مرات ابني مش عايزاني اشوف حفيدتي الجديده!!!
انا عمري 50 سنه، ابني اللي عمره 31 سنه اتجوز من (بيا) الي عمرها 24 سنه.
ابني اتعرف عليها سنه 2020 و بسبب الظروف وقتها للاسف ما اتعرفتش عليها كويس قبل ما يتجوزها.
انا بحب ابني جدا، بس حاسه ان علاقتي ب ابني متوتره من وقت جوازه، هو عنده بنت عمرها 10 سنين من جوازه سابقه، من وقت ما اتجوز ( بيا ) وعلاقتي بحفيدتي مش زي الاول ابدا.
حفيدتي مش بتزورني كل اسبوع، اتكلمت معاهم كتير في الموضوع ده وفي الاخر بشوفها مره واحده في الشهر (هما اصلا اخدوها من عندي فجأه من غير ماحد يبلغني قبلها).
حتي لما حفيدتي بتيجي لاحظت انها مش قريبه مني زي الاول، اعتقد ان (بيا) بتقولها عني حاجات مش حلوة وطبعا ده ظلم.
(بيا) حامل و جالها تسمم حمل علشان كده كان لازم تولد بسرعه، اخدت ابر علشان تولد طبيعي وفضلت تحاول لمده 3 ايام، وفي الاخر ولدت قيصري.
انا حاليا ماعنديش عربية (في التصليح)، اتصلت بأبني اكثر من مره علشان يجي ياخدني و احضر الولاده واشوف حفيدتي الجديده، رفض يسيب المستشفي ويجي.
رغم ان حماته وحماه كانوا موجودين طول الوقت مستنيين في الجراج تحت المستشفي.
اتصلت ب ابني تاني، وهو بيكلمني كانت مراته خلاص بتولد وسمعتها بتصرخ عليه يقفل التليفون!!!
قفل المكالمه فعلا، ورفض يرد عليا بعد كده، انا كنت بس عايزه اطمن انهم بخير.
بعد الولاده فضلت (بيا) في المستشفي 3 ايام كمان
وهما راجعين بيتهم مافكروش حتي يعدوا عليا علشان اشوف حفيدتي الجديده، وحجتهم انها بتتألم دلوقتي ومش حاسه بالراحه، مع انها اكيد واخده مسكنات.
انا شاكه انها عندها اكتئاب مابعد الولاده.
بنتي راحت تزورهم ومعاها طلبات من السوبر ماركت واشترت معاها الادويه اللي ابني طلبها منها علشان مراته (باين كده ان بنتي وبيا علاقتهم ببعض كويسه)
كان المفروض ازوهم بعد يومين من خروجها من المستشفي، بس هي اصرت انها لسه تعبانه وحاسه ان في حاجه غلط، و راحت للدكتور وهو حجزها في المستشفي تاني، ابني بيقولي ان الدكتور شخص الحاله انها تسمم بعد الولاده.
بس انا مش مقتنعه بالكلام ده نهائي، انا متأكده ان التسمم بيحصل في الحمل بس و بعد الولاده بيختفي
علشان كده انا متـأكده ان الدكتور ده غلطان او ابني مخبي عني حاجه.
تاني يوم من دخلوها المستشفي كان مر علي الولاده 5 ايام، في الوقت ده كان كل الناس شافوها ماعدا انا
علشان كده اتصلت بيها علشان اعرف ايه اللي بيحصل ده؟؟
ده غير ان اليوم ده كان عيد ميلادي، علشان كده اتصلت بيها الساعه 8 علشان افهم هما بيعملوا معايا كده ليه!!!
(بيا) ماردتش علي مكالمتي.
بعد شويه ابني اتصل وقالي كل سنه وانتي طيبه وبعدين سألني انتي اتصلي علي (بيا) ليه؟
بصراحه صرخت فيه وقولتله لازم مراتك تكلمني لاني اتصلت بيها وهي ماردتش علي مكالمتي، وقفلت السكه في وشه.
بعد شويه (بيا) كلمتني، قولتلها كان المفروض تتصلي بيا، واني كنت عايز أسمع صوتها وأعرف منها إيه اللي بيحصل لأن ابني مش بيوضحلي حاجه.
بعدين سألتها اذا كانت محجوزه بسبب مشكله نفسيه ولا جسديه؟ فسكتت شوية وبعدين قالت جسديه
سألتها انتي متأكدة؟ ردت عليه بنبرة عصبية وسخرت مني! (اتريقت انها مجنونة وبتشد في شعرها).
مردتش على طريقتها في الكلام لأني عارفه إنها متوترة.
