للاسف اتعاملت بغباء مع ابنه صاحب الشركه ودلوقتي انا مهدد بالفصل من الشغل!!!
الاحداث دي حصلت يوم الجمعه
وانا طول الاسبوع كنت غرقان في احزاني و دلوقتي انا مجبر ادور علي وظيفه جديده
#حواديت_الاجانب
كنت بشتغل في شركه لمده 3 شهور
انا حاليا لسه في مرحله الاختبار
وظيفتي في المبيعات والاعلانات
علشان انا لسه جديد تم تكليفي باداره الحسابات الي بتتعامل بالفعل مع شركتنا , وظيفتي اني احاول اقنعهم يدفعوا فلوس اكثر في الاعلانات
انا عندي رغبه كبيره اني اتعين رسمي في الشركه
وعلشان اعمل كده لازم اثبت كفائتي وقدرتي واني فعلا استحق التعيين
كل حاجه كانت ماشيه كويس لغايه الاسبوع الي فات
الشركه كانت منظمه فعاليات , علشان احنا المكتب الرئيسي , كل الموظفين في كل فروع الشركه اتجمعوا عندنا في المكتب اليوم ده
نادرا لما صاحب الشركه بيزور مكتبنا , بس هو كان موجود اليوم ده علشان يحضر معانا وكان معاه ايمي بنته (من ذوي الاحتاجات الخاصه)
زميلي في الشغل قالي ان ايمي بتشتغل في مكتب فرعي في شركتنا
وقالي ياريت تكون لطيف معاها
حاسيت ان الموضوع بديهي , اكيد مش محتاج حد يقولي النصيحه دي
انا اصلا لطيف مع الناس كلها
شوفت ايمي
تصرفاتها كانت طفوليه , وحاسيت انها بتعاني علشان تقدر تعبر عن نفسها
كمان عندها مشاكل في المهارات الحركيه (مش بتعرف تتحرك او تمسك الحاجات كويس)
روحت اعمل لنفسي قهوه
و ايمي كمان كانت واقفه بتحاول تعمل لنفسها كوبايه قهوه
حاسيت انها بتعاني علشان تقدر تحط البن وتقفل الغطاء
علشان كده سألتها بأدب لو محتاجه مساعدتي؟
وافقت علي المساعده وشكرتني
وبعدين قالتلي انها اصلا بتكره القهوه بس والدها بيجبرها تشربها علشان تكون مركزه اكثر , كانت بتتكلم بصوت عالي
ابتسمتلها , وقولتلها القهوه مهمه اكيد
سلمتها الكوبايه
شكرتني مره تانيه , وراحت للمكتب الي والدها قاعد فيه
حاسيت وقتها اني راجل صالح وكملت يومي عادي
بدأت الشركه في عمل اختبارات , اتقسمنا مجموعات , علشان نعرف مين الفريق الاشطر او الاسرع
بدأنا ب “لعبه الغاز” و ايمي كانت مشاركه معانا
وقتها هي ماكنتش في مجموعتي علشان كده ماكنش فيه اي تواصل بينا
في النهايه فريقي وفريقها الاتنين خسروا
اخر نشاط في اليوم كنا متحمسين ليه
المدير طلب مننا قائمه بالعملاء المحتملين
والمفروض ان كل 3 افراد يعملوا مجموعه , ونحاول نبتكر طريقه نقنع بيها العميل بالشراء , لازم نلاقي افكار تكون فعلا جذابه للعميل .
