أنا بنت (28 سنة) أعز صديق ليا جاك (28 سنة) أعرفة من أيام الحضانة. بقينا أصحاب مقربين جدًا. هو من عيلة غنية وأهله ناس رائعين و لِطافٌ جدًا.
أما أنا، العكس تمامًا. ماما كانت وحيدة، وبابا انت/*حر قبل ما أتولد. ماما بعدها بقت مدم**ة كح*/ول، كانت بتروح الشغل وبعدين ترجع البيت وتفضل تش/رب طول الليل، عمرها ما اهتمت بيا.
لما كان عندي 15 سنة، ماتت في حادثة عربية كانت غايبة عن الوعي وهي سايقة. بعد وفاتها، أهل جاك أخدوني عندهم وبقوا أهلي بالتبني. أنا بحبهم جدًا وهم دايمًا كانوا سند ليا.
جاك كان دايمًا موجود معايا في كل حاجة، وقت مشاكلتي مع ماما، وقت ما كنت مكتئبة، لما كنت تعبانة، في لحظات الفرح والغضب، وحتى أول مرة اتكسرت قلبي. كان دايمًا موجود.
لما كبرت وكنت هدخل الكلية، جاك ساب الكلية اللي كان عايزها علشان يدخل معاية نفس كليتي. أنا بحبه جدًا، ومستعدة أموت علشانه. أنا بشوفه كأخ، أخ بحبه جدًا، ومفيش أكتر من كده. عمري ما شوفته بشكل مختلف، بالنسبة لي هو الأخ اللي كنت بتمناه طول عمري، وبحس ان هو توأمي.
لكن هو عنده مشاعر تجاهي، أكبر من مجرد صداقة، ومع ذلك عمره ما اعترف بده ولا حاول يلمح بأي طريقة. بس أنا لاحظت ده من تصرفاته.
مرة كنا بنلعب “صراحة ولا تحدي”، وصديق سألني لو ممكن أرتبط بجاك؟ ضحكت وقلت لأ، مستحيل، جاك زي أخويا، وده شيء مق/*رف. جاك كمان بدأ يضحك معايا.
كان قصدي أوضح له بشكل غير مباشر إني عمري ما شوفته بالطريقة دي، من غير ما أقول له إني عارفة إنه معجب بيا. بحس إن لو اتكلمت عن الموضوع بصراحه هيبقى محرج، وأنا مش عايزة أخسره.
بعدها دخلت في علاقة جدية مع شخص لمدة 4 سنين، لكن انفصلنا من سنة.
لكن جاك، عمره ما دخل في علاقة جدية طويلة. كان بس بيخرج مع بنت شهرين بالكتير ويسيبها. لكن بقاله 3 سنين مرتبط بصوفيا، وخطبها من سنة و5 شهور. هما دلوقتي بيجهزوا نفسهم للجواز، وأنا كنت معاهم في التخطيط لتجهيزات الفرح، هما اختاروني واحدة من “وصيفات العريس” لأني مش قريبة من صوفيا.
جاك دايمًا بيطلب رأيي في الحاجات اللي تخصه، وده طبيعي لأنه كده من زمان.
لاحظت إن صوفيا مش بتحب ده، فبدأت أبعد بنفسي واخترع أعذار إني مش فاضية عشان مش عايزه أشارك معاهم كتير.
فرحهم هيكون يوم 10، يعني بعد يومين. صوفيا كلمتني وطلبت مني أقابلها، واتقابلنا في الجنينة. طلبت مني ما أحضرش الفرح لأنها متأكدة إن لو جاك شافني مش هيكمل الجواز.
قلت لها إنها مجنونة، وإن جاك بيحبها وما عندوش أي مشاعر ناحيتي. ردت عليا وقالت إن الكل عارف هو حاسس ناحيتي بإيه، وإني لازم إما أسيبه أو أكون معاه!!!
