حماتي اتعمدت تأذي بنتي بطريقه فظيعه
بتقولي اني بكبر الموضوع علي الفاضي!!!
بتقولي اني بكبر الموضوع علي الفاضي!!!انا عمري 27 سنه
متجوزه وعندي بنت اسمها (اني)
جوزي عمره 31 سنه , و بنتي عندها سنه وشهر.
قرر جوزي اننا نقضي عيد الميلاد السنه دي عند اهله
واتفقنا اننا هنسافر قبل الكريسماس بكام اسبوع
علشان حمايا وحماتي يقضوا وقت كويس مع بنتنا
حمايا وحماتي عايشين في مكان بعيد عننا ب 12 ساعه
فعلا سافرنا ووصلنا عندهم وكل حاجه كانت ماشيه كويس
***(علي فكره انا وحماتي كان في بينا قبل كده في الماضي خلافات علي اسلوبي في تربيه بنتي , حماتي كانت بتنتقدني علشان بستخدم الحفاضات
وبشتري لبنتي اكل من السوبر ماركت , وهي عايزاني مقدمش لبنتي غير اكل طبيعي وبس)
عدي كام يوم من وقت وصولنا عندهم
وبعدين روحت انا و جوزي نشتري هدايا الكريسماس من مول بعيد عن البيت حوالي ساعه , حمايا كمان كان معانا…
(تريش) حماتي قالت انها هتقعد في البيت وانها سعيده علشان هنسيب (اني) معاها.
عدي كام ساعه وخلصنا شراء الهدايا ورجعنا البيت
(اني) كانت نايمه علي بطانيه غريبه مش بتاعتها!!!
سألت حماتي عن البطانيه
قالتي ان صاحبتها جابت البطانيه هديه.
استغربت قوي لان البطانيه باين عليها قوي انها قديمه ومبهدله 
عدي اسبوعين وكل حاجه كانت تمام
تريش كانت حريصه انها تعمل كل الاكل بتاع (اني) بنفسها في البيت
وقالت انها عايزه تعود البنت علي الاكلات المغذيه
بصراحه كنت مضايقه من تدخلها , والبنت مكنتش حابه الاكل , بس قولت خلاص كلها اسابيع و هرجع بيتي وكبرت دماغي.
عدي عيد الميلاد
وتاني يوم (اني) كانت مش مرتاحه ومش بتبطل عياط ومضايقه من حاجه
حاسيت انها سخنه , قيست حرارتها واكتشفت ان حرارتها عاليه.
راقبتها كام يوم والحمد لله بدأت حرارتها تنزل
بعدها بيوم بدأ يظهر علي بنتي طفح جلدي و حبوب علي دراعها ورجليها!
جهزت نفسي ولبست بنتي علشان نروح لدكتور
لما حماتي شافتني سألتني رايحه فين؟؟؟
قولتلها علي الحبوب الي ظهرت للبنت
ابتسمت حماتي ابتسامه غريبه , وقالتلي مفيش داعي للقلق ده مجرد (جدري مائي)
قالت كده من غير حتي ماتبص علي الطفح الجلدي الي عند بنتي!!!
قولتلها وانتي عرفتي ازاي؟؟؟
قالت بمنتهي البساطه ان حفيد صاحبتها كان عنده (جدري مائي) من كام اسبوع
علشان كده طلبت من صاحبتها انها تلف الطفل المصاب بالبطانيه
وتخليها تلمس وشه وايده ورجله , و بعدين تجيبلها البطانيه البيت!
في اللحظه دي مكنتش مصدقه الي سمعته
قولتلها قصدك علي البطانيه الي كانت (اني) نايمه عليها؟
قالتي اه … هي
في اللحظه دي محستش بنفسي
علشان اكون صريحه معاكوا انا مش فاكره كويس انا قولتلها ايه
لاني كمان كان بقالي اكثر من يوم مش نايمه كويسه علشان سهرانه مع بنتي التعبانه
كل الي فكراه اني قولتلها (هو انتي انسانه طبيعيه؟)
في الوقت ده جوزي وحمايا ادخلوا بينا وحاولوا يهدوا الدنيا
وهي كانت مصره انها مش غلطانه وان الجدري المائي افضل شيء طبيعي ل (اني) علشان تكون مناعتها قويه في المستقبل!!!
***(انا اصلا كنت ناويه ازور الدكتور لما بنتي يكون عمرها سنه ونص علشان تاخد تطعيم الجدري , لانها لسه واخده تطعيم الحصبه , وانا اساسا ملتزمه جدا بجدول التطعيمات)
ركبت مع جوزي العربيه وروحنا للدكتور الي أكد انها فعلا بتعاني من الجدري
قالي لازم تقصي ضوافر البنت , وكمان احط علي ايدها لما تنام بلاستر طبي علشان ياعيني متعورش نفسها جامد في مكان الحبوب
لان ده ممكن يعملها ندوب تفضل موجوده علي جسمها العمر كله
وانا راجعه مع جوزي من عند الدكتور , بدأ يدي اعذار لمامته وانها بتعمل للبنت الافضل ليها من وجهه نظرها!!!