تاني يوم خرجت (بيا) من المستشفي، عدوا عليا علشان يزوروني قبل مايروحوا بيتهم علشان اشوف البيبي، انا وقتها كنت عند بنتي براقب اولادها الاتنين
بعد اسبوعين، ابني جه يزورني واخدني معاه لبيته علشان اشوف حفيدتي، قعدت معاهم كام ساعه
(بيا) كانت ساكته ومش بتحاول تتكلم معايه خالص
لما ابني رجعني بيتي سألته هي ليه مش مرحبه بيا؟
قالي اني كنت قليله الذوق معاها لما كانت في المستشفي و لما صممت انها لازم تتصل وكمان سألتها هي مشكله نفسيه ولا عضويه، واني غلطانه علشان اعلنت علي الفيس بوك عن ولاده البيبي قبلها.
دلوقتي ابني مش بيزورني كتير و بيقولي انه محتاج يكون مع مراته لانه بيساعدها في رعايه البيبي.
انا قولت لابني اني ناويه اسيب شغلي علشان اكون فاضيه اراعي الاطفال وهي ولا مره حتي فكرت تشكرني اني هعمل كده!!!
بصراحه حاسه انها بتعمل حجج فارغه علشان تبعدني عن ابني واحفادي، انا عايزه يكون بيني وبينها علاقه كويسه، بس مش عارفه ازاي اسامحها علي الوقت الي ضيعته ده كله وانا بعيده عنهم.
انا دلوقتي بفكر ابعت لها رساله اشرح فيها كل مشاعري واتناقش معاها بس عارفه ان في اختلافات ثقافيه بينا هي اللي عامله المشكله دي.
تنصحوني اقولها ايه؟؟؟
🌹تحديث:
طيب، انا اعتذرت لابني عن كل الحاجات اللي اشتكي منها وقولتله يبلغ مراته اعتذاري. بعدين استنيت بس مفيش اي رد جالي من (بيا)، لا شكرتني ولا حاولت تصالحني ولا اي حاجه.
علشان كده يوم الجمعه اللي فات حجزت مع محامي علشان نتكلم في حقوق الاجداد (اخد حضانه مشتركه معاهم للاطفال)، المحامي قالي اني عندي فرصه كويسه بالنسبه لحفيدتي الكبيره، لكن بالنسبه للطفله الجديده الموضوع صعب.
المحامي خلاني كتبت شويه اوراق علشان يبدأ الاجراءات، بس بصراحه بليل راجعت نفسي وقررت اتصل بصاحبتي واخد رأيها في الموضوع، قولتلها تفتكري انا بتصرف صح؟
قعدنا نتناقش وبعد المكالمه كنت بفكر اوقف الموضوع.
امبارج جاتلي الرساله دي من (بيا) :
“انا عرفت من صديقه انك اتكلمتي مع محامي علشان حقوق الاجداد، كمان عرفت كل الكلام اللي قولتيه عني، اولا انا عمري ما منعت عنك البنات، و مش انا اللي مانعه عنك ابنك، هو راجل كبير كفايه ولو عايز يتواصل معاكي هو حر، انتي ماطلبتيش تيجي تزورينا تاني، واكيد انتي مش متوقعه مننا نقرأ افكارك ، او نسيب كل الي ورانا ونجري عليكي
احنا عندنا طفله جديده محتاجه رعايه وعندنا التزامات في حياتنا، انا ماتكلمتش معاكي في اللي حصل وقت الولاده وبعدها، علشان بصراحه ما عنديش طاقه اتجادل معاكي.ابنك قالي انك اعتذرتي وانا قولتله اني مقدره اعتذارك ، رغم اني شاكه انه اعتذار حقيقي ، انا دلوقتي مش فاضيه لكل الدراما دي. وعلي فكره اللي قولتله وانا تعبانه كان مؤلم
لاني كنت فعلا بتألم والموضوع عضوي بعيد خالص عن صحتي النفسيه.
وبما انك قررتي ترفعي قضيه يبقي خلاص مفيش بينا اي اتصال بعد كده وكل التعامل بينا هيكون عن طريق المحامي، وانا خلاص حذفتك من الفيس بوك
ومش مسموحلك تنزلي اي صوره للاطفال تاني علي وسائل التواصل، في ورق رسمي بالكلام ده هيوصلك في نهايه الاسبوع، ومتتوقعيش ان يوصلك منا اي صور او مكالمات تاني.
بتمني تكوني فاهمه انك اكيد هتخسري القضيه بنسبه 100% بيتك مش مناسب ان الاطفال تعيش فيه
لانك هتكوني محتاجه تنجحي في اختبار ***
و لما تخسري القضيه مش هنرجع نتواصل معاكي تاني
انتي للاسف الي ضيعني فرصتك انك تبقي جزء من حياه احفادك لما قررتي تتهوري وتعملي كده بدل ما تتكلمي معانا بشكل طبيعي وبهدوء”
حاولت اتصل بيها علشان اقولها اني كنت ناويه اغير رأيي ومش هكمل في القضيه بس هي مش بترد علي مكالماتي ولا علي رسايلي شكلهم فعلا حظروني.