قلت لها مستحيل أكون معاه، جاك بالنسبة لي زي أخويا، طلبت مني أبعد عنهم، وقالت إنها أول ما تتجوزه هتخليه يقطع علاقته بيا!!!
أنا ما عنديش مشكلة إني أبعد لو جاك هو اللي طلب ده بنفسه، لو هو سعيد أنا كمان هكون سعيدة علشانه. لكن أنا مش هزعله في يوم فرحه وأغيب وماحضرش.
كمان، طلبت مني أبعد عن أهله، وهنا اتعصبت وقلت لها إنهم أهلي أنا كمان، ومش هسيبهم لمجرد إنها مش عايزاني معاهم.
قولتلها لو انتي خايفة مني قوي كده ، يبقى مش المفروض تتجوزي جاك، وبعدها سيبتها ومشيت.
أنا فعلًا مش عارفة أعمل إيه. جاك زي أخويا، وأهله هم أهلي. مش عايزة أقطع علاقتي بيهم، لكن في نفس الوقت أنا معجبة جدًا بحب صوفيا ليه. هي بنت طيبة وجدعة جدًا.
دلوقتي بفكر ما أروحش الفرح، لكن مش عارفة جاك هيحس بإيه. مش عارفة إذا كان ده هو القرار الصح ولا لأ……
مرحبًا تاني،
لسه كنت بتكلم مع ماما وبابا، وهما مش مبسوطين خالص من اللي الكلام ده. هما حاولوا يوصلوا لصوفيا وجاك، لكن مش بيردوا علي تليفوناتهم.
عشان الأمور تكون أوضح شوية:
أنا وأهلي قاعدين في فندق، والساعة دلوقتي 7:30 صباحًا.كلنا بنجهز عشان نتحرك، لأننا ساكنين بعيد شوية عن المطار اللي هنروح منه لوجهة الفرح.
جاك وصوفيا قاعدين في فندق تاني.
ماما زعلانة جدًا، وطلبت مني ما أخبيش عليها حاجة زي كده أبدًا بعد كده.
هما زعلانين لأن صوفيا بتحاول تبعدني عن أخويا وبتاخد قرار مكانه، وكمان لأنها بتحاول تبعدني عنهم. ماما قالت لي إنها مش شايفة أي فرق بين ولادها الاتنين “أنا وجاك”، وإنها مستحيل تسمح لأي حاجة تأذينا.
احنا التلاتة قعدنا نتكلم ونعيط وإحنا بنحضن على الكنبة، زي زمان. أنا عارفة إني عايشة معاهم رسميًا من وأنا عندي 15 سنة، لكني كنت دايمًا موجودة عندهم حتى قبل كده. كنت بنام عندهم أيام كتير لما كانت أمي البيولوجية برة البيت، أو شغالة، أو مش في وعيها، وكان المكان مش آمن بالنسبة لي. عشان كده إحنا كنا قريبين جدًا من بعض حتى قبل ما ماما تتوفى.
إحنا دلوقتي لسة بنحاول نوصل لجاك عشان نحكي له اللي حصل، ماما وبابا هيتكلموا معاه، وأنا كمان هتكلم معاه بعدهم. لكن بعد ما أوضح له شوية حاجات في علاقتنا. أنا دايمًا كنت بتجنب الكلام في الموضوع، عشان كنت خايفة أخسره، أو خايفة يكرهني.
ماما سألتني كمان عن مشاعري تجاه جاك، وقالت لي إنهم دايمًا هيدعموني. قلت لها إن جاك زي أخويا، ومافيش أكتر من كده.
بابا قال لي لازم أوضح ده لجاك، لأنهم عارفين إنه كان عنده مشاعر تجاهي قبل كده، بس هو قال لهم إن خلاص المشاعر دي انتهت. بس هما مش متأكدين فعلًا إذا كان الكلام ده حقيقي، خصوصًا وإن صوفيا تصرفت بالطريقة دي، ف باين كده ان في حاجة حصلت….
