مش عارف ايه اللي حصل؟ 🐕
“أوتيس” كلب عنده 3 سنين. احنا اتبنيناه من الملجأ لما كان عمره سنة.
طول عمره حنين جدًا، ومراتي هي “حبيبتة المفضلة”، بس الفتره الاخيرة الموضوع زاد قوي.
أوتيس كلب بيتبول أسود كبير، ودانه وذيله مقطوعين (اتبنيناه كده!). إحنا عارفين إنه عباره عن كتلة مشاعر وحنية، بس الناس مش عارفه كده، عشان كده دربناه كويس جدًا إنه ما يبقاش “مخيف”، ويكون مؤدب، ما ينطش على حد ولا ينبح علي الناس ويخوفهم.
بصراحة التصرفات اللي ظهرت دي غريبة جدًا عليه!
من أسبوعين، مراتي تعبت وجالها عدوى في المعدة. وكانت حاسة بغثيان وتعبانة قوي.
أوتيس في العادي بيزعل جدًا عشانها (مرة اتخانقنا وكانت زعلانة مني، والله كان بيبصلي بنظرات مخيفة 😂). خلال فتره تعبها، ماكانش عايز يسيبها خالص ولا حتى عشان يطلع يتمشى. إحنا كنا شايفين الموضوع لطيف!
دلوقتي مراتي بقت أحسن بكتير، بس هو لسة متعلق بيها. أكتر بكتير من العادي. شكله اتعود إنها تكون في البيت طول اليوم (عشان كانت واخده اجازه الاسبوع ده)، أنا حاسس أن بقه عنده قلق الانفصال.
لو مراتي راحت الحمام، بيقعد يعيط قدام الباب. ولو خرجت للشغل، يقعد مكتئب جنب باب البيت لحد ما ترجع.
ولما ترجع البيت، كل اللي عايزه إنه يفضل لازق فيها طول الوقت. الموضوع بجد بقي مزعج (يعني بصراحة نص الوقت مزعج، والنص التاني لطيف 😅).
النهارده بليل وهما ماشيين في الجنينة، كلب تاني جري عليهم. بمجرد ما الكلب قرب من مراتي، أوتيس بدأ يطلع أنيابه وينبح وكان عدواني جدًا! هو أول مره يعمل كده.
إحنا بنحاول نفهم إيه اللي بيحصل. لو دي بداية مشكلة عدوانية، عايزين نحلها من الأول.
هنكلم الدكتور البيطري بكرة علشان نعمل كشف ونتأكد إنه مش بيعاني من أي ألم. ممكن يكون بيعبر عن وجعه بالطريقة دي؟
بصراحة إحنا محتارين. ومش عارفين لو بنبالغ ولا فعلا في حاجه مش طبيعية.
هل حصل مع أي حد إن كلبه فجأة بقي متعلق جدًا أو عدواني؟ أي نصيحة هتبقي مهمة، حتى لو كنا بنبالغ ! 🙏
🌿تعديل:
حد قالي إن مراتي ممكن تكون حامل. هي نايمة دلوقتي، بس هقولها واخليها تعمل الاختبار الصبح.
يمكن كلبنا هو اللي يربي الطفل، واضح إنه طلع أذكى مننا إحنا الاتنين 😂
🌿تعديل:
مراتي طلعت حامل! 🎉🐾
شكرًا على النصايح والكلام اللطيف!
🌸قصة جديدة:
أنا عمري (28 سنة) ومراتي (26 سنة) احنا مع بعض بقالنا 4 سنين، علاقتنا كانت كويسة قوي. بس الاسابيع اللي فاتت بقه في بينا توتر جامد.
إحنا الاتنين بنشتغل كتير جدًا، عشان كده بقينا عصبيين ومزاجنا وحش. خصوصًا مراتي، بقت علي طول مش طايقة نفسها ولا طيقاني.
وبقالها كام يوم بتتنرفز ومش طايقة الأكل اللي بطبخه.
أنا اللي بعمل الفطار، وبجهز الغدا، والعشا.
كل ما أقف عند البوتاجاز، تبدأ تشتكي من ريحة الأكل وتقول إن الريحة وحشة جدًا. وشايفه أني بستخدم مكونات بايظه!! وكمان بتقول إن طعم الأكل وحش ومش بتكمل أكلها أصلاً.
الموضوع ده خلاني أتعصب. أنا مش شيف محترف، بس بصراحة أنا متأكد اني شاطر في المطبخ، وهي بتتكلم عن الأكل كأنه كارثة!!
زمايلي في الشغل جربوا أكلي. وقالولي إنه ممتاز ومفهوش حاجة.
قلت يمكن بسبب الضغط اللي هي فيه في شغلها عايزه تفرّغ غضبها في أي حاجة، يمكن عشان كده بتضايقني وعلي طول عصبية. مش عارف بصراحة.. بس الصبح خرجت عن شعوري لما اشتكت تاني من الأومليت اللي كنت بعمله.
قمت واخدت البيض ورميته في الزبالة، وقلتلها تعمل فطارها بنفسها بقى، وإني مش هطبخ لها تاني طالما هتفضل تتدلع وتشتكي من كل حاجة بعملها.
انتهى الموضوع بخناقة وخرجنا للشغل وإحنا متضايقين من بعض.
هي دلوقتي زعلانة مني ومارجعتش البيت، وأختها اتصلت بيا وبتقولي أني غلطان عشان مش عايز أطبخ لها تاني، خصوصًا وأنا عارف إنها بتشتغل كتير وأوقات ما بيكونش عندها وقت تجهز أكل لنفسها.
مش فاهم إزاي الموضوع كبر كده، بس أنا قاعد في البيت دلوقتي بفكر إذا كنت فعلا غلطان عشان اتعصبت وقلتلها كده.
بصراحة أنا زعلان عشان بتقول علي أكلي وحش.
هي عمرها ما اشتكت منه قبل كده.
أنا شايف أن طالما الأكل مش عاجبها، يبقى تطبخ هي لنفسها. هل أنا غلطان؟
🌿تحديث:
يا نهار أبيض، فيه ردود كتير أوي! 😅😅 ومعظمها بيقول حاجة بديهية بس أنا ما فكرتش فيها لحد ما انتو قلتوها.
هي اتصلت بيا تاني يوم واعتذرت. قولتلها أني شاكك انها حامل.
اتقابلنا وعملت التحليل.
طلع عندكوا حق…..مراتي فعلا حامل! 🎉
(القصة مترجمة من ريديت..أصحاب القصة أجانب).
