“العشق الممنوع”
انا عمري 39 سنه
جوزي عمره 50 سنه
متجوزين من 11 سنه
اخت جوزي “ميا” 41 سنه متجوزه من “ريك” الي عمره 40 سنه
جوزي واخته قريببين جدا من بعض , من سنين واحنا لازم نتقابل يوم الاحد
اوقات هما بيزورونا واوقات تانيه احنا الي بنروح عندهم.
احيانا بينضم لينا افراد من العيله سواء من عيلتي او من عيله جوزي
بس الاساسي ان احنا الاربعه لازم نشوف بعض اليوم ده
احنا متفقين جدا والحمد لله عمر ماكان في بينا اي مشاكل
للاسف غصب عني بدأت احس بمشاعر ناحيه ريك
الاحساس ده عندي من 5 سنين.
عارفه الناس دلوقتي هتقول ايه عليه , بس الموضوع كان سر جوايه وبس
ومافيش حد ابدا لاحظ اي حاجه.
انا بحب جوزي قوي , ومش عايزه اخرب جوازي السعيد , انا بتربطني بجوزي علاقه قويه.
في البدايه ماكنتش عارفه افسر مشاعري ناحيه ريك ,مرت سنين وانا مش عارفه انا حاسه كده ليه . لاني بحب جوزي ف ازاي اقدر احب شخص تاني؟
في عيد ميلاد ريك الاربعين عملوا احتفال كبير في بيت حماتي
بعد الحفله فضلت معاهم علشان انضف البيت , وحماتي كانت مشغوله بتراعي الاطفال.
وقتها ريك كان بيساعدني , هو ماكنش في كامل وعييه واعترفلي انه بيحبني من اول سنه اتجوزت فيها جوزي
حاسيت بالصدمه هو كان طول عمره لطيف معايه وبيجاملني كتير
بس عمري مافكرت انه حاسس ناحيتي بحاجه
حاولت اتجاهله قعد يكرر نفس الكلام , طلبت منه يمشي
قعد يتجادل معايه , صممت انه لازم يمشي وانا هكمل تنضيف لوحدي
مش عارفه يمكن هو حس بمشاعري!!!
لاسابيع وانا حزينه وببكي
لما جوزي شاف انا حزينه اد ايه , كان لطيف معايه قوي وكان قلقان عليه
وده زود حزني اكثر لاني حاسيت بالذنب , ومن كثر الحزن جسمي اتأثر وجالي قرحه في المعده
الكلام ده حصل الصيف الي فات , من وقتها وانا بتجنب خالص ريك ومراته
طبعا علشان احنا متعودين نتقابل علي طول كانت اعذاري مش منطقيه ومش مقبوله
جوزي بدأ يتهمني اني بكره عيلته
اخت جوزي اتصلت بيه اكثر من مره علشان تسألني مالك؟
ودلوقتي “ميا” بتتهمني اني غيرانه من علاقه جوزي بيها ,وعايزه جوزي يقطع علاقته بأخته.
للاسف اضطريت في الاخر اروح معاهم للعشاء بس كنت بتجاهل ريك تماما
وده خلي ميا غضبانه لانها افتكرت اني بكرهم , رغم اني في الحقيقه بحب ميا زي اختي.
دلوقتي جوزي جاله عرض شغل في مدينه صغيره , هي بعيد عن مدينتنا بحوالي 20 ساعه
انا عايزه جوزي يقبل الوظيفه الجديده بس مش عارفه ازاي اخليه يقتنع
ريك لما عرف بعتلي رساله وقالي ارجوكي بلاش تمشي
ووعدني انه مش هيضايقني تاني بس بلاش ابعد .
انا عايزه اسافر بعيد , الي بيحصل ده مش عاجبني
الاول ماكنتش حاسه بالخطر كان مجرد شعور جوايه وخلاص
لكن دلوقتي انا حاسه ان ده غلط , وانا مش عايزه اعمل كده
ساعدوني اعمل ايه؟؟؟
🌹#تحديث
انا كتبت رسالتي من اسابيع . الحقيقه ماكنتش متوقعه كل الهجوم ده
قعدت اقرأ الرساله اكثر من مره علشان افهم ايه الي في كلامي غلط وخلي الناس تحكم عليه كده ويكون فيه سوء ظن فيه بالشكل ده!!!
انا مش شايفه نفسي استاهل الكلام السلبي ده كله , الظاهر الناس عايزه تحكم عليه وخلاص.
كان في ناس عندها نفوس طيبه فاهموني وساعدوني شكرا ليكم 🌷
انا عايزه أأكد اني ما اتصرفتش مع ريك اي تصرف غلط , بالعكس لما اعترف لي بمشاعره اتجاهلته تماما و عملت اقصي ماعندي علشان انساه خالص
انا ماكنتش بتكلم معاه نهائي ولاعايزه حتي ابصله , ومش ناويه اتكلم معاه تاني في المستقبل.