مرحبًا،
آسفة على التأخير شوية. جاك رد بعد ساعة من آخر تحديث ليا، وأهلي طلبوا منه ييجي بسرعة عشان في حاجة مهمة. هو جه، لكن صوفيا ما جاتش، وقالت إنها مشغولة بتجهيز شوية حاجات للفرح.
لما جه، جاب معاه دوناتس لأننا كلنا بنحبها. لاحظ فورًا لما دخل الغرفة إن في حاجة غلط وسألنا إيه اللي حصل؟؟ أنا بصراحة ما قدرتش أقول له حاجة.
أنا دايمًا بعاني من مشاكل نفسية، وبروح علاج نفسي عشان مواضيع كتير. لكن أكتر حاجة بأعاني منها هي خوفي الشديد من فقدان أي حد. ده أكتر شيء بحاول أتعامل معاه وأصلحه. عشان كده غالبًا بخلي الناس يتعدوا على مشاعري أو يتصرفوا معايا بشكل مؤذي لمجرد إني مش عايزة أخسرهم.
لكن المرة دي كانت أول مرة أقرر ما أسمحش لده يحصل.
أهلي قالوا لي لو عايزة، ممكن أدخل غرفه تانية وأقعد شوية وأطلع بعد ما يخلصوا كلام معاه. كان قلقان جدًا وفضل يسأل إيه اللي حصل. قلت له إن ماما وبابا هيقولوا له، ودخلت الغرفة.
هما فعلاً قالوا له، وكان مضايق جدًا. سمعت صوته وهو بيكلم صوفيا وسألها ليه قالت الكلام ده، وقالت له إني بكذب!!
زي ما أنتم قلتولي قبل كده إنها هتقول كده، بس عمري ما توقعت إنها فعلًا هتعملها.
جاك دخل الأوضة وسألني: “هي قالت لك كده؟” قلت له: “آه، قالت.”
بعدها على طول خرج من الغرفة ومشي.
وقتها كنت فاكراه خلاص، كل حاجة انتهت. حسيت إني فقدت أخويا، أعز صاحب لي، توأمي. ما كنتش فعلاً عارفة هو مهم قد إيه بالنسبة لي إلا في اللحظة دي.
ماما وبابا حاولوا يطمنوني وقالوا لي لو هو مش عايزني في الفرح، أنا هسافر بكرة معاهم وأستمتع بالمكان، ومش هروح الفرح لحد ما يخلص، وبعد كده نروح رحلة إحنا التلاتة مع بعض، بما إن عندي تذكرة طيارة جاهزة.
بكيت شوية، وأكلت، وبعدين رجعت غرفتي. بعد حوالي ساعتين، جاك جاي خبط على باب غرفتي، كنت متفاجئة جدًا.
هو سلم عليا واعتذر لي. قال لي إن ماما وبابا قالوا له إني كنت زعلانة قوي بعد ما هو مشى، وقال لي إنه مش هيتخلى عني.
هو عرف من اللحظة اللي قلت فيها إن صوفيا قالت كده إني مش بكذب، وكان متضايق وعايز يعرف ليه هي عملت كده.
سألني عارفة ليه صوفيا بتحاول تبعدني عنه؟ ولو قال لي السبب الحقيقي ده ممكن يغير حاجة في علاقتنا؟ قلت له إن مفيش حاجة هتتغير.
قال لي قبل ما يبدأوا يخرجوا مع بعض “هو وصوفيا” كانوا أصدقاء، وقتها هو أعترف لها إنه كان معجب بيا من زمان، لكن أنا عمري ما شفته بالشكل ده، وكنت دايمًا بحاول أوجهه من غير ما أجرح مشاعره.
قال لي إنه كان عارف إني مش بحبّه، لكم ما قدرش يتقبل ده، وكان فاكر أني بس خايفة لو فشلنا، وما كانش عايز يصدق الحقيقة.
