هل المفروض ألغى حفل زفافي علشان خطيبي بخيل قوي؟
أنا عمري 31 سنة، بعاني من بخل خطيبي اللي عمره 32 سنة، ومش متأكدة لو كنت فعلاً عايزة أكمل معاه ونتجوز ولا لاء، رغم إننا مع بعض من 3 سنين.
أول ما تعرفت على خطيبي، كان مطلق من سنتين، علاقته بمراته الأولى كانت كارثية، أكبر سبب لمشاكلهم مع بعض ويعتبر السبب الرئيسي للطلاق كان طمع مراته الأولى فيه.
كانت بتستغله مادياً بطريقة صعبة جداً، وبتخليه يشتري لها أغلى المجوهرات، وبعدين لما يحصل خلاف بينهم ترمي المجوهرات أو تكسرها!
ده غير الأحذية المصممة مخصوص لها 👠 ملابس 👗 عربيات غالية 🚗 رحلات في بحر الكاريبي 🚢
أي حاجة نفسها فيها تعملها فوراً وتخليه هو يدفع تمنها!
حتى وقت الطلاق أخذت منه مبالغ ضخمة.
ورغم كل ده، خطيبي لسه غني جداً، بيكسب أكثر من 6 أرقام (يعني أكثر من مليون دولار في السنة)، ده غير إنه ورث ملايين من جده، كمان باباه وإخوته حطوا في حسابه البنكي ملايين الدولارات 💵
فخطيبي رغم كل اللي اتعرض له، لسه عنده فلوس كتير.
أنا تقريباً مش بطلب منه أي حاجة، أنا اللي بدفع فواتيري، وبشتري أكلي ولبسي ومجوهراتي، الحمد لله عندي وظيفة كويسة، وأعرف أصرف على نفسي كويس.
لما شفت البيت اللي عايش فيه خطيبي اتصدمت من منظره، البيت كان فاضي تقريباً، ومافيهوش غير شوية أثاث قديم.
البيت كله مافيهوش غير 3 شوك وسكينتين.
مش بيشغل الدفاية وده مخلي البيت بارد جداً وفيه عفن 😧
ده غير إنه مفيش ولا ستارة في البيت!!!
اللي عرفته إن مراته أخذت كل حاجة كانت موجودة في البيت، وهو بخيل جداً لدرجة إنه مجبش ولا حاجة جديدة.
تخيل بيت تمنه مليون دولار، ومن جوه شكله كده والمفروض إن ده البيت اللي هتجوز فيه!
حسيت إن وجودي في البيت ده قمة البؤس، وبدأت أحسن فيه شوية، اشتريت أدوات مطبخ وكراسي وكنب، وبعدين اكتشفت إن أنا بخلص كل فلوسي على بيته وهو مش بيدفع أي حاجة.
كنت بفكر أشتري ستاير كمان بس لاقيتها غالية جداً والبيت مليان شبابيك، وقتها فكرت إن خلاص مش عايزة أدفع فلوس أكتر من كده.
اتكلمت معاه وطلبت منه فلوس علشان أقدر أحسن البيت.
غضب جداً وقال لي “إنتي معايا علشان فلوسي بس”.
رديت عليه إني دفعت في بيته مبلغ كبير، حتى الهدايا والرحلات أنا اللي بدفع ثمنها، كل ده علشان أثبت لك إني مش طماعة، لكن الحقيقة لو انفصلنا هبقى أنا اللي خسرانة، أنا اللي خلصت كل فلوسي عليك!!
طبعاً هو عايز قبل الجواز يعمل عقد ما قبل الجواز (إن لو حصل انفصال مقدرش أخذ أي حاجة من ممتلكاته). أنا وافقت على العقد، بس أنا دلوقتي بقيت حاسة إنه بيستغلني.
كمان حاسة بالغيرة من مراته الأولى. لأن خطيبي طلب الجواز من مراته واتقدملها في رحلة في نص البحر 🛳 وقدملها خاتم الماس ثمنه 10.000 دولار، لكن أنا اتقدم لي بخاتم مزيف ثمنه 100 دولار 😢
وقتها كان نفسي أرفض عرض الجواز من كتر خيبة الأمل اللي حسيت بيها، ورغم كده قبلت وفضلت ساكتة علشان ما يقولش عليَّا طمعانة في فلوسه!
أي حاجة أنا اللي شارياها تبقى جميلة، لكن لو طلبت منه أي حاجة تبقى تافهة وملهاش لازمه 😩
دلوقتي أنا بفكر في تأجيل الجواز، رغم إني فعلاً بحبه، لكن كل ما أتخيل حفل الزفاف الرخيص اللي ناوي يعمله بتخنق.
كمان بفكر في أطفالنا في المستقبل وإنه ممكن يبقى بخيل معاهم، وطبعاً هلاقي نفسي مجبرة أنا اللي أدفع لأطفالي كل حاجة.
طيب لو حصل أي حاجة وسيبت شغلي، وقتها بقى هفضل اتحايل عليه وأبوس رجله علشان يشغل لي الدفاية؟!
على فكرة، هو قال لي إنه ساب البيت كده لأنه كان مكتئب وحزين لما هي أخذت منه كل حاجة.
أنا دلوقتي بفكر جدياً في تأجيل الفرح، لأنه بيعاقبني على تصرفات مراته الأولى.
🌿تحديث:
ناس كتير حذرتني في التعليقات وقالوا لي خلي بالك، ممكن يكون بيضحك عليكي، وقصة طمع مراته الأولى ممكن تكون مجرد كذبة هو مألفها علشان يداري على بخله.
