سمعت جوزي بيتكلم عليا مع أصحابه وبيقول..😢
أنا ست مش جميلة، كنت دايمًا كده، وأعتقد إني اتأقلمت على ده خلاص.
أنا قابلت جوزي من أربع سنين، هو عمره 30 سنة، وأنا عمري 28.
جوزي هو أعظم حاجة حصلت لي في حياتي 😍
هو بيقولي على طول إني جميلة، وبيكرر ده طول الوقت. طريقته معايا كانت صادقة، وأنا كنت مصدقاه، لأني كنت بحس إن الكلام طالع حقيقي من قلبة مش مجرد مجاملة وخلاص.
(طريقته مختلفة عن طريقة ماما، اللي بتقولي إني جميلة علشان بس تجاملني).
امبارح، أصحاب جوزي كانوا عندنا في البيت. هم أصحاب من ثانوي ومتعودين يتجمعوا عندنا كل شهر، علشان يتكلموا ويلعبوا ويتسلوا مع بعض.
أنا كنت في المطبخ اللي في الدور اللي فوق، بحضر لهم مشروبات ووجبات خفيفة. سمعتهم بيتكلموا، وبصراحة، اتصنت عليهم (عارفة إن ده مش صح، بس بجد ما كنتش متعمدة).
فهمت إنهم بيتكلموا عني، وكان فيهم اتنين بيتريقوا على جوزي بسببي، وتحديدًا كانوا بيتريقوا على شكلي 😮
وسمعت واحد فيهم بيقول إن جوزي أحلى منها بكتير.
الكلام كان هزار بهدف الضحك، بس جوزي غضب جدًا وانفجر في أصحابه، وقال لهم:
اسكتوا… أنا عارف إن مراتي وحشة… لكن اسكتوا… أنا سعيد معاها.
أنت يا (جيم)، هل البنت الساذجة اللي خرجت معاها الأسبوع ده بتخليك سعيد؟ زي ما أنا سعيد مع مراتي؟
وأنت يا (ديف)، قولي على مرة واحدة بس خرجنا فيها مع بعض وبطلت تشتكي من مراتك؟
جوزي قعد فترة يتكلم ويدافع عني قدام أصحابه.
لكن الكلمة الوحيدة اللي كانت عمالة تدور في دماغي:
أنا عارف إنها وحشة… أنا عارف إنها وحشة.. 😢
الكلمة دي كسرتني قوي، ومش عارفة ليه؟ طول عمري عارفة إني مش جميلة، بس جوزي ما كانش لازم يقول عني كده 😢
ده كان طول الوقت بيقولي إني جميلة وبيتكلم بصدق، لدرجة إني كنت فعلًا مصدقه إني جميلة في نظره.
قعدت أعيط، وجريت على الحمام علشان محدش فيهم يسمع صوتي، وحبست نفسي لمدة ساعة.
لما خرجت، ما كانش فيه حد من أصحاب جوزي في بيتنا، مشوا بدري عن كل مرة. كانوا متعودين يسهروا لوقت متأخر عن كده.
رُحت أنام وما اتكلمتش مع جوزي خالص، مش قادرة أتكلم ولا أقوله إني حزينة ومكسورة 😢
أنا عارفة إن دفاعه عني كان لطيف وصادق، والمفروض أفرح علشان جوزي بيحب روحي مش شكلي، بس ده مش مهم بالنسبة لي، أنا عايزة أحس إني جميلة في نظر جوزي.
كنت ببكي طول اليوم، مش عارفة أتكلم معاه، أقوله إيه؟
جزء مني عايز يصرخ في جوزي، عايزة أقوله بأعلى صوتي “انت كذاب”، وجزء تاني عايز يهرب من كل ده، عايزة أنسى إن حتى أحسن راجل قابلته في حياتي بيقول عليا وحشة 😢
▪️ تحديث:
قررت أواجه جوزي وأقوله إني سمعته.
لما رجع من الشغل، قلت له عايزة أتكلم معاك، وقلت له إني سمعت كلامه مع أصحابه.
بدأ يعتذر فورًا، وقال لي دول شوية أغبياء ومتخلفين، وإني كان لازم أقوله من الأول إني زعلانة.
كان نفسي أقاطع كلامه، وأقوله كلام كتير.
كنت عايزة أقوله إن دفاعه عني جرحني، لأنك طول الوقت كنت بيقول عني جميلة، لكن قدام أصحابه قال عليا كلمة تانية.
وانه للأسف مش صادق معايا، واد ايه حسيت بالخيانة لأنه قال عليا الكلمة دي من ورا ظهري.
بس للأسف، بكيت جامد، وما عرفت أعبر عن مشاعري كويس بالكلام، رغم إني كنت ناوية أقول كل الكلام اللي جوايا.
جوزي كان رائع معايا، فهمني، وحضني، وحاول يهديني.
بعد دقيقة، جوزي اتكلم، وقال لي آسف أنا كنت غضبان، ومكنتش أقصد، أنا بس دافعت عنك بطريقة غلط.
وقال لي أنا شايفك جميلة، حتى لو العالم كله شايف غير كده.
بعدها، أخدني لجهاز الكمبيوتر بتاعه، وفتح إيميل كان باعته لكل أصحابه. (الإيميل اتبعت يوم الأحد الصبح، والمشكلة كانت يوم السبت بالليل).
جوزي كان كاتب لهم:
“انتوا اتجاوزتوا الحد قوي، وكلكم شوية أغبياء. ولازم تشوفوا حد تاني تتجمعوا عنده، لأني خلاص مش هرحب بيكم تاني في بيت مراتي”.
اعتقدت إن كلمة “بيت مراتي” هتبان وكأني بتحكم في جوزي، بس جوزي ما اهتمش بشكله قدامهم، وكان عايز يبين إن اللي عملوه غلط جدًا في حقي. 😍
لما شوفت الرسالة، كنت سعيدة علشان دافع عني قدامهم مرة تانية، وخصوصًا إنه المرة دي ما قالش الكلمة اللي بتزعلني ❤
أعتقد إنه فعلًا في المرة الأولى ما كانش يقصد، هو بس ما عرفش يختار كلامه بطريقة صح.
بعدها قال لي استني هنا شوية، وهجيلك.
رجع تاني ومعاه ظرف، وقال لي إنه كان ناوي يهاديني بيه في عيد الميلاد، بس مش مشكلة، وقتها يجيب لي هدية تانية.
رفضت، وقلتله لاء، خلاص، بجد مش مشكلة، خلينا نستنى، بس هو أصر.
الهدية كانت رحلة!
جوزي رتب رحلة في أول السنة الجديدة لمنتجع صحي وفندق في كندا. الموضوع بجد كان مذهل! وقتها عرفت إنه دفع فلوس كتير علشان يرتب للرحلة.
أنا عارفة الميزانية كويس، ومتأكدة إن جوزي مش معاه مبلغ كبير كده علشان يدفع ثمن رحلة زي دي!!
سألته: جبت الفلوس منين؟
قال لي إنه بيخطط للرحلة دي من أكثر من سنة، وكان بيشيل جزء من مصروفه الأسبوعي، وبيجمع الفلوس من غير ما ألاحظ، من باقي السوبر ماركت والكلام ده. 😂
أوقات بقول أنا فعلًا ما أستحقش جوزي، أنا بجد بعاني من أزمة، وهي: إزاي أتعامل مع راجل زيه 😍
جوزي بجد راجل جميل.
عزمني على العشاء النهارده، لازم أروح أجهز بسرعة ❤
________________
(القصة مترجمة من ريديت، أصحاب القصة أجانب).
