في واحد معجب بيه وصرحلي عن مشاعره , وقالي ان انا لفت نظره وان هو حاسس ان هو مشدود ليه جدا.
وبصراحة انا كمان فرحت لان انا كمان كنت حاسة ان انا معجبة بيه.
بس المشكلة ان الموضوع وقف على كده هو بعد كده ما جاش قالي هو هيخطبني امتى؟
وسايب الموضوع كده مفتوح وانا تعبت وحاسة ان انا مش عارفة راسي من رجلي
وعايزاه بقى يبدأ يتحرك ويعمل خطوة رسمي ويخطبني من اهلي. اعمل ايه؟
بنات كتير عندها نفس المشكلة دي وبتكون فعلا محتارة ومش عارفة تعمل ايه.
اول حاجة قبل ما اقول لك اي كلام, لازم تكوني فعلا من جواكي متأكدة ان هو ده الزوج المناسب ليكي.
يعني مش عشان هو بس قالك ان هو معجب بيكي او ان هو بيحبك
خلاص انت قررتي ان انت تتخطبي له !
لازم تفكري كويس جدا هل فعلا الرجل ده مناسب لك؟
هل فعلا هو ده اللي هيقدر يسعدك؟
ولا ممكن يكون عنده مشكلة كبيرة او عيب مثلا في شخصيته انت بعد كده ما تقدريش تتحمليه؟
طيب خلاص انا سألت وعرفت واتأكدت مليون في المية ان ده فعلا الانسان المناسب لي.
ازاي بقى اخليه ييجي يتقدم لي؟
اول حاجة لازم تبقي عارفة هو ناوي على ايه.
يعني في بنات كتير تيجي تسألني وتقولي انا مكسوفة اسأله ناوي تخطبني امتى.
طبعا ده غلط. انت لازم تقعدي معاه وتسأليه باسلوب كويس كده.
لو سمحت قل لي انت ناوي ان شاء الله على ايه.
او الخطوة الجاية ان شاء الله هتكون امتى.
طيب سألتيه وخلاص
والاجابة ان هو ان شاء الله ناوي يتقدم لك او حدد ميعاد معين.
ما تقعديش بعد كده بقى تستخدمي اسلوب الالحاح. ده غلط كبير برضه.
مش كل شوية بقى زن هتيجي امتى؟هتيجي امتى؟
لا هو قالك او حددلك وقت محدد خلاص بلاش الالحاح عليه كل شوية.
طيب لو هو فعلا انسان كويس وناوي فعلا ان هو يتقدم رسمي , لكن عنده ظروف مادية منعاه ان هو يجي دلوقتي؟
وصرح لك عن ان ده السبب في تاجيل خطوه الخطوبه رسمي
اول حاجة حاولي ان انت تحمسيه وتشيلي منه الاحباط.
هو ممكن يكون عنده احباط كبير جدا ان هو صعب جدا ان هو يجيب شقة دلوقتي او يجيب مصاريف الجواز.
انت بقى حاولي انك تدي له امل
قولي له ممكن جنب شغلك تدور على شغل تاني.
او ممكن حتى تفتح مشروع اونلاين وهتكون تكلفته بسيطة. ومع الوقت ان شاء الله المشروع اكيد هيكبر وهيكون عندك دخل اضافي.
ولازم تعرفيه كمان ان انت موافقة جدا على الظروف الماديه
ومفيش مشكلة ان انت تصبري معاه.
يبقى خلاص انت كده عرفتي نيته ان هو فعلا عايز ان هو يتقدم لك.
رقم اتنين وضحتيله انك ممكن تستحملي ظروفه المادية.
رقم تلاتة بقى بلاش ان انت تكوني متاحة له طول الوقت , يعني ايه؟
يعني مش وقت ما يحب انه يشوفك ينزل يشوفك.
مش وقت ما يحب ان هو يكلمك يكلمك.
وتخليه يتعامل معاكي على اساس ان انتم خلاص اثنين مخطوبين.
لان ده هيخليه مش هياخد خطوة رسمي.
هو كده كده بيشوفك وقت ما يحب , وبيكلمك وقت ما يحب.
طيب ايه اللي هيخليه بقى يزيد المسؤولية ويروح يتقدم لك رسمي؟
كمان مش من حقه ابدا انه ياخد حقوق مش بتاعته. بمعنى ايه؟
يعني بقى ما يقعدش يتحكم فيكي , تروحي البيت الساعة كام
وتيجي الساعة كام ؟ومتكلميش دي ,وما تعمليش مش عارفة ايه.
وبرضه يتعامل معاكي على اساس ان انتم مخطوبين. ده طبعا ممنوع وغلط.
حاجة كمان اوعي تسمحي له ان هو يتجاوز معاكي
ويمكن قلت لكم قبل كده ان عملوا دراسة على رجالة اجانب , ونتيجه الدراسه ان الرجاله مش بيفضلوا ان هم يرتبطوا بالبنت اللي حصل ما بينهم تجاوزات.