لاء يا جماعة، أنا اتأكدت بنفسي إن كلامه عنها حقيقي. عيلته وأصحابه كلهم أكدوا لي، حتى حكوا لي عنها حاجات فظيعة جداً.
لدرجة إنها سرقت مجوهرات جدته بعد ما ماتت على طول، وقالت إن جدته هي اللي سابت لها المجوهرات، رغم إن الناس كلها عارفه إن الجدة كانت بتكرهها جداً.
🌿تحديث:
شكراً لكل الدعم اللي لقيته منكم، إنتوا فعلاً غيرتوا حياتي وأديتوا لي شجاعة أخد قرارات ماكنتش قادرة ولا عارفة أخدها لوحدي.
أنا بدأت أروح علاج نفسي، روحت لدكتور وهو أكد لي كل كلامكم، أنا فعلاً عندي مشكلة، وهي إني بحاول أرضي الناس على حساب نفسي. ومن غير وعي مني بحاول أعالج خطيبي علشان كده كنت مستحملاه.
ده غير إن خطيبي زرع في عقلي فكرة إن لو طلبت منه أي سنت يبقى أنا طماعة!
الدكتور بيقولي إنني من جوايا حاسة إني مستحقش أرتبط بمليونير! لإن ثقتي في نفسي ضعيفة. وكانت مسيطر عليا فكرة إني لازم أعمل مجهود زيادة عشان أستحق خطيبي.
على فكرة، وأنا بتكلم مع أخت خطيبي، كانت زعلانة عليَّا جداً وقالت لي كل كلام الدكتور حقيقي. وإن أخوها من أول يوم وهو شاكك إني معاه بس علشان هو مليونير 😢 وإنه شايف نفسه كتير على أي واحدة.
قالت لي إنها اتكلمت مع أخوها يعاملني بطريقة أحسن، وإنها كانت زعلانة لما شافت الخاتم اللي خطبني بيه.
الكلام ده زعلني قوي، وبعدها قررت إني أخد منه أجازة 6 شهور علشان أقدر أفكر في مصير العلاقة دي.
طلبت أتكلم معاه، وده كان صعب جداً عليَّا وكنت فعلاً خايفة قوي، وكمان مكنتش عايزة أجرحه.
قلت له إحنا محتاجين ناخد أجازة من علاقتنا، ومتقلقش أنا مش بفسخ الخطوبة.
عرفته كمان إنه آذاني جداً لما قال عليَّا طماعة. وإني خلاص مش مستعدة أحس بالذنب تاني لمجرد إني بطلب أبسط حقوقي.
قلت له إني مش سعيدة وإنه بيهملني، وأنا خلاص كرهت البيت اللي هو عايش فيه ده، وأعتقد 3 سنين كفاية قوي علشان يثبتوا لك إني مش إنسانة طماعة.
فضل ساكت ما تكلمش..
قلت له كمان إني خايفة أتجوزه وأخلف منه، وأطفالي يعيشوا في البخل ده، وطلبت منه يروح للعلاج النفسي.
فضل يتحايل عليَّا ويقول لي بلاش تسيبيني.
قلت له أنا بديلك فرصة تفكر.
في اللحظة دي خطيبي بدأ يعيط.
وقتها حسيت إني لازم أمشي.
تاني يوم بعت لي رسالة طويلة وقال لي:
“إن حالته النفسية وحشة جداً وإنه مش عارف ينام من إمبارح، ووعدني إنه هيتعالج وكمان ناوي يبيع البيت ويشتري بيت أصغر (دي كانت فكرتي من الأول).
قال لي إنه هيجيب كل حاجة وهيعمل لي كل اللي نفسي فيه في البيت الجديد.”
دلوقتي أنا محتارة ومش متأكدة لو كنت فعلاً عايزة أرجع له تاني!
🌿 تحديث:
بابا وماما بيساعدوني أدور على بيت كويس أعيش فيه وناويين يساعدوني بمبلغ كويس.
مفيش أي تواصل بيني وبين خطيبي حالياً..
بعد كلامنا مع بعض على طول لقيته محول مبلغ كبير على حسابي البنكي.
الموضوع ده خلاني غضبانة جداً، مفيش فايدة لسه برضه بيفكر إني معاه بس علشان فلوسه.
رجعت له الفلوس تاني وطلبت منه ما يتصلش بيه خالص الفترة دي..
أنا سمعت إنه عارض بيته للبيع وأخته بتقولي إنه بدأ يتعالج.
أنا دلوقتي عرفت إني كنت السبب في كل اللي كان بيحصلي علشان كنت عايشة دور المنقذة، وبحاول طول الوقت أرضي الناس على حساب نفسي.
🌿تحديث:
اشتريت لنفسي بيت مريح وكمان جبت كلب لطيف.
دلوقتي أنا عارفة كويس إني أستحق راجل محترم يعاملني بأسلوب كويس، وبفكر في كل الحاجات اللي تخليني سعيدة ومرتاحة.
أنا دلوقتي عارضة فستان فرحي للبيع، رغم إنه كان عاجبني قوي وكنت بحلم أشتريه من زمان علشان كده زعلانة وأنا ببيعه.
انفصلت عن خطيبي.
بصراحة الانفصال كان صعب وكنت حزينة ومكنتش عايزة أجرحه، أنا بجد حبيته قوي.
أكيد هاخد وقت علشان أرجع تاني زي الأول. وبتمنى فعلاً ألاقي شريك حياة مناسب، وأعيش معاه حياة سعيدة، وبتمني له هو كمان كده.
دلوقتي أنا مكتفية بكلبي وبعيط وأنا حاضنة الفرو بتاعه.
……….
القصة مترجمة من ريديت، أصحاب القصة أجانب.