لما شاف قد إيه كنت جدية في علاقتي مع خطيبي السابق، قرر إنه يبدأ حياته وما يفضلش مستني. هو وصوفيا بدأوا يتكلموا وهو بدأ يعجب بيها.
قال لي إن الموضوع كان صعب عليها لأنه كان دايمًا بيتكلم معاها عني قبل ما يبدأوا يخرجوا، لكن هو فعلاً بيحبها، وده السبب اللي خلاه خطبها.
هما اتكلموا مع بعض عن علاقتنا, وقال لها انه مستحيل يقطع علاقته بيا بس طمنها وقال لها إنه مفيش خلاص مشاعر من ناحيتي دلوقتي، وهي قبلت عرض الجواز.
قال لي إنهم كانوا ماشيين كويس، وهو عمري ما تكلم أو عمل حاجة تزعجها، لكن حقيقة إنها راحت واتكلمت معايه من ورا ظهره جرحت مشاعره جدًا.
صوفيا قالت له إني لازم أبعد عنهم، لأنها خايفة إنه ممكن يكون لسه مش ناسيني، جاك رد عليها وقال لها إنه ماكنش هيوافق يتجوزها لو كان لسه عنده مشاعر ناحيتي. وسألها إزاي تطلب مني ابعد عن عيلتي بالشكل ده، خصوصاً بعد كل اللي عديت بيه وإنهم العيلة الوحيدة اللي عندي.
ردت عليه وقالت إن ده مش موضوع كبير وإني ممكن ألاقي عيلة تانية زي ما لقيت العيلة دي!!
الكلام ده ضايقه جداً وخلّاه يلغي الفرح. هما لسه مع بعض حالياً “ما انفصلوش”، وهي هتروح له بكرة علشان يشوفوا هيعملوا إيه.
بعد كده سألني إذا كنت في يوم حبيته؟ جاوبته بـ”لاء”، هو عيط شوية وقال لي إنه كان محتاج جداً يقول الكلام ده ليا أخيراً علشان أعرف هو كان حاسس بإيه.
قلت له أنا آسفة لو كنت جرحت مشاعره في أي وقت وإني فعلاً مهتمة بيه، لكن محتاجة شوية وقت عشان أقدر أتجاوز اللي حصل.
أنا محتاجة وقت بعيد، جاك كمان محتاج ده أكتر مني. مش هقطع علاقتي بيه تمامًا، لكن ممكن يكون فيه مسافة شوية بينا. مفيش خروجات تاني للحفلات، هتقابل بس 5 مرات في الشهر في المكان اللي بنقابل فيه بعض حاليًا.
هو حجز غرفة وهبيبات في الفندق.
صوفيا بقالها فترة بتتصل وبتبعت رسائل صوتية، بس أنا ما بردتش عليها وحظرتها مؤقتًا دلوقتي عشان باين عليها مش مبسوطة.
تعديل:
**للناس اللي بتقول إني معجبة بجاك!**
أعتقد إني محتاجة أوضح الأمور بيني وبين جاك. إحنا اتعرفنا على بعض وإحنا عندنا 3 سنين، بيته كان على بعد 15 دقيقة من بيتي، وكنا بنحب نلعب مع بعض ونخلط المية بالطين. ماما كانت بتتأخر دايمًا، فجاك أو مامته كانوا بياخدوني البيت، ومن هنا قربنا من بعض أكتر. ماما كانت بتنساني كتير، وفي أوقات كنت بأنام عندهم.
وأنا صغيرة كنت بختلف مع ماما كتير لأنها كانت مكتئبة وبتسيب البيت دايمًا في حالة فوضى، وأنا بطبعي منظمة جدًا وبحب كل حاجة تكون نظيفة. أنا وجاك دخلنا نفس المدارس وحتى نفس الكلية، وعشنا قريب من بعض وقت الجامعة، فكان عندنا وقت كتير مع بعض. كنا دايمًا بنروح السينما مع بعض، وبنحب نروح نعمل رياضة في البحيرة طول الوقت، وحتى كنا بنروح نفس الجيم مرتين في الأسبوع.