المديرين قالوا ان الحكم علينا هيكون بناء علي ابداعنا
ومن حقنا نعمل صور , لوجو , اغاني , اي حاجه احنا عايزينها
المفروض ان كل واحد يشتغل لوحده الاول , وبعدين نتجمع مع بعض كفريق ونتناقش في الافكار قبل ما نقدمها للمدير
انا عارف ان الموضوع ده مهم فعلا
لان الافكار لو فعلا كويسه هما هيستخدموها مع العملاء وده معناه اني خلاص اتثبت في شغلي
فكرتي كانت تلحين اغنيه
الفت الكلمات وسجلتها بصوتي
كانت سخيفه بس انا عارف انها مناسبه للعلامه التجاريه
لما خلصت ساعدت افراد مجموعتي وخلصنا كل المطلوب
بعد ما كل الفرق انتهت من العمل
اتجمعنا كلنا في غرفة المؤتمرات الكبيرة علشان نشوف شغل بعض , وكل واحد يقول رأيه في شغل الفريق التاني
كان موجود صاحب الشركه معانا وبيراجع شغلنا
هو كان بيعلق علي الشغل او الصور والقصص
واحنا كمان بنقول رأينا سواء سلبي او ايجابي
كان في اعمال رائعه واخدت مدح كبير وتعليقات ايجابيه من الكل
واعمال تانيه كانت سيئه وضحكنا كلنا عليها
كان باين علي الاعمال السيئه ان مفيش فيها ابداع , او الي عملها مش مهتم يبتكر حاجه حلوه
عادي مفيش اي حد موجود كان باين عليه انه مضايق او منزعج من التعليقات
شغلوا اغنيتي والناس كلها علقت عليها
مش كل التعليقات كانت ايجابيه , بس عادي اتقبلت كل الردود بابتسامه
بعدها حاسيت براحه اكثر اني اعلق علي زمايلي واقول رأيي في شغلهم بصدق
بعدها اتعرض رسم بدائي جدا
ضحت علي الرسمه
قولت علي الاقل اغنيتي كانت احسن من ده
هو الي رسم الرسمه دي طفل عمره 3 سنين………. و قعدت اضحك
فجأه لاقيت الكل ساكت………… حاسيت بالارتباك
غريبه من لحظات كان كل الناس بتعلق وتضحك , ايه الي حصل فجأه!!!!
كان في اشخاص بيبصولي بأشمئزاز
صاحب الشركه قال…..اوك
لو ماعندكش حاجه كويسه تقولها , ياريت تحتفظ برأيك لنفسك
رئيسي في الشغل قالي ياريت تمشي وتروح مكتبك دلوقتي
بدأت الم ورقي , وقتها لاحظت ان ايمي كان وشها احمر جدا وبدأت في البكاء
رجعت المكتب و فاهمت ان الرسمه الي علقت عليها كانت ل ايمي 😮
للاسف مفيش اي حد حذرني , و احنا ماكناش نعرف هويه الاشخاص واحنا بنقييم الاعمال
حاسيت بالحزن وبعد ما الكل خلص , روحت بسرعه لصاحب الشركه علشان اعتذر
باختصار طردني من الشركه 😢
المدير قالي اني مش مناسب للعمل
ماقالش بصراحه السبب
بس طبعا هو مش محتاج يقول , الموضوع واضح جدا
لان قبلها علي طول كانوا بيمدحوا شغلي
المدير ما ادنيش اي فرصه للاعتذار
واتصل بالامن
وجم علشان يكونوا معايه وانا بلم اغراضي وبمشي 😢
بعد ساعه واحد من زمايلي في الشغل اتصل بيه وقالي تعالي اشرب حاجه معانا في الكافيه , روحت , زمايلي قعدوا يعتذرا ان محدش حذرني قبلها
وقالولي انهم هيساعدوني ادور علي وظيفه جديده
الي فاهمته ان ايمي دايما بتحضر في الاجتماعات دي
ودايما رسمها بيكون بدائي كده وواضح انه يخصها , هما كلهم عارفين ومتعودين يعلقوا علي رسموتها تعليقات لطيفه وخلاص الموضوع بيعدي
