النهاردة ان شاء الله هتكلم عن الفرق بين الحب والتعلق وازاي اعرف ان انا متعلقة بالشخص ده مش بحبه.
وايه اضرار التعلق؟
ولو انا في الحالة دي ازاي اقدر اخرج منها؟
الحب. يعني ايه اكون بحب شخص
يعني انا قابلت شخص معين حاسيت اول ما قابلته كده ان انا انجذبت له , فيه ميل كده حصل ناحيته ,وفيه بينا مشاعر وكيميا فيه بينا ثقة واحترام متبادل.
كل واحد فينا بيعمل على قد ما يقدر ان هو يخلي التاني سعيد معاه
وعايز اكون مع الانسان ده وقت اطول
وحاسس ان هو ده اللي هيكون شريك حياتي
بعد الجواز كل واحد فينا بيحاول ان هو يساند التاني فبننجح ونكبر واحنا مع بعض.
وده بيعمل حالة من السعادة والهدوء.
التعلق بقى عكس كل اللي انا قلته ده.
التعلق ان انا اكون طول الوقت في حزن وضيق والم.
لو الانسان اللي انا متعلقة به مش معايه طول الوقت هوصل لحالة من الخنقة والحزن والضيق
لدرجة ان انا احس ان انا مش عارف اعيش حياتي بشكل طبيعي.
بعلق سعادتي على الشخص ده بس , وبحس ان انا مستحيل ما اقدرش ان انا استغنى عنه.
وممكن اكون بتعرض للاساءة و ايذاء عاطفي ومع ذلك برضو مش قادرة استغنى عن الانسان اللي انا متعلقة بيه. بحس كده ان انا عندي هوس بيه
عارفين زي ايه؟
زي الطفل الصغير كده اللي بيكون متعلق بمامته. ساعات الام لما بيكون ابنها متعلق بها زيادة عن اللزوم بتتخنق وتلاقيها دايما بتسأل اللي حواليها اعمل ايه؟
انا مش عارفة اعيش حياتي بشكل طبيعي. ابني متعلق بيه قوي وتلاقيها عمالة تسأل كل اللي حواليها ازاي تتخلص من الحالة دي!!!
رغم ان انا بتكلم هنا عن الام وابنها الا ان الام اوقات بتتعب وتتخنق. ايش حال بقى شريك او شريكة حياتي؟
اوكي يبقى هو ده الفرق. الحب مشاعر راحة وهدوء
والتعلق