بعد ماكتبت الرساله اتكلمت مع جوزي تاني علشان يقبل الوظيفه
قولتله انا عايزه اجرب المغامره دي خصوصا ان في زياده في المرتب
25 % ومنصب اعلي , قولتله مش انت كنت دايما بتشتكي انك مش عارف تترقي هنا في مدينتنا , طيب انا شايفه انها خطوه حلوه قوي في مستقبلنا
انا ممرضه وممكن بسهوله الاقي شغل في المدينه الجديده لان وظيفتي مطلوبه جدا.
بدأ فعلا يفكر بجديه بس كان متردد شويه علشان المسافه هتكون بعيد جدا عن اهلنا بس كلامي اثر فيه لانه وافق يعمل مقابله للعمل يوم الاربع , ولو قبل الوظيفه كنا خلاص هننقل للمكان الجديد علي اخر السنه
كنت متفائله قوي وحاسيت اني اخيرا هعرف ارتاح
انهارده الاحد وطبعا زي ما انتوا عارفين هنتقابل مع عيله جوزي علي العشاء
لكن ده ماحصلش الاسبوع ده , وانا قاعده يوم الاحد لوحدي لان جوزي قاعد مع اخته يواسيها لأن ريك جوزها قالها انه عايز الطلاق 😮
ميا مصدومه جدا , وجوزي قاعد معاها بيحاول يصلح العلاقه بينها وبين جوزها
ريك رافض محاولات الصلح ومش عايز يرجع البيت خالص
“راح بس يقابل اولاده مرتين”
جوزي بلغني انه هيرفض الوظيفه الجديده علشان مايقدرش يسيب اخته لوحدها في الظروف دي
انا فاهمه وجهه نظر جوزي , بس دلوقتي انا محاصره
بعد ماكنت خلاص ارتحت ومتفائله , حاسه ان الدنيا ضاقت بيه تاني
مش قادره احكي لجوزي الحقيقه حاولت اكثر من مره بس فشلت
انا بحب جوزي وعارفاه كويس لو عرف الحقيقه هينهار ويتألم
جوزي كمان عنده مشاكل صحيه من 8 سنين علشان كده هو حساس
وانا ما اقدرش أكون سبب في اذيه مشاعره.
مافيش دلوقتي حل غير اني اقعد في المدينه وادعم جوزي واخته
بتمني جوزي يساعد ميا ويقدر فعلا ينقذ جوازها من ريك
يمكن يتعرض علي جوزي فرصه ثانيه في المستقبل
ولو فعلا انفصلوا يبقي انا مش هشوف ريك مره تانيه………
🌹#تحديث
انا قررت اسيب جوزي وعارفه اني انسانه انانيه وفظيعه
انا عارفه ان الوقت مش مناسب خصوصا بعد الانفصال المؤلم ل ميا
بس مش شايفه ان الموضوع ممكن يتحسن.
ميا انفصلت عن ريك من شهر
لما جوزي بلغني انه خلاص مش هيقبل الوظيفه وافقت ودعمته لاني عارفه هو بيحب اخته واطفالها وقريب منهم اد ايه
انا طول عمري معجبه بالعلاقه مابين جوزي واخته وعارفه اد ايه هما بيجبوا بعض , انا علاقتي بعيلتي مش قويه كده.
جوزي بدأ يقضي كل الاجازات مع اخته , بعدها بدأ يرجع من الشغل عليهم ويبات هناك بالايام , حتي مش بيفكر يبعتلي رساله يطمن عليه او يبلغني انه هيبات.
في الاول ماكنش عندي مانع علشان اخته لسه حزينه جدا و مش عارفه تتأقلم علي الوضع الجديد.
بعد كده قولت لجوزي اني بفتقده , انا عايزه اكون معاه
قولتله حتي خدني معاك ابات عند اختك
قالي اني انانيه وبدور علي الاهتمام دلوقتي , في اكثر وقت اخته محتجاله وقالي انتي عارفه ان ميا بتحب ريك من وقت ماكانوا لسه صغيرين
ولازم اقدر الموقف الي هما فيه.
حاسيت فعلا اني انانيه وقررت اكتم مشاعري واسكت……..
احنا متعودين كل عيد ميلاد نسافر انا وجوزي لمكان جميل ونقضي فيه اسبوعين ثلاثه , بنعمل كده كل سنه من اول جوازنا
احنا بنحجز الرحله دي من شهر ابريل , امبارح وانا بتكلم مع جوزي علي الرحله , اتفاجأ جدا وقالي انه مستغرب قوي ازاي انا بتكلم علي الرحله دي في الظروف الي اخته فيها.
قولتله اختك عندها عيلتها , انا بقي فين حياتي؟؟؟
قولتله انا مقدره الوضع بس انا علي طول وحيده وعايزه اروح الرحله دي معاه
قالي سيبي الموضوع ده دلوقتي.