بصراحه حاسيت بالانزعاج جدا علشان محدش فيهم قالي من الاول
قالولي ان ايمي بتشتغل في مكتب فرعي وهي تقريبا مش بتعمل حاجه طول اليوم , بس المديرين بيحاولوا يشغلوها في اي حاجه , علشان لما بتكون فاضيه بتحسس بالملل , وان زمايلها الي في المكتب بيحسوا انهم جليسه اطفال ل ايمي علشان بس تبعد عن والدها وتسيبه يخلص شغله
قالولي كمان ان باباها قرر يتنقل لمكتب تاني بس هي رفضت تروح معاه المكتب الجديد لانها اتعلقت بالناس الي في المكتب القديم
الي يعرفوه كمان ان باباها كان بيضايق الرجاله العزاب الي في المكتب وبيجبرهم يخرجوا مع ايمي في مواعيد , وطبعا الموضوع ده غير لائق والاداره كانت رفضاه , بس هو صاحب الشركه وقال ان ايمي نفسها تتخطب وتتجوز جدا , وهي علي طول مش بتتكلم غير في الموضوع ده
زمايلي بيقولوا ان اكيد والدها هو الي زرع الفكره دي في دماغها وهما بيعتقدوا ان ايمي اكيد مش هتفكر في الجواز والاطفال من نفسها
واحد من زمايلي ضحك وقال بس والله دي مش فكره سيئه
الي هيتجوز ايمي هيورث الشركه لان ايمي هي الطفله الوحيده للراجل العجوز
بصراحه كان مزاجي مش حلو خالص وزعلان علشان كده اعتذرت واستأذنت امشي
زمايلي اعتذروا مره تانيه وقالوا انهم فعلا هيساعدوني ادور علي شغل احسن…………
في نهايه الاسبوع ايمي بعتتلي طلب صداقه علي فيس بوك
بصراحه ماقبلتش الطلب
انا عارف اني جرحتها , وكمان خسرت وظيفتي بسببها
جزء مني عايز يقبل الصداقه واعتذرلها وبعدين اعملها حظر
بس انا مش متأكد لو كنت عايز اعمل كده
🌹#تحديث
كل الردود نصحتني اقبل الطلب وصاحبي كمان قالي كده
اوك انا هعمل كده
انا مخطط اني ابدأ الكلام باعتذار , لو ردت عليه يبقي كويس
لو مفيش رد يبقي خلاص انا عملت الي عليه
🌹#تحديث
شكرا لكل حد قالي اقبل الطلب واتجوز ايمي وانتقم من صاحب الشركه و اكون انا الوريث😂 انا ضحكت علي التعليقات بس اكيد مش هعمل كده
ناس قالولي اخد اجراء قانوني
للاسف مش من حقي اعترض لاني كنت لسه في مرحله التدريب
ومن القانوني انهم يستغنوا عني في الوقت ده
(ديف) اقرب صاحب ليه هو الي اقنعني اقبل طلب الصداقه
قالي انه يعرفني كويس وعارف ان شعور الذنب مسيطر عليه ولازم اعتذرلها
اوك………….
اول ماقبلت الطلب بعت رساله ل ايمي وقولتلها
“مش المفروض اسخر من شغل اي حد , وده اكيد مش احترافي , واعتذرت”
مر وقت وبعدين ايمي ردت…..
شكرتني علي اعتذاري وقالتي انها ارسلت الطلب علشان هي الي عايزه تعتذرلي لاني خسرت وظيفتي بسببها
قولتلها مفيش داعي للاعتذار
كانت بتتأخر جدا في الرد عليه
بعد كده بعتتلي رساله الظاهر انها منسوخه كان مكتوب في الرساله
“مرحبا انا ايمي ارجوك سامحني علشان بتأخر في الرد عليك , انا اتعرضت للاصابه في المخ لما كنت طفله علشان كده بحتاج وقت طويل علشان اقدر اكتب الكلمات”
قولتلها مفيش مشكله انا هستني لما تكتب براحتها
قعدت اتكلم انا وايمي لغايه الساعه 3 الصبح
لاء ما وقعتش في حبها……..
