جدي حبيبي 🧓❤️
أنا شاب. اتربيت على إيد جدي، وكان طول عمره زي أبويا. هو عمل كل اللي يقدر عليه عشان يعوضني عن غياب والدي ويديني طفولة طبيعية.
جدي بيعشق الكريسماس، وكان دايمًا بيعمل كل اللي يقدر عليه عشان يخلي اليوم ده أحلى يوم في السنة.
بصراحة حالتنا المادية مكانتش كويسة قوي، ومعظم هدايا جدي كانت مصنوعة بإيده، بس ده كان بيخليها مميزة أكتر، خصوصًا إنه كان شاطر جدًا في شغل الخشب، وحاجاتة كانت بتبهرني قوي.
جدي هو اللي علّمني كل حاجة أعرفها، عمري ما هنسي فضله عليا. كنا علي طول بنخبز بسكويت مع بعض، ونحضر عشا لذيذ، ونقعد جنب الدفاية نحل الألغاز سوا ❤️
احنا لسه عايشين مع بعض، وأنا دلوقتي اللي برعاه. وحبيبتي عايشة معانا من حوالي سنة.
جدي بقاله فترة تعبان وحالته بتسوء أكتر. وللأسف الدكتور متوقع إنه مش هيقدر يكمل لحد آخر السنة 😔💔
أنا محطّم جدًا وحاسس إن الدنيا كلها بتنهار من حواليَّا، بس بحاول ما أظهرش ده قدام جدي.
في يوم كان تعبان جدًا، وسألني: “هو الكريسماس جه؟”، ولما قلت له لاء، فضل يقول لي إنه مش قادر يستني ونفسه الكريسماس يجي بسرعة، وإنه هيعملي مكتبة جديدة عشان أحط فيها كتبي. مع إنه بقاله سنين مش قادر يعمل أي حاجة بسبب التهاب المفاصل.
الكلام ده كسر قلبي، وفجأة قررت إني هحتفل بالكريسماس في يوليو ومش لازم نستني. الفكرة دي ماعجبتش حبيبتي خالص، فضلت تقول إنها فكرة غريبة، وازاي يعني نحتفل بالكريسماس وهو مش في ميعاده؟!
صممت وعلّقت الشجرة والزينة في البيت، حبيبتي قالت إني مجنون وهددت إنها تسيبني.
قالت إن جدي مش طفل، وإن حتى الأطفال بيقدروا يستنوا لحد الكريسماس.
رديت عليها وقلت لها إن يوم الاتنين الجاي (يوم أجازتي)، هيبقى كريسماس غصب عن أي حد، سواء عجبها الكلام أو لاء. وقلتلها إنها حرة تعمل اللي هي عايزاه، بس أنا بتمني تقف جنبي وتدعمني.
لما رجعت من الشغل… لقيتها مشيت، وأخدت هدومها معاها 💔
أنا وجدي، بدأنا من دلوقتي نتفرج على أفلام الكريسماس مع بعض كل يوم لما برجع من الشغل، ومش عارف أوصف قد إيه جدي بيكون مبسوط وهو بيتفرج ❤️
ناوي كمان أجيب بيچامات شكلها يضحّك، وكمان هحاول أجيب له الحاجات اللي بيحبها هدية، وألفّها كويس، وأحطها تحت الشجرة 🎁✨
كمان هعمل غدا كريسماس حلو، وهحاول أولّع الدفاية لو الجو مش حر قوي، مع أن ده صعب شوية.
يمكن أكون اتجننت، بس أنا عايز أعمل ده، حتى لو باين إنه تصرف غريب.
كل سنة وانت طيب يا جدي! 🎅❤️
🌿تحديث:
للأسف، جدي توفى بسبب سكتة قلبية مفاجئة من كام يوم💔
كنت عارف إن مافضلش كتير، بس ماكنتش متوقع يكون بالسرعة دي.
دلوقتي بحاول أشغل نفسي بأي حاجة عشان ما أفكرش، بس امبارح بالليل وأنا في السرير… انهرت وبكيت كتير.
الحاجة الوحيدة اللي مخلّياني حاسس بشوية راحة هي إن جدي كان مبسوط في “الكريسماس”. عمرى ما هنسى نظرة الفرحة اللي كانت على وشه في اليوم ده… كان فرحان قوي.
بصراحة استغربت قوي لما جدي ابتسملي، وقلع دبلته وادهالي هدية الكريسماس! أنا عمري ما شفته بيشيل دبلته قبل كده في حياتي كلها.
كانت لحظة مؤثرة، بس في نفس الوقت ذكرى هفضل محتفظ بيها في قلبي طول عمري. اليوم كان جميل جدًا، وماكنتش عايزاه يخلص.
دلوقتي حاسس إن حياتي كلها انهارت، وحاسس بوحدة فظيعة. بس برضه الحمد لله أنا اكيد محظوظ إن الراجل ده كان في حياتي.
(القصة مترجمة من ريديت. أصحاب القصة أجانب).