وبأكد على ان دي دراسه اتعملت على رجالة اجانب. ما بالك بقى بالراجل الشرقي؟
فطبعا ده غلط وكمان حرام
هتقولي طيب انا خلاص للاسف وقعت في المشكلة دي , وهو بالفعل واخد رقم تليفوني من زمان , وبكلمه من فتره وبخرج معاه اعمل ايه؟
بايدك ان انت توقفي ده.
عارفة الراجل بيقع في حب مين وبيتمنى فعلا ان هو يتجوزها ؟
بيقع في حب البنت اللي بيخاف ان هو يفقدها
فانت لازم توصليه للحاله دي.
يعني ممكن تروحي تتكلمي مع والدتك وتحكيلها,
وقوليله انا خلاص اتكلمت مع ماما ووعدتها ان مش هيكون في بيننا اي كلام او مقابلات غير لما يكون في فعلا حاجة رسمي ما بينا ونفذي فعلا القرار. ومتخافيش
في بنات كتير بتخاف ان هي تاخد الخطوة دي ,تقولي اصل ممكن ان هو يسيبني
او ان هو بعد كده ميكلمنيش
انت وقتها هتقدري تعرفي هل البني ادم ده فعلا جد معاكي ولا كان بيتسلى؟
صدقيني لو بيحبك مستحيل ومش هيقدر ان هو يبعد عنك .
لكن لو ما صدق وبعد عنك يبقى هو من الاول مكنش جد. وانتي وقتها هتقولي الحمد لله انك مضيعتيش وقت اكتر مع انسان مكنش ناوي على الخير.
وانا ما بقولكيش يعني انك تروحي تعملي معاه مشكلة اكيد لاء
انت هتقولي له ان انت مستنياه وان انت عارفة ظروفه ما عندكيش مشكلة.
لكن انت هتستنيه لما فعلا يكون جاهز وهيقدر ييجي ياخد خطوة رسمي وقبل كده مش هيكون في بينكم اي تجاوزات او كلام او مقابلات
لو انتم مثلا زمايل في الشغل او في الدراسة وكده كده كل يوم بتتقابلوا. طبعا زي ما اتفقنا هتخلي في بينكم حدود في العلاقة.
حاجة كمان حاولي توصليله ان انت فعلا الزوجة المناسبة ليه. طيب هعمل كده ازاي؟
هتعملي كده ان انت تكوني محافظة على شكلك الجميل
انت ما تكونيش نكدية ,انك ما تعمليش مشاكل كتير مع الناس اللي حواليكي
انك ما تكونيش نمامة وتقعدي تتكلمي على ده وتتريقي على دي (طبعا ده في حاله ان انتوا بتشتغلوا في مكان واحد او بتدرسوا مع بعض)
وبلاش الصوت العالي والزعيق لازم يعرف فعلا ان انت بنت كويسه جدا
وانه فعلا مش هيقدر يلاقي اي بنت مناسبة ليه اكثر منك
وكمان يا ريت ان انت تعرفيه ان هو الزوج المناسب ليكي.
يعني وقت ما تقوليله ان انا مستنياك لازم تقوليله
انت اه هتكون زوج فعلا مناسب ليه, وان انا فعلا شايفة فيك مواصفات كويسة .
وان احنا ان شاء الله اكيد هنكون زوجين مناسبين لبعض
بأكد عليكي تاني مفيش كلام في التليفون ولا مقابلات.
وطبعا كل بنت بتحلم بالخطوبة وبتحلم بالفستان الابيض عشان كده طول الوقت بتتمني ان الشخص اللي بتحبه فعلا ياخد خطوه ويتقدم لها.
لكن الرجالة كتير بتخاف من الخطوة دي بسبب تلات حاجات.
بسبب اول حاجة الخوف من المسئولية.
بسبب انه بيخاف انه يفقد حريته
وبسبب كمان المشاكل المادية
كل ما وصلتيله ان انت هتسهلي عليه الموضوع وانك مش هتحمليه انتي او اهلك اي اعباء مادية كتير.
كل ما اديتيلوا حريته وماحولتيش تخنقيه .
كل ما شافك بنت فعلا مميزة
كل الحاجات دي هتخليه فعلا يحس انه ما يقدرش انه يستغنى عنك وهيجي على طول بسرعة يتقدم لك ويخطبك ويتجوزك ان شاء الله.
اشترك في قناه جنتي علي اليوتيوب من هنا
اقرأ ايضا
10 اسرار لتكوني انثي اكثر جاذبيه ساحره تأسرين قلب زوجك وتغار منك جميع البنات
10 علامات تفضح حُب الرجل❤ دلائل وقوع الرجل في حب المراة كاملة
