أنا عايزة جوزي يبعد عن صديقته كايلا فورًا، تفتكروا عندي حق ولا أنا مزوّداها قوي؟
عايزة حد عاقل ينصحني.
جوزي عنده 8 أصحاب مقربين من أيام الجامعة.
أول ما اتعرّفت على جوزي عرفني عليهم، وكانوا كلهم ودودين وعاملوني كويس، وبدأت أخرج معاهم.
الحقيقة أنا انطوائية، عشان كده طلبت من جوزي (كان لسه خطيبي وقتها) إننا نقلّل الخروج معاهم، لأن وجودي في وسط ناس بيستنزف طاقتي، وبصراحة أنا بفضّل إننا نكون لوحدنا.
بقينا نشوفهم بس مش كتير زي الأول.
بدأ أصحابه، وخصوصًا كايلا، يشتكوا إنه قلّل جدًا الخروج معاهم من وقت ما عرفني. وبدأت ألاحظ تصرفات غريبة من كايلا، يعني مثلاً لما جوزي يكون موجود تمثل قدّامه إنها لطيفة جدًا معايا، بس أول ما جوزي يمشي تبدأ معاملتها تتغير وتتجاهلني.
الموضوع كان باين جدًا! (ده غير تصرفات تانية بتتعدى فيها الحدود مع جوزي).
نرجع لدلوقتي.
إحنا اتجوزنا من سنتين، والحمد لله جوازنا سعيد وهادي.
عيد جوازنا كان الأسبوع اللي فات، عملنا حفلة وعزمنا أهلنا وإصحابنا. الحفلة خلصت والناس روّحت، بس أصحابه كملوا السهرة معانا.
قعدنا نتكلم ونضحك، وكانت التعليقات إيجابية جدًا، مدحوا جمال بيتنا، وقالوا إني مهتمة بجوزي، وإن جوزي اتغير للأحسن بعد الجواز. الدنيا كانت ماشية كويس جدًا…
لغاية ما شاور صديق على كايلا (كان مش في وعيه) وقال إنها خسرت الرهان ولازم تدفع فلوس، لأنها قالت إن الجوازة دي مش هتستمر لأكثر من سنتين!
سكتوا كلهم فجأة، بعدها بدأ حد يغير الكلام بسرعة علشان يخفف التوتر.
خليت الموضوع يعدي، مكنتش عايزة أعمل مشكلة وقتها، لكن الموضوع فضِل في دماغي.
لما أصحابه كلهم مشوا من عندنا، سألت جوزي عن الكلام الغريب اللي سمعته؟
قال لي إنه قرر يخطبني ويتجوزني بسرعة، ولما قال لأصحابه إننا اتخطبنا، الكل اتفاجأ.
كايلا قالت له إنه اتسرّع جدًا، وإني مش مناسبة ليه، وممكن أكون طمعانة في فلوسه.
ملحوظة: عيلة جوزي أثرياء جدًا، لكن أنا كمان من عيلة غنية.
وقتها، كايلا قالت لجوزي: أراهنك إن الجواز مش هيستمر لأكثر من سنتين!
حَسّيت بالغضب، وسألته بصراحة، هل كان فيه ارتباط بينك وبين كايلا؟
قال لي إنها طلبت منه أكثر من مرة إنهم يرتبطوا، لكن هو كان بيرفض.
سألته عن السبب؟
قال إن مفيش جواه أي مشاعر رومانسية ناحيتها، هي مجرد صديقة مش أكثر.
أنا غضبانة لأنها اتكلمت عليا، وطلبت من جوزي يقلل اتصاله بيها، وقلت له إني مش عايزاها تدخل بيتي مرة تانية.
جوزي اتهمني إني بكبّر المواضيع وبعمل قصة علي كلام اتقال من سنين، وإنه مش شايف أي داعي للمشكلة!
قال لي خدي وقتك وفكري بهدوء، وافتكري إنها وقفت جنبك وساعدتك وقت ما كنا بنحضر للجواز، وإنه ميقدرش يبعد عنها لأنهم أصحاب من زمان، وكمان لو عمل كده ممكن يخسر كل أصحابه.
هل أنا فعلًا مجنونة ومتسرعة؟ ولا عندي حق في رد فعلي؟
🌿 تحديث بعد 6 شهور:
كايلا لما عرفت إني زعلانة، بعتتلي رسالة طويلة بتعتذر فيها وطلبت مني نخرج مع بعض، وبعدها بدأت تقرب مني.
كنا بنروح نتغدى مع بعض في مطاعم، وبقت كل شوية بتيجي تقعد معايا في البيت، وبقينا فعلًا أصحاب مقربين.
مرة وإحنا قاعدين بنفطر، سألتها: إيه السبب اللي خلاكي تقولي إن جوازي مش هيستمر لفترة طويلة؟
قالتلي إن جوزي كان لسه خارج من قصة حب فاشلة، وكان لسه منفصل عن خطيبته السابقة (جوانا)، وكان حزين جدًا.