ولاخرجت معاها في ميعاد غرامي…………
ومش هتجوزها علشان انتقم من ابوها ولا علشان اورثه 😂
بس انا عايز اكون صديق ايمي , مش شفقه عليها
بس لانها فعلا انسانه لطيفه واي حد يتمني يكون في حياته صديق زيها
اتكلمنا في حاجات كتير
اتجرأت وسألتها علي حاجات شخصيه لانها كانت مرتاحه في الكلام و مش متحفظه معايه
ايمي اتعرضت لحادث سياره لما كانت طفله
كانت في السياره مع مامتها , وللاسف كان في سواق تاني مش وعيه خبط سيارتهم , يومها كانت راجعه من حفله عيد ميلاد صاحبتها
للاسف مامتها اتوفت😢
ومن وقتها وهي حصلها كده
الاصابه اثرت علي المخ وعلي الحركه
علشان كده هي بتعاني علشان تعرف تلبس او تعمل القهوه
الناس قالولها انها بتعاني من اعاقه ذهنية
علشان كده والدها كان بيوديها مدرسه خاصه بالحالات دي
خلصت ثانوي وكانت عايزه تدخل الجامعه
بس والدها رفض وقال ان دي مش فكره كويسه
عانت كتير في حياتها لانها مش بتعرف تقول الكلمات كويس, علشان كده بتلاقي صعوبه في التواصل مع الناس وبتفضل السكوت
قالتلي انها لما عرفت اني خسرت شغلي
زعلت قوي وحاولت تتكلم مع باباها بس هو ما اهتمش بالموضوع
قالتلي انها عارفه ان الناس كلها بتتظاهر انهم معجبين برسمها
بس في ناس معاها في المكتب فاهمين حالتها وبيحبوها بجد
هي حاسه بالاحباط علشان مش بتعرف تشتغل كويس
بس بتفرح لما بتاخد شغل حقيقي وبتعمله
وده بيكون افضل ليها من وجودها في البيت طول اليوم لانها بتحس بالملل
قالت انها بتحب والدها بس احيانا بتحس انها عبيء عليه
هو طول اليوم بيشتغل ومش فاضي يرد عليها او يكلمها وده بيعملها احباط
الوقت اتأخر وقفلنا مع بعض
بس من كلامي معاها في الرسايل فاهمت ان حكمي عليها انها طفله مش حقيقي , انا قولت كده علشان صوتها احيانا بيكون عالي
بس اكتشفت انها لما بتكون سعيده او متحمسه بتعلي صوتها
لكن هي في الحقيقه انسانه واعيه مش طفوليه ابدا……..
تاني يوم اتكلمنا تاني
وبنتابع مع بعض مسلسل وبنتناقش في احداثه
ايمي للاسف عايشه لوحدها
المفروض ان باباها معاها في نفس البيت
بس ده مش بيحصل
هو علي طول موجود في بيت تاني , وهي سألته لو في ست في حياته بس هو انكر
ايمي عندها مربيه بتزورها مره واحده كل اسبوع
هي بتقول انها مش محتاجه مربيه هي بتقدر تطلب الي هي عايزه من الانترنت و بتحاول تعتمد علي نفسها
اعتقد انها بتروح المكتب لانها فعلا بتفتقد باباها
الكلام مع ايمي ممتع بجد
هي عايزه تساعدني , وفعلا قدرت تكتشف اكثر من وظيفه مناسبه ليه
قررت ارتاح باقي الاسبوع ومن اول الاسبوع الجديد ان شاء الله هبدأ رحله البحث عن الوظيفه الجديده
خلاص اكيد مش هعمل اي تحديثات جديده, علي الاقل انا حاسس ان دي نهايه سعيده
انا حاليا عندي صديقه كويسه جدا 😍😍
#ريديت
#قصص
