أنا غيرانة منها قوي!!!
قبل ما أبدأ سؤالي، عايزة أقولك إنّي مكسوفة من نفسي ومن اللي بعمله. أخدت حوالي أسبوع عشان أقدر أكتب الكلام ده. بسبب قد إيه أنا حاسة بكره تجاه نفسي.
أنا مديرة ومعايا فريق من حوالي ١٢ شخص بيشتغلوا تحت إدارتي. قبل كده كنت بعاني من اضطراب في الأكل، ودلوقتي بروح علاج نفسي عشان قلق وحاجات مرتبطة بصورتي عن جسمي.
كنت ماشية كويس لحد ما آخر بنت انضمت للفريق بتاعي. أنا حاسة بالذنب وانا بقول ده، لكن أنا بغير منها ومش بحبها. هي جذابة، رفيعة، ولبسها شيك… كل حاجة أنا مش عليها. مش أنا اللي عيّنتها، المدير بتاعي – مدير القسم – هو اللي قابلها في المقابلة الشخصية. بصراحة، مكنتش هعيّنها لو كنت أنا اللي عملت المقابلة.
أنا عارفة إن ده مأثر على طريقتي في التعامل معاها.
أعضاء تانيين في الفريق لاحظوا، وأكيد فاكرين إن معندهاش كفاءة في الشغل بناءً على معاملتي ليها.
كلمت مديري أنها مش شاطره في الشغل “من غيرتي منها”، وبكل أسف أنا كذبت على مديري في الموضوع ده واستغليت علاقتنا اللي بقالها أكتر من عشر سنين عشان يصدقني.
أنا متعودة أظهر بمظهر الواثقة قدام الناس اللي مش قريبين مني، فمحدش في الشغل يعرف عن مشكلة اضطراب الأكل بتاعتي أو إني بروح علاج نفسي.
محدش هيصدق قد إيه أنا فعلاً مش واثقة في نفسي.
عارفة إني محتاجة أوقف طريقتي دي في التعامل معاها، وبقول لنفسي لازم أكون أحسن، لكن أول ما بشوفها بتطلع مني الغيرة والكراهية. أعمل إيه عشان أوقف ده وأبدأ أتعامل معاها بعدل؟
🌹#تحديث
أنا اتفصلت من شغلي من أسبوعين.
عميل راح لمديري واشتكى من طريقتي في التعامل مع زميلتي.
في اجتماع الفصل، مديري قاللي بما إن الشكوى كانت مشابهة لشكوى زميلتي “اللي أنا بغير منها”، فقرر يسأل باقي الفريق.
قال إن نص الفريق شايفين إني بغير منها، والنص التاني كانوا بس فاكرين إنها مش شاطرة في شغلها.
زميلتي كمان راحت لمحامي، والمحامي كلم مديرنا والقسم القانوني.
مديري عبّر عن خيبة أمله بسبب كذبي عليه واستغلالي لعلاقتنا المهنية.
التجربة دي خلتني أدرك إنّي محتاجة مساعدة. فسخت عقد الشقة اللي كنت فيها ورجعت أعيش مع أهلي عشان آخد دعمهم. أهلي كانوا رائعين.
أنا على وشك إني أبدأ علاج لمشكلة عدم ثقتي بنفسي.
كمان بروح علاج تاني عشان أعالج مشكلة الأكل اللي عندي، والمشاكل النفسية والجسمانية، والقلق.
في تعليقات البوست بتاعي، في ناس ماكنوش مصدقين إن زميلتي اشتكت لمديري بسبب غيرتي، وكان في تعليقات زي “مين يعمل كده؟” أو “واضح إنها شايفة نفسها زيادة”.
لكن شكوتها كانت في محلها. أنا فعلًا كنت بغير منها وفعلاً أسأت معاملتها. شكوتها كانت حقيقة. هي مش شايفة نفسها زيادة، هي اشتكت من حاجة فعلاً كانت بتحصل لها.
أنا بتحمل مسؤولية أفعالي وفاهمة ليه اتفصلت. أنا أذيت شخص تاني بدون أي ذنب منها، وحرقت كل الجسور مع الشركة، وخسرت أصدقائي وضيعت سمعتي في المجال لدرجة إني مش هشتغل فيه تاني. اللوم كله عليا. أنا مكسوفة من نفسي بطريقة محدش يتخيلها.
مش عايزة أبقى الشخص ده تاني. دلوقتي بركز على صحتي، ولو الأمور مشيت كويس، مخططة أبدأ كورسات في الكلية بعد كده. هاخد الموضوع خطوة بخطوة. بس الأول محتاجة أتحسن.
آسفه على كل حاجة يا أليسون. بتمنى لكِ ولزوجك وللقطط كل خير ❤
(القصة حقيقية)
#قصص
