كيفية اختيار شريك الحياة وهل الشكل مهم في اختيار الزوج؟
في الفيديو اللي فات عملت كده مقدمة عن البنات اللي بتخاف من الارتباط. واتكلمت كمان عن جواز الصالونات. والنهاردة ان شاء الله هكمل نفس الموضوع. ايه هي الاسس اللي على اساسها بختار شريك الحياة ؟
كيفية اختيار شريك الحياة وهل الشكل مهم في اختيار الزوج؟
وطبعا زي ما انتم عارفين الموضوع فعلا مهم جدا. البنات نفسها كمان تفكيرها بقى مختلف. يمكن من كتر ما بنسمع وبنشوف المشاكل حوالينا ده اللي بيخلينا نفكر كويس جدا قبل ما ناخد قرار الارتباط
ايه هي اسس اختيار شريك الحياة حسب كلام علماء النفس وكمان علماء الدين
اول حاجة الراحة النفسية.
علماء النفس بيقولوا لنا ان موضوع الراحة النفسية ده مهم جدا جدا. لازم تسألي نفسك كويس اوي
انا لما بشوف الشخص ده او بقعد معاه بحس براحة نفسية ولا مش بحس بكده؟
في حديث شريف بيقول (ان الارواح جنود مجندة ) وكل ما كانت روحك نقية كل ما قدرتي فعلا تحددي هل انت فعلا روحك مرتاحة للشخص ده ولا لا
وقدرتي برضو تعرفي هل فعلا هو من جوة انسان كويس ولا مش كويس؟
فلازم تسألي نفسك هل لما بقعد مع الشخص ده بحس بانجذاب ناحيته ولا بحس بنفور منه؟
لان طبعا مستحيل ومينفعش ابدا اتجوز واحد مش حاسة بالراحة معاه.
في سؤال بيتكرر كتير جدا جدا.
هل الشكل مهم في اختار شريك حياتي ولا مش مهم؟
طبعا اجابة السؤال ده بتختلف من شخص للتاني.
في ناس بتقول لا انا ما اقدرش مثلا اتنازل عن شكل معين. وفي ناس تانية بتقول مش مشكلة الشكل بالنسبه لي.
انا رأيي الشخصي ومن تجارب الناس اللي حواليا انا بقول ان الروح فعلا او الراحة النفسية فعلا اهم من الشكل.
كان في مرة واحدة بتحكي وبتقول انا بحب والدي جدا جدا
ومرة وانا قاعدة كده بتكلم مع حد , سألني سؤال استغربت جدا اني مش عارفة ارد عليه.
السؤال كان هو والدك عنده شنب ولا ما عندوش؟
بتقولي انا اتفاجئت ان انا بجد مش عارفة وقعدت افتكر كده. هو بابا عنده شنب ولا ما عندوش؟
هو ده فعلا اللي بيحصل لمعظم الناس , انا ببقى بحب شخص جدا لكن خلاص من كتر ما انا بحبه موضوع الشكل ده خلاص مع الوقت مش بركز فيه قوي.
بشوف الشخص اللي قدامي فعلا من جواه والشكل الظاهري ده خلاص بيبقى مجرد تعود.
يعني هقول لك على حاجة انت ممكن في اول العلاقة وممكن غصب عنك تقعدي كده
تبصي علي لون عنيه, شكل شعره طوله وهكذا.
وتقعدي تقولي لنفسك , لا انا كان نفسي في شكل تاني.
لكن لو انت فعلا حسيتي براحة نفسية مع الشخص ده. وقررتي انك تكملي , صدقيني بعد فترة بعد شهور بعد سنة. هتلاقي نفسك ناسية خالص موضوع الشكل.
وده طبعا رأيي الشخصي ممكن تتفقي فيه معايا او تختلفي مفيش مشكلة.
تاني حاجة مهمة جدا هي تحمل المسئولية.
هل الشخص اللي انا هرتبط به ده فعلا يقدر يتحمل مسئوليتي ولا لا
طبعا زي ما احنا عارفين ان الجواز مسئوليته كبيرة جدا والست بيكون عليها اعباء وضغوطات ملهاش نهاية.
والراجل برضه بيكون عليه مسئوليات وحاجات كتير. وانا دوري كست ان انا اعمل المسئوليات بتاعتي انا وبس
لما ارتبط بشخص ما عندوش تحمل المسؤولية هلاقي نفسي فجأة بقيت ست وراجل والحياة فعلا وقتها بتكون مستحيلة.
علشان كده نقطة تحمل المسؤولية دي نقطة مهمة جدا ولازم تركزي فيها.
واقعدي كده وفكري واسألي نفسك
هل لو انا احتاجت الشخص ده في اي موقف؟
هل فعلا هيكون معايه ولا هيخذلني؟
احنا الستات بنمر علينا اوقات كتير قوي وقت ضعف وبنكون محتاجين فعلا حد يحتوينا. هل الشخص ده فعلا وقت ضعفي ممكن يتحمل مسئوليتي؟
ولا هيرمي كل الاعباء عليه وانا اللي هبقى مسئولة عن كل حاجة.
حاجة كمان لازم يكون في توافق بينكم في القيم والاهداف والطباع.