مكنتش مصدقه انه بيدافع عن مامته وفضلنا نتعارك طول الطريق.
ياعيني (اني) كانت بتعور نفسها , لبستها جوانتي علي ايديها علشان تبطل تهرش في الحبوب.
حاولت حماتي تتكلم معايه
قولتلها ابعدي عني خالص
المفروض كنا نقعد لاخر الاسبوع
بس انا جهزت الشنط علشان نمشي بكره الصبح
انا غضبانه قوي لدرجه اني حتي مش قاده افكر
كل ما اسمع صوت (تريش) بتتحرك في المطبخ قلبي بيدق جامد, وببقي عايزه اخرج واشدها من شعرها
مش عايزه اشوفها مره تانيه ولا عايزاها تقرب من بنتي تاني
مش عارفه اقولها ايه هي وجوزي علشان تحس بمدي فظاعه الي عملته…….
#تحديث بعد حوالي شهرللاسف الامور ساءت
صحيت تاني يوم وكنت مجهزه كل حاجه علشان نمشي
بدأت ادخل الشنط في السياره , و في الوقت ده المفاتيح كانت في جيبي.
وانا بجهز نفسي
كان جوزي قاعد مع مامته وباباه في المطبخ بيشربوا قهوه وكأن مفيش اي حاجه حصلت
لحسن الحظ (اني) كانت نايمه شيلتها براحه , ودخلتها في السياره بهدوء
قولت لجوزي تمام انا مستعده للسفر خلاص كل حاجه جاهزه
في الوقت ده جوزي قفل علي بنتي في السياره (قفل السياره مركزي)
ويعتبر حبس (اني) جوه!!!
قولتله انت بتعمل ايه؟؟؟
قالي اننا مش هنمشي غير لما اعتذر ل (تريش)
انا من الذهول منطقتش ولاكلمه
قعد يعيد نفس الكلام الي قالوهولي امبارح
ان تريش كانت فاكره ان ده الافضل للبنت , و ان الجدري مش بيقتل
وانه مش هيسمحلي اتكلم مع مامته بطريقه مش كويسه
ولازم قبل ما امشي اعتذر علشان نتصالح كلنا ونرجع زي الاول وميكنش فيه بينا اي خلافات!!!
وقتها كل الي كنت بفكر فيه هو انت اتجوزت راجل بالغ
ولا غلطت واتجوزت طفل عمره 9 سنين!
قولتله افتح السياره علشان امشي
رفض بشده وسابني ودخل جوه البيت وقالي انه مستنيني لغايه ما اهدي واعقل!
***(في الوقت ده شنطتي الشخصيه كانت جوه السياره مقفول عليها
اعتقد انه كان فاكر ان مفاتيجي جوه في الشنطه)
لكن لحسن الحظ المفاتيح كانت في جيبي
طلعت اجري علي السياره فتحتها وماشيت بسرعه…………
طبعا مليون اتصال من جوزي وتريش وحمايا
وبعديها بدأت اتصالات من ماما وبابا واختي (جيس)
انا واختي قريببن من بعض قوي
بعتلها رساله قصيره حكيتلها كل الي حصل
جالها ذهول لما عرفت التفاصيل
بعد فتره لما وصلت للطريق المفتوح وقفت السياره و كلمت اختي
فهمت من كلامها ان جوزي قالها اني مجنونه ورعبت تريش وخطفت البنت
ماما وبابا واختي قالولي انهم هيتحركوا ويقابلوني في نص الطريق
علشان ابدل معاهم لان صعب عليه جدا اسوق 12 ساعه لوحدي.
لما شوفتهم كنت ممتنه ليهم جدا لدرجه اني كنت منهاره و عماله ابكي
الايام الي بعد كده (اني) كانت مريضه جدا
وانا كنت سهرانه معاها طول الليل
البنت كانت بتفضل تبكي لحد ما تخلص كل طاقتها
وطبعا كانت بتخدش الحبوب (بتهرش فيها جامد) , وانا خايفه انها تعمل علامات تفضل عندها طول العمر
بعد كام يوم رديت علي مكالمه جوزي
بدأ يلومني و يقولي انه مبقاش عارف انا مين , قفلت في وشه…
كنت متوقعه انه هيرجع قريب
ومستعده اصلح العلاقه بشرط ان (تريش) تفضل بعيده عني.
بعدها بكام يوم حمايا بعتلي رساله ان (تريش) تعبانه جدا وفي غرفه الطواريء
وان جوزي هيفضل معاها يرعاها , وهيكمل شغله من البيت من الانترنت.
جوزي لسه قاعد مع مامته
(علي فكره المرض الي جالها ليه علاقه بالجدري المائي, هي كمان اتصابت بمرض جلدي اسمه الهربس النطاقي)
انا متأكده ان تريش بتقدم دلوقتي لابنها وجوزها عرض تمثيلي كويس جدا يستحق الاوسكار
انا مستنيه جوزي يرجع
واعتقد اننا هنتكلم بشكل جد جدا في كل الي حصل………
قصص
قصص واقعية
قصص مكتوبة
قصص قبل النوم
قصص حب
قصص عربية
قصص رائعة
قصص مكتوبة قصيرة