لماذا يتغير الرجل مع خطيبته فجأه ويبتعد لفتره دون سبب منطقي ثم يعود كأن شيء لم يكن

النهاردة باذن الله هتكلم معاكم عن الاسباب اللي بتخلي الراجل يبعد شوية. وزي ما قلت لكم قبل كده انا البعد هنا مش قصدي
الهجر او الانفصال لا قدر الله. لا اقصد ان الراجل بيتغير شوية كده معاكي من غير سبب.

تجاهل الرجل للمرأة بعد الاهتمام الشديد

يعني في وقت معين هو متعود يكلمك فيه كل يوم هتلاقيه مش بيكلمك.

اويتكلم كلمتين ويعمل اي حجة ويقفل.

لو في يوم معين متعود انه بيجي لك فيه هتلاقيه برضو يعمل اي حجة ومش هيجي

تلاقيه بيخرج مع اصحابه مقرب من اصحابه اكتر منك.

وتيجي عايزة تعرفي طب ايه سر التغيير المفاجئ ده؟

خصوصا ان دايما مش بيبقى فيه سبب بالعكس يعني ده دايما التغيير ده بييجي  بعد وقت كنتم فيه قريبين من بعض جدا
يعني مثلا لو كنتم لسه خارجين مع بعض خروجة وكانت حلوة قوي وراجعين  مبسوطين قوي وكويسين

وفجأة تلاقيه اتغير فبتبقى عايزة هتتجنني عشان تعرفي ايه اللي حصل؟

اللي بيحصل ده بسبب حاجة عند الراجل اسمها دورة المحبة.

اللي قرأ كتاب الرجال من المريخ والنساء من الزهرة اكيد هيبقى عنده خلفية عن الكلام اللي انا هقوله ده.

هتقولي ايه بقى الكلام اللي انت بتقوليه ده؟ انا مش فاهمة منك حاجة!!!

هقول لك يا ستي دورة المحبة دي يعني ان الراجل طول الوقت بيبقى ما بين
حبه ليكي وحبه للحرية والاستقلال.

يعني على قد ما بيقرب منك وبيحبك قوي قوي بيجي عليه وقت كده بيحس ان هو عايز كانه ياخد نفسه كده شوية بعيد عنك. ويحس بس شوية بالحرية وبالاستقلال وبعد كده من نفسه هو بيحس ان هو مشتاق لك وبيرجع تاني زي الاول يمكن كمان احسن من الاول.

بس المشكلة ان احنا كبنات او كستات الموضوع ده صعب علينا جدا. لان احنا بنخاف من بعد الراجل ده وبنتخيل دايما الاسوأ. يعني لما بيتغير معايه بقعد  افكر

• لا اكيد ما بقاش بيحبني.
• طب اكيد انا زعلته في حاجة.
• طب هو خلاص هيسيبني
• وافضل بقى كل الحاجات الوحشة تيجي في دماغي.

عشان كده احنا بيبقى صعب علينا جدا ان احنا نتقبل الفترة دي

كمان اللي بيخليها صعبة عن الستات ان الستات عمرها ما بتبعد غير لما يكون في سبب معين وسبب قوي.

• يعني ان هي هتكون حاسة ان هي مجروحة
• او حبيبها خطيبها او جوزها ضايقها زعلها
• او خلاص قررت ان هي تسيبه.
• فهي مش بتبعد غير للاسباب دي

لكن الراجل ممكن يبعد كمان غير الاسباب دي ممكن يبعد كمان زي ما قلت لكم من غير اصلا اي سبب.

طيب انا بقى المطلوب مني اعمل ايه؟

المطلوب مني ان انا اسيبه يومين تلاتة يرتاح خالص وهو من نفسه زي ما قلت لك لما بياخد حريته شوية ويحس ان هو قعد انفرد بنفسه شوية هو من نفسه هيرجع. وزي ما قلتلك يمكن كمان احسن من الاول.

هتقولي لي اه ما الكلام سهل قوي لكن التنفيز صعب.

انا عارفة الفترة دي بتبقى صعبة قد ايه, والتنفيز انا عارفة قد ايه صعب

بس عشان تسهلي الموضوع على نفسك هقول لك تعملي ايه.

اتفقي معاه قولي له انا عارفة ان فيه وقت معين انت بتكون محتاج تقعد فيه مع نفسك شوية انا ما عنديش مشكلة انا هسيبك تقعد ترتاح شوية بس بشرط انك تطمني.
تكلمني بس تقول لي معلش انا اليومين دول تعبان او متضايق او محتاج اقعد مع نفسي شوية. وانا خلاص هقدر ظروفك.

او تبعت لي على الاقل رسالة تقول لي فيها ان انت كويس وانا هسيبك زي ما انت عايز.