حاجة كمان احنا بحب الأكل، وكنا دايمًا بنركب العربية ونجرّب أي حاجة جديدة نشوفها، وده بقاله سنين طويلة. أنا حتى مخططة أسافر معاه لدول مختلفة عشان نجرب أكل جديد. كنا بنتقابل ونتكلم كل يوم، لكن من وقت ما بدأنا شغل مبقناش بنشوف بعض كل يوم، وخصوصًا إني كنت في علاقة بعد كده ف ماكنتش أقدر اكون معاه علي طول،
كنا بنشوف بعض مرتين في الأسبوع. وهو كمان ارتبطت، فمقدرناش نقابل بعض كتير.
ناس كتير قالولي إني ممكن أكون بحبه لكن خايفة.
بس أنا مش حاسة كده. آه إحنا قريبين جدًا، وناس كتير وأصحابنا قالولي إننا مش فاهمين يعني إيه علاقة أخ وأخت حقيقية عشان معنديش إخوات، لكن بالنسبة لي جاك هو أخويا.
أنا دايمًا محتاجة أتكلم معاه. هو مضحك جدًا وإحنا الاتنين بنعمل حاجات غبية، وده اللي بيخلينا ننسجم مع بعض.
من كتر ما الناس بتقول إننا معجبين ببعض، ده خلاني مرة أشك في نفسي، لكن لاء انا مش بحس نفس الإحساس اللي كنت بحسه مع خطيبي.
دلوقتي في ناس كتير بتبعتلي في رسائل خاصة وبيقولوا إن اللي بينا مش علاقة إخوات، وأنا مش فاهمة. لو مش اخوات يبقى إيه؟ أنا معنديش أي مشاعر رومانسية ناحيته، فبسأل الناس اللي عندهم إخوات، هل ده طبيعي ولا لأ؟
**اتكلمت مع صوفيا!!!!!!**
اتكلمت معاها، وقلت لها إنها مش لازم تقلق مني، ولو هي حاسة بعدم راحة المفروض نتكلم ونحل الموضوع.
هي قالت إنها غلطت في الطريقة اللي تعاملت بيها مع الموضوع. كانت خايفة وبس، وما قصدتش الكلام اللي قالته. قالت لي إن كل حاجة كانت كويسة لحد ما أنا وخطيبي السابق افترقنا، وإنها بدأت تقلق من غير سبب. جاك عمره ما عمل حاجة تخليها تقلق مني.
هي كانت مضغوطة جدًا بسبب تجهيزات الفرح.
أنا مصدقاها، وعارفة إنها شخص كويس، حتى لو ماكنتش قريبة مني. إحنا اتقابلنا في تجمعات عائلية وخرجنا مع أصحاب مشتركين. وبصراحة هي بتتوتر بسرعة.
اتكلمنا مع ماما وبابا، وهما مبسوطين إننا حلينا المشكلة. جاك كمان اتكلم معاها وتصالحوا، والفرح لسه هيحصل!!
بس أنا لسه مش هحضر!! ماكنتش أعرف إن صوفيا عارفة إن جاك كان معجب بيا، وبصراحة ده الأفضل للكل. عمري ما كان قصدي أطلع صوفيا في صورة الوحش. كل اللي كنت عايزاه هو إني أعرف أتصرف إزاي.
جاك بيحبها، وأنا متأكدة من ده!!
عارفة أن جاك عمره ما هيعتبرني زي أخته، حتى لو هو مش معجب بيا، أنا بالنسبة له مجرد صديقة قريبة. لكن بالنسبة لي، هو عيلتي وهيفضل دايمًا عيلتي.
وبالنسبة للناس اللي بتقول إني معجبة بيه، لأ، والله عمري ما حسيت كده!! أنتوا حرفيًا خليتوني أشك في نفسي 😭. أنا عمري ما حبيت جاك زي ما كنت بحب خطيبي السابق، وأنا 💯 متأكدة من ده.
أما الناس اللي مستنيين يشوفوني أنا وجاك مع بعض، ده مش هيحصل أبدًا. أنا حاليًا بحاول أرجع لخطيبي السابق.🤍
**تعديل:**
هاي، أحب أقولكم إن الفرح اتلغي تاني، وأنا مش في حالة كويسة دلوقتي عشان أشرح اللي حصل، لكن هشارك التفاصيل لما أكون أحسن. أنا قطعت علاقتي مع جاك. شكرًا ليكم مرة تانية، حسيت إني لازم أبلغكم.
هاي،
انتوا عارفين اني قررت مش هحضر الفرح لما فكرت كويس بصراحة حسيت اني لو كنت مكان صوفيا، مكنتش هحب البنت اللي جوزي كان معجب بيها تكون في فرحي.
قررت مش أروح عشان أحترم علاقتهم. بس صوفيا كانت لسه عايزاني أروح وكانت بتتصل بيا كتير.
ساعدت ماما وبابا في شنطهم، وودعتهم في المطار الساعة 8:00. الساعة بقت 9 ولسه جاك وصوفيا مظهروش، صوفيا وصلت 9:30 وبدأت تعيط في المطار وتقول إن جاك مشي ومارجعش.
حاولنا نتصل بيه بس مردش، وصوفيا بدأت تصرخ وتقول إن ده ذنبي، وإن كان المفروض أوافق أجي الفرح بعد ما اعتذرت لي.
رديت عليها وقلت لها إن هي اللي طلبت مني مآجيش، وإني فعلاً ما رحتش لأن ده الصح.
قالت لي إنها تعبت جدًا عشان تقنعه إنه يتقدم ويتجوز، وإني لما قررت ما أروحش فرحتها، خربت كل حاجة عليها. وإن ده خلاه يعترف لنفسه إنه لسه بيحبني، وقطع علاقته بيها.
قلت لها: “دي مشكلتك انتي”.
ردت وقالت إني دايمًا هكون المشكلة، وإنه لسه عايزني، ودايمًا بيتكلم عني، إزاي أنا بفرحه، وإن أكلي أحلى من أكلها، وإنها مش مضحكة زيي، وإنه لما عرف إني أنا وخطيبي السابق هنسيب بعض، قعد يعيط وفسخ خطوبتهم، وإنها اضطرت تقنعه يرجع لها تاني.
قلت لها إنها مش عايزاني في حياتهم، وده السبب إني مش هروح فرحهم. وطلبت من جاك إنه يبقى فيه مسافة بيننا.
هي دلوقتي متضايقة وبتلومني. سألتها ليه من الأساس تحاول تقنع راجل إنه يتجوزها، كان لازم تسيبه من زمان.
يعني أنا حاولت أبعد، وبرضه لسه شايفاني مشكلة بالنسبة لها!!!
قلت لها سواء اتجوزتوا ولا لاء في الحالتين أنا هقطع علاقتي بيه، لكن مش هبعد عن أهلي، وده شيء لازم تفهمه كويس.
بدأت تقرب مني وتزعقلي، وقتها ماما اتدخلت وقالت لها:
“أنا آسفة على الحاجات الوحشة اللي ابني عملها، لكن اعرفي إن دي بنتي، وهي معملتش حاجة غلط. لو حاولتي تأذيها عشان شايفة إنها الحاجز بينك وبين جاك، اعرفي إنك مش هتبقي فرد في عيلتنا. أكبر غلط انك تطلبي من راجل وتتوسلي ليه إنه يتجوزك. مش بقول إن ابني بريء، لكن المفروض متكونيش مع راجل لازم يفكر مرتين قبل ما يتجوزك.”