يعني ما كونش انا في حتة وهو بعيد في حتة تانية خالص
لازم كمان تبقي عارفة هل الحاجات اللي بالنسبة لك عيب وحرام؟ بالنسبة له برضه عيب وحرام ولا لا؟
هل اهدافكم في الحياة قريبة ولا بعيدة جدا؟
يعني لو انت مثلا بنت طموحة بتتمني تكملي دراستك , عندك اهداف في الحياة عايزة تحققيها
هل هو هيسيبك تدرسي او تشتغلي او تكملي؟
ولا هيقول لك لا ما عنديش الكلام ده. والست تقعد في البيت؟
او العكس لو انت مثلا انت مش حابة انك تشتغلي وبتحبي ان انت تقعدي في البيت وتهتمي ببيتك وكده. وهو لا عايز واحدة تكون بتشتغل. وقتها بتحصل المشكلة.
في مثل شوفته قدامي لبنت كانت محتشمة مش بتلبس بنطلونات وبتلبس طرح طويلة , اتخطبت لشاب وبعدين اتفاجأت ان خطيبها بيقول لها اعملي حسابك بقى في هدوم قصيرة عشان لما نخرج في شهر العسل وكده وتقلعي الطرحة!
هنا القيم مختلفة تماما. هي في حتة وهو في حتة تانية خالص. وطبعا البنت رفضت وما كملتش.
عشان كده نقطة التكافؤ دي مهمة جدا جدا.
علماء الدين بيقولوا لنا لما ييجي يتقدم لنا شخص نخلي بالنا كويس جدا من دينه واخلاقه.
وعلى فكرة الاتنين مش حاجة واحدة. الاتنين حاجتين منفصلين.
بمعنى دينه يعني ان هو مثلا ممكن يكون ملتزم وبيصلي وبيصوم وبيعمل الفرائض اللي علينا. يبقى هو كده دينيا ملتزم
تمام, يبقى اللي انا شرحته ده الدين
ملحوظه : على فكرة العلماء كمان بيقولوا ان الانسان اللي بيلتزم بالصلاة بيقدر يلتزم كمان بحاجات تانية كتير. لكن اللي بيكسل عن حاجة مهمة جدا زي الصلاة بيكسل برضه عن حاجات تانية كتير.
لكن الاخلاق بقى حاجة تانية يعني ايه؟
يعني انا ممكن اكون متدين مثلا ان انا ملتزم بالصلاة. لكن في حاجة في اخلاقي مش حلوة
مثلا ان انا اكون عصبي زيادة عن اللزوم. او انا بخيل. فامينفعش اخد واحد بس عشان هو بيصلي.
لأ لازم اخد بالي من الاتنين. الدين وكمان الاخلاق
حاجة مهمة جدا الاحترام.
وعلى فكرة الاحترام بجد اهم من الحب.
لان ممكن اتنين يكونوا فعلا بيحبوا بعض لكن من كتر ما هم ما بيحترموش بعض الحب بيروح.
والعكس صحيح ممكن اتنين يكون في بينهم قبول بس او اعجاب لسة ما وصلش لدرجة الحب.
لكن عشان هم بيحترموا بعض مع الوقت فعلا هيحبوا بعض.
وعلى فكرة نقطة الاحترام دي بتبان جدا وقت الخلاف.
اول ما تحصل مشكلة هل فعلا بتقدروا تتواصلوا مع بعض ؟ ولا علي طول بتلاقيه زعق مثلا وغلط فيك ,او ابتدى بقى انه يقفل السكة في وشك والحاجات دي اللي بتقلل من احترامك؟
لو هو بيتعامل بالاسلوب ده يبقى مفيش ما بينكم احترام وده للاسف مؤشر خطر جدا!
حاجة مهمة كمان المستوى المادي.
هل هو فعلا يقدر على متطلبات الجواز ولا لا؟
واحنا هنا مش بنقول يعني ان هو لازم يبقى مليونير. بس على الاقل يكون متاح الحد الادنى.
لان على فكرة في حالات كتير انفصال بتحصل بسبب موضوع الماديات.
وعلى فكرة لو خطيبك مستواه المادي قليل لكن على الاقل يقدر يفتح بيتمفيش مشكلة.
بس مهم كمان ان هو يكون طموح.
انه ميكونش مستسلم للوضع اللي هو فيه ,وانه خلاص مفيش امل ,وانه مقرر يفضل طول عمري كده.
معظم البنات طبعا بتحب الشخص الطموح واللي عنده تطلعات لمستقبل افضل ان شاء الله
فانا بقول لك مش لازم ان هو يكون مستواه المادي عالي جدا , بس على الاقل يكون يقدر ان هو يفتح بيت وان هو كمان يكون طموح.
حاجة كمان مهمة جدا الاهل.
اهله بيتعاملوا معاكي ازاي؟
هو نفسه بيتعامل مع اهله ازاي؟
واهلك انت كمان رأيهم ايه فيه؟
وخلي بالك معظم الجوازات اللي كان الاهل رافضين فيها الشخص للاسف بنسبة كبيرة بعد كده فعلا بتفشل
والبنت او الست بتعرف بعد كده ان رأي اهلها فعلا كان سليم.
في الاخر بقى في صفات كده معظم البنات بتفضلها في الرجالة
و طبعا بتختلف من واحدة للتانية
بس معظمنا بنحب الراجل الحنين اللي يقدر يحتويني
الكريم , اللي دمه خفيف وهكذا
انا كده خلصت عايزة كل بنوتة بقى تكتب لي تحت كده ايه مواصفات شريك حياتها. والفيديو اللي جاي ان شاء الله هكمل نفس الموضوع وهقول لك ايه الصفات اللي لو ظهرت في خطيبك ده مؤشر للاسف خطر.