وفعلا لو هو عمل كده انت كمان تلتزمي وتسيبيه براحته شوية؟

هتقولي لي لأ انا مش مقتنعة بالكلام اللي انت بتقوليه ده وانا عمري ما هقدر ان انا ابعد عن حبيبي شوية او معملش معايا الحاجات اللي انا متعودة اعملها معاه كل يوم

هقولك لو انتي مسبتهوش المشكلة ان الراجل هيتخنق وعلاقته بيكي مش هتبقى زي الاول وهيبقى فعلا متغير
وهتفضلي طول الوقت وتقولي له مالك؟ هيقول لك لأ ما ليش كويس ومش عارفة ايه ، بس برضو هيبقى متغير.

فعلشان تبقى علاقتكم كويسة على طول لازم زي ما قلت لك تدي له مساحته.

طبعا الكلام اللي انا باقوله لكم ده كلام علمي
الراجل بيبقى حاسس ايه اللي بيحصل له بس مش عارف ايه التفسير العلمي ليه. غير لو طبعا دارس علم نفس او قاري وعنده خلفية عن الموضوع ده.

يعني حضرتك مش زي الشاطرة كده تروحي تقولي له على فكرة انت عندك دورة محبة!!!

طب خلاص انا موافقة  وسيبته له يومين تلاتة بيكلمني بس وقت قليل مش زي ما احنا متعودين. واديت له مساحته وسبته براحته خالص وهو بعد كده رجع عليه. اوعي بعد كده بقى تلوميه.

لأ بالعكس عامليه عادي جدا وكأن ما حصلش حاجة. تمام

اوعي زي ما قلت لك اوعي تلوميه.

كمان يا بنات احنا كمان على فكرة بيجي علينا فترة بنحس بحزن بضيق باكتئاب د من غير سبب معين.

تبقي مش عارفة او مثلا سبب تافه وتلاقي نفسك كبرت الموضوع قوي.

كل شهر تقريبا بيحصل لنا ايه الحكاية دي
بس احنا بقى مش زي الراجل.

الراجل زي ما قلت لك بيبعد. لكن احنا بالعكس احنا بنبقى عايزين حد حنين معنا يطبطب علينا يفهمنا يتكلم معنا.

فعلشان كده انا برضو لما بحس
بالاعراض دي ممكن اتكلم خطيبي وافهمه اقول له انا اوقات كده بحس ان انا زعلانة او متضايقة من غير سبب. انا في الوقت ده ببقى بس محتاجة حد حنين معايه يسمعني. تمام

يعني زي ما انت هتفهميه هو كمان يفهمك. او زي ما انت هتقفي جنبه هو كمان المفروض يقف جنبك في الفترة اللي انا قلت لك عليها دي

طب هو ده السبب الوحيد اللي يخلي الراجل يبعد ؟

لأ في اسباب تانية

ان يكون مثلا عندو ضغط في الشغل

على فكرة الراجل بطبيعته مش بيقدر يركز غير في حاجة واحدة فلما بيبقى عندو في الشغل ضغط جامد جدا مش بيقدر يركز غير في الضغط اللي عنده ده
ففي الفترة دي غصب عنه برضه من غير ما يقصد او من غير ما يتعمد هيتلاقيه بعد عنك شوية او تحسي ان هو متجاهلك شوية بس فعلا هو مش بيكون قاصد.

فلو انت عارفة انه عنده ضغط معين معلش استحمليه

او لو سبب تاني انه عنده مشكلة.

احنا البنات لما بيبقى عندنا مشكلة اول حاجة بنعملها بنطلع نجري على اكتر حد بنحبه وبنثق فيه وبنقعد نتكلم معاه ونفضفض معاه علشان نحس ان احنا ارتحنا بعد الكلام.

لكن الراجل بيحب الاول انه يقعد يومين تلاتة يفكر
في المشكلة دي ويحاول يلاقي لها حل بعد كده بيبتدي ان هو يتكلم او يفضفض.

علشان كده احنا دايما بنتهم الراجل وقت ما بيكون عنده مشكلة

• اقعد اقول له انا زعلانة منك انت ازاي بتخبي عني؟
• انت مش حاسس ان انا قريبة منك علشان تحكيلي؟

مش بنبقى فاهمين ان طبيعة الراجل مختلفة عن طبيعة الست. تمام

السبب الاخير بقى ان فيه نوع  من الرجالة بيتعمد انه يضغط على خطيبته او مراته بالبعد ده عشان يخليها تعمل حاجة هي ممكن تكون مش عايزه تعملها بس ده ذ نوع من الرجالة بيكون صعب جدا.

في سبب كمان مهم جدا من اسباب تجاهل الرجل لحبيبته شرحته في الفيديو هنا لازم تشوفيه لانه مهم جدا

أفضل طريقة لتحويل تجاهل الرجل لك لإهتمام ويرجع مشتاقا ملهوفا التجاهل المفاجئ بعد الاهتمام