية هتكون أقل بكتير من تسوية إسلامية حقيقية. ماتمضيش على أي حاجة، وخدي الـ120 ألف لو لسه ماخدتيهاش!
لو انتي استثمرتي فلوس في البزنس ده، يبقى من حقك تاخدي عائد على استثمارك. يعني لو حطيتي تلت رأس المال في البداية، يبقى من حقك تلت الشركة دلوقتي.
هاتي محامي واحمي استثمارك في الشركة. بصراحة، ماتثقيش في الناس دي خالص!
🌿تحديث:
أول حاجة، عايزة أشكر كل واحد فيكم بجد على كلامه. استفدت من كل تعليق قريته، وحسيت بقوة وأنا بقرأ التعليقات.
مقدرتش أنام امبارح وأنا بفكر هاقول إيه لجوزي. هو عادةً بيصحى حوالي 5 الفجر عشان يروح الجيم ويشرب قهوته بروقان قبل ما الأولاد يصحوا، فقررت أصحى معاه.
قلت له إني كنت مصدومة جدًا لما طلب مني أمضي على الورقة دي، خصوصًا إنه كان عادي عنده إني أعمل كده! وسألته: إزاي تقول إني ماليش حق في أي حاجة؟! أنا بشتغل وبشقي من 9 لـ 5، وبعدها برجع البيت أطبخ، وأهتم بالعيال، لحد مايناموا!
وفي آخر الشهر، ما بخدش منه فلوس خالص – كل الفلوس بتروح على الفواتير. آه، هو بيصرف على السفر، والهدوم، والهدايا، بس أنا عمرى ما بطلب حاجة، ولا بقول له يجيب لي إيه.
وبعدين فتحت موضوع الدين، وقلت له: لو عايز نتكلم بالدين، يبقى عشان نكون عادلين. إسلاميًا، فلوسي ملكي، ومش مفروض اصرف منها. ولو كده، أنا عايزة كل دولار دفعتة يرجع لي – يعني أنا عايزة منه حوالي 300 ألف دولار عن الخمس سنين اللي اشتغلتهم.
وكمان قلت له إنه لو فعلاً عايزني أمضي، هأمضي…بس مع المحامي بتاعي. لأن واضح إني كنت ساذجة زيادة عن اللزوم، وكان لازم أبقى أذكى من كده.
وفي الآخر، قلت له إن المفروض كنا بنوفر مع بعض، لكن دلوقتي بيقول إنه لو اتطلقنا، مش هاخد حاجة؟ طيب، أنا كنت بشتغل وأتعب كل ده عشان إيه؟
بصراحة، اتأثرت جدًا وعيطت لأني كنت متضايقة فعلًا إنه شايف إن ده عادي.
جوزي حضني، واعتذر، ووعدني إنه مش هيطلب مني أمضي على أي حاجة.
حتى قال إنه مستعد يحط نص كل حاجة باسمي دلوقتي..
لسه عندي حاجات كتير محتاجة أفكر فيها، بس على الأقل حاسّة إن جوزي سمعني.
🌿تعليق علي ريديت:
انتي متأكده إن مفيش عشيقة؟
دلوقتي آه. (طبعا مقدرش أقول أن ده مستحيل) أنا وجوزي كنا حبايب من أيام المدرسة، وهو خانّي مرة زمان وإحنا صغيرين، بس عمره ما عملها تاني، فـ ممكن يكون رجع لعاداته القديمة؟ الزمن هو اللي هيبيّن والأيام الجاية هتكشف كل حاجة.
🌿تعليقات علي ريديت:
🌸لازم يكون عندها مدخرات خاصة وخطة احتياطية.
🌸هو ما حضنهاش وواساها عشان فهم إنه غلطان. هو عمل كده عشان معندوش 300,000 دولار كاش.
🌸الغريب بالنسبالي في الموضوع ده انه عايز يا خد كل حاجة. عايز زوجة تقليدية وفي نفس الوقت عايزها تشارك معاه في المصاريف وتمضي علي اتفاقية!!
🌸أنا سعيد ان الموضوع انتهي علي خير . بس بصراحة أنا مش واثق في جوزك ولا حماكي!
🌸متتنزليش عن حقك ورجعي كل فلوسك. أنا حاسس أن ده السبب اللي خلي جوزك يغير رأيه.
🌸وفري كل فلوسك لنفسك ومتدفعيش أي مصاريف في البيت تاني.
(القصة مترجمة من ريديت).