كلمت ابني علشان اقوله علي اللي مراته قالته
قالي انه عارف كل حاجه وان الكلام الي مراته كتباه الطف كتير من الكلام اللي كان عايز يقوله.
دلوقتي انا هبعت الرساله دي للمحامي علشان يعرف اد ايه هي مش عايزه تتعامل معايه ولا عايزه تسامحني، بتمني القضيه تخلص بسرعه علشان علي الاقل اعرف اشوف حفيدتي الكبيره.
🌹ملحوظه
انا مش عاجبني الرسايل المزعجه والتعليقات السلبيه الي عماله توصلني منكم، انا عارفه اني غلطت، وده الحل الوحيد قدامي دلوقتي.
لكن الردود واضح ان كلها جايه من ناس صغيره في السن و مش من الجيل بتاعي، لكن الناس اللي في سني وعندهم احفاد ومن ثقافتي هما بس الي هيفهموني.
حاجه كمان هي بتقول اني لازم انجح في اختبار****
انا اصلا بستخدم المواد دي لمشكله طبيه عندي.
بس انا هبطلها تماما علشان ماكونش متورطه في اي حاجه.
والناس الي بتسأل ليه بنتي أم افضل من (بيا)؟
لان (بيا) مش من عرقنا ولا ثقافتنا وشعر البنات مختلف تماما عن شعرها، وهي مش عارفه تهتم بشعر حفيدتي لانه بيحتاج عنايه خاصه والنتيجه ان البنت شعرها علي طول فوضوي، وده طبعا اهمال.
🌹انتهت الرساله.
وعلشان ريديت كله اوضه وصاله زي ما احنا عارفين حد بعت الرساله ل (بيا)
زوجه الابن قررت ترد عليها وبعد كده حذفت الرساله بس الناس كانوا اخدوا منها نسخه قبل الحذف.
زوجه الابن (بيا) قالت:
🌿ان العيله كلها وقفت ضد حماتها.
🌿حماتها قررت تنتقم واتصلت بقسم حمايه الاطفال وقالت انهم مجوعين البنت الكبيره ومهملين الرضيعه .
🌿للاسف الشرطه قبضت علي ابنها، طبعا عملوا تحريات واكتشفوا ان البلاغ مش حقيقي و الاب خرج
لما صاحبه المشكله (حماتها) اتنازلت عن القضيه اتحايلت علي ابنها انهم يتصالحوا وفعلا وافق و زارها في عيد الام بس برضه حصلت خلافات تانيه وهي قالتله انها هتشيله من وصيتها (هي اصلا ماعندهاش فلوس كتير).
🌿بنتها (عمه البنات) مش عاجبها تصرفات مامتها.
🌿وفي الاخر قرر الابن ومراته يروحوا بيت جديد خالص.
🌹صاحبه الرساله عملت تحديث جديد:
بعد ما الناس بعتتلي لينك رساله اعتقد انها من مرات ابني، قريت شويه من الكلام الي كان صعب عليا
حاسه اني وجهه نظر ( بيا ) في الاحداث ساعدتني اغير طريقه تفكيري.
علي فكره انا اتظلمت جدا، لان الناس علي ريديت من الجيل الجديد وناس قليله من الجيل بتاعي هما اللي فاهموني وقالولي اني مش غلطانه وان الجيل ده مش بيقدر قيمه العيله.
رحت بيت ابني وللاسف كان فاضي، انا فعلا كنت خايفه من ده لما قريت رساله مرات ابني والتعليقات.
عرفت ان البيت معروض للبيع، والظاهر كده ان في مشتري للبيت.
دلوقتي انا مش قادره اعرف هما نقلوا فين
بحاول اعرف اسم الشركه اللي اشتروا منها علشان اعرف اوصل للبيت الجديد.
سألت جارهم وقالي انهم نقلوا من فتره.
انا دلوقتي بتابع مع معالج نفسي علشان يساعدني.
عارفه ان الناس هنا اتعاطفوا مع مرات ابني
بس ابني عمره ماكان هيعمل كده من نفسه
مراته هي اللي بتتحكم فيه وبتحركه بمزاجها
انا بعترف اني غلطانه في حاجات ويمكن فعلا زودتها شويه علشان كده ابني قرر يبعد عني، انا المفروض كنت اتعامل بهدوء.
المعالج نصحني اخد شويه وقت قبل ما اعمل اي حاجه تاني، بس دلوقتي انا بفكر اجمع فلوس اكثر علشان اعين محقق خاص يدور علي ابني، علشان نرجع نتواصل تاني وارجع الثقه بينا، واقدر اخليه يخرج من تأثير مراته عليه.
مره تانيه انا معترفه اني كنت غلط في حاجات وكنت عنيده، اه اللي عملته مش صح، بس مش مستاهل كل الي حصل.
كمان الناس الاشرار بس هما اللي بيستخدموا الاطفال كورقه ضغط.
اخيرا عايزه اقول للشخص الي اخد رسالتي وبعتها لمرات ابني انت غلطان.