على فكرة، أنا عارفة إن جوزي كان مرتبط، هو كان حكيلي كل حاجة.
كايلا قالتلي إن جوزي وقتها أقسم إنه مش هيدخل تاني في أي علاقة، وبعد الموضوع ده بشهرين بس ارتبط بيا، علشان كده لما قرر يتجوزني (بعد سنة) خافت يكون اتسرع، وإنه بيعمل كده بس علشان ينسى القصة القديمة.
وكمان كايلا قالتلي إنها مكنتش تعرف إن عيلتي غنية، وخافت أكون طماعة علشان عيلة جوزي معروفة وغنية جدًا.
هي اعتذرت، وقالتلي إنها شايفة دلوقتي قد إيه إحنا مبسوطين مع بعض، وإنها أكيد كانت غلطانة لما قالت الكلام ده.
صدقتها وقبلت اعتذارها.
من حوالي شهرين، جوزي راح يحضر مؤتمر تبع شغله لمدة 3 أيام، خلّص شغله ورجع.
بعدها جاتلي رسالة من حبيبته السابقة (جوانا) على إنستجرام، بتقولي فيها إنها بتتكلم مع جوزي من شهور، وإنهم اتقابلوا في المؤتمر، وعندها استعداد تبعتلي أكتر من دليل لو أنا عايزة.
مسكت تليفون جوزي وفتحت الإنستجرام، لقيت إن جوزي عاملها بلوك!
سألت كايلا عن (جوانا) لأنها تعرفها كويس، وكانوا كلهم مع بعض في نفس الجامعة، وجوانا عندها في الأصدقاء.
عملت نفسها محقق، وقررت تساعدني، فتحت أكونت جوانا قدامي، كان أكونت مختلف عن الأكونت اللي اتبعت منه الرسايل.
شفنا صورها على إنستجرام، وأكتشفنا إنعا فعلًا حضرت نفس المؤتمر اللي كان جوزي فيه!
سألت جوزي: إنت شوفت جوانا؟
قاللي: آه، شوفتها وسلّمت عليها ووقفت معاها لدقايق.
قولتله: بس إنت مقولتليش؟
قاللي: دي كانت مجرد دردشة سريعة، و الموضوع مش مهم.
سألني عرفتي إزاي؟
قولتله: كايلا شافت صورها في المؤتمر وقالتلي.
بعدها جالي رسايل تانية من جوانا فيها لقطات شاشة لجوزي وهو بيكلمها من شهرين، وبيعاكسها، وبيتفق معاها إنهم يتقابلوا، وقالتلي إنهم كانوا مع بعض في المؤتمر لمدة 3 أيام في نفس الغرفة في الفندق!
طبعًا ما صدقتش ولا كلمة، ضحكت وقلت لها: إنتي أكيد كذابة، لأني ببساطة كنت بلعب مع جوزي لعبة أونلاين بالساعات كل يوم بعد العشاء. (إحنا متعودين نعمل كده لما بيكون مسافر، بنسهر مع بعض أونلاين ونلعب لعبة بنحبها جدًا إحنا الاثنين).
سألتها باستهزاء: وإنتي بقى كنتي بتقعدي وراه في الأوضة وهو بيلعب معايا كل يوم وفاتح الفيديو؟
حكيت لجوزي كل حاجة، قاللي المفروض كنتي قولتيلي من الأول. وأكدلي إنه متواصلش مع جوانا من وقت انفصالهم، وقاللي ممكن تتأكدي من تليفوني.
قولتله: إنا مصدقاك، ومش محتاجة أفتش في تليفونك، وأكيد “جوانا” كانت عايزة توقع بينّا.
كنا قاعدين مع أصحاب جوزي، بنحكي اللي حصل، وإزاي جوانا حاولت تخرب جوازنا.
كايلا اتدخلت في الكلام، وقالت: الحمد لله، لحسن الحظ إنك كنتي بتلعبي مع جوزك أونلاين، وإلا كنتي صدقتيها!
أنا اتصدمت من الجملة دي!
لأني ما قولتش لكايلا أبدًا على موضوع الألعاب ده، أنا قولته “لجوانا” في الرسايل لما كانت بتقولي إنها كانت مع جوزي!
لما روّحت البيت، ربطت الخيوط ببعضها وحكيت لجوزي.
كايلا هي اللي عملت الحساب المزيّف، مش جوانا!
حاسّة نفسي غبية جدًا لأنها قدرت تخدعني وأنا صدقتها!
هي بدأت تحكيلي عن جوزي وجوانا، وبعدها على طول الرسايل بدأت تجيلي.
أنا أكيد هتجنبها خالص بعد كده.
نفسي يكون عندي دليل إنها فعلاً اللي بعتت الرسايل علشان أعملها مشكلة كبيرة.
زعلت جدًا إني شكّيت في جوزي، بس فرحانة إن إحنا بنحب بعض ❤️
——
القصة مترجمة من ريديت، أصحاب القصة أجانب.
#ريديت
#حواديت_الاجانب