بعد كده أهلي طلبوا مني نمشي، ومشينا مع بعض. رجعنا الفندق، وماما وبابا قالوا حتى لو الفرح لسه هيحصل، هما مش هيحضروا. وقالوا لو جاك وصوفيا مش متأكدين تمامًا من جوازهم، هما مش هيدعموه.
اتكلمت معاهم وقالوا لي إني معملتش حاجة غلط، وإن قراري بقطع علاقتي بجاك كان القرار الصح. حتى لو هما مكانوش عايزين ده، لكن ده الأفضل لينا إحنا الاتنين.
جاك اتصل بيا وطلب يقابلني. كنت عارفة إني محتاجة أواجهه، بس كنت بفكر هقول له إيه؟ “آه، خطيبتك لسه قايلة لي إنك لسه ما نسيتنيش بعد ما قلت لي امبارح إنك نسيتني.”
وأنا اساسا زعلانه ووجعني قوي إني خسرت حد كان مهم جدًا بالنسبة لي.
اتقابلنا و جاك سألني لو يقدر يقول اللي كان نفسه يقوله دايمًا.
قلت له لو هيقول اللي في دماغي، يبقى لازم يعرف إنه خسرني، لأني مقدرش أكون أخته لو هو بيحس كده ناحيتي.
وبرغم كده، قالها. اعترف بحبه ليا و بمشاعره ناحيتي.
وده كسرني بصراحة. الطريقة اللي قالها بيها والكلام اللي قاله خلتني أدرك قد إيه أنا كنت غبية.
قال لي: “أنا معجب بيكي من زمان ولسه معجب بيكي. أنا عارف إننا ممكن نحاول ونبقي مع بعض ونجرب. أرجوكي اديني فرصة. أنا مستنيكي تقبلي بيا من 19 سنة. مش هبطل لحد ما تديني فرصة، أرجوكي خلينا نحاول.”
أنا محطمة جدًا.
قلت له لأ، وإنه خلاص ينسى إنه كان عنده صديقة، وأنا هنسى إنه كان عندي أخ. قلت له إن اللحظة دي هي نهاية كل حاجة بيننا.
قلت له إن الموضوع هيبقى صعب لأننا لسه عندنا نفس الأهل. و إني هبعد شوية، لكن مش هقطع علاقتي بأهلنا طالما هما مش عايزين كده. ومش هحضر تجمعات عائلية، هكتفي إني أروح في الأيام اللي مش هيكون موجود فيها .
كان بيعيط…
قلت له بعدما اتكلمنا أول مره، كان المفروض المحادثه دي ما تحصلش تاني، وكان المفروض الفرح ما يتلغيش تاني.
اعتذرت له لو كنت عملت حاجة خليته يحس كده ناحيتي، واعتذرت كمان إني ما بعدتش أول ما أدركت إنه بيحبني. ما كنتش أعرف إنه جد للدرجة دي، وكنت فاكرة إن كل حاجة انتهت لما بدأ يخرج مع صوفيا.
روحت لأهلي وحكيت لهم كل حاجة، هم فهموا واحترموا قراري، وقالوا لي إني لسه بنتهم وهنتقابل أكيد، لكن مش زي الأول.
الحياة مش دايمًا لطيفة، وجعني جدًا فقدانه، لكن ده أحسن حاجة ممكن أعملها عشانه.
**تعديل:**
أهلاً يا جماعة، ده هيكون آخر تحديث ليا. ماما كلمتني وقالت لي إن الفرح لسه هيحصل. جاك حجز طيارة بدري ولسه هيتجوز. الساعة عندي دلوقتي 11 الصبح، وعندهم الساعة 9 بالليل،
غالبا الفرح شغال دلوقتي….
(القصة حقيقية)
قصص