انهارده اتكلمت مع الشركه الي منظمه الرحله علشان اسألهم لو ممكن اضيف ميا واطفالها معانا في الرحله , فكرت ان هما كمان يغيروا جو معانا
الشركه ردت بالموافقه و ممكن اضيفهم مافيش مشكله
اتصلت بجوزي ابلغه الخبر , اتحمس قوي
بس لما رجع البيت قالي انه اخته مش موافقه علشان كده لازم نلغي الرحله
قولتله وايه السبب؟
قالي ان اخته مش عايزه تكون وسط الناس المتجوزين الفرحانين في المحنه الي هي فيها دي!!!
لما بلغني كل الي قدرت اعمله اني احبس دموعي.
لما جوزي اتعرض عليه الشغل في المدينه الصغيره وقتها كنت متحمسه وفكرت ابعت ال CV بتاعي لمستشفيات هناك علي اساس اني اشتغل علي طول لما جوزي يقبل الوظيفه
من اسبوع جالي رد من مستشفي انهم موافقين , دلوقتي انا بفكر اقبل الوظيفه دي
بعد الي حصل انهارده . بعت رد اني موافقه علي المقابله
انا مقدره مشاعر ميا ومقدره حب جوزي لاخته واطفالها وعارفه ان علاقتهم تستحق الاعجاب , بس انا حاسه اني مهمله انا رقم 2 دايما في حياه جوزي
انا خلاص هسيب جوزي واقبل الوظيفه هبعد واسيب كل حاجه ورايه وابدأ من جديد
مش هيهمني رأي اي حد فيه قولوا عليه الي انتوا عايزينه انا مش مهتمه
🌹#تعديل
شكرا لكل الناس , الحقيقه ماكنتش متوقعه كل التعاطف والدعم ده
الكلام اثر فيه جدا حاسيت ان الناس فهمت مشاعري وكأنهم بيقروا افكاري وعارفين معاناتي.
انا بحب جوزي ويمكن ما اعرفش احب حد تاني اد ماحبيته
بس انا كنت تعيسه لفتره طويله
علي فكره جوزي هو الي ربي اخته لان اهله كان عندهم مشاكل وسابوه هو الي يهتم بيها ويرعاها من وقت ماكانوا لسه اطفال صغيرين
كمان حنيه جوزي هي الي خليتني احبه من الاول , بس هل معقول الحنيه الزايده دي هي الي تخليني دلوقتي حزينه؟
طول عمري عارفه اني رقم 2 بالنسبه له من اول ما عرفته بس كان عندي امل يتغير , وخصوصا بعد ما اتجوزنا وخلفنا
بس هو عمره ما اتغيير ابدا , انا علي طول في اخر اولويات جوزي
ولما كنت بقوله كده , كان بيرد عليه اني سخيفه وبقارن نفسي باطفالنا وبأخته!!!
احنا عمرنا ما اتفقنا ابدا في الموضوع ده
كمان كنت فاكره ان جوزي هيقف جنبي لما احتاجله , انا نفسيتي كانت تعبانه جدا وكنت بعاني لما ريك اعترفلي بمشاعره
لكن جوزي عمره ما حاول يعرف السبب الحقيقي ويسأل ليه انا متغيره
وليه عايزه ابعد عن اخته وجوزها
كان نفسي يقعد معايه بدل ما يسيبني ويروح لوحده كل يوم حد
ده غير ضغطه عليه علشان اروح معاه . مع انه شايف انا اد اي مش عايزه ورافضه اقابلهم
من كثر ضغطه عليه ونفسيتي التعبانه جاتلي قرحه وشعري وقع وخسيت جدا
لما قرر يلغي رحله عيد الميلاد كانت دي القشه الاخيره في علاقتنا
انا بحبه بس خلاص مش قادره
اتكلمت معاه انهارده قبل مايروح لاخته قولتله انت من شهور شايفني مش سعيده وعايزه اسيب المدينه , وبلغته انا خلاص همشي , اعتذرت لاني عارفه ان الوقت مش مناسب علشان اخته
فضل يبصلي وهو ساكت وعنيه كان فيها بخيبه امل
نظرته ليه حطمتني
قالي انه مش مصدق ازاي انا مش متعاطفه مع اخته وانها مش نهايه الدنيا لو لغينا الرحله السنه دي وماعملناش الي احنا متعودين عليه مره واحده
بكيت وماكنتش قادره اتكلم معاه
الموضوع مش بالبساطه دي المشكله مش مجرد الرحله
قولتله احنا مش متفاهمين ومافيش حد فينا عايز يحس بالتاني
مشي , بعدها بعتلي رساله قالي انه مش مصدق انا اد ايه انانيه
وقالي اعملي الي انتي عايزاه , انا مش هقف في طريقك
دلوقتي انا مش عارفه لو هو هيرجع…………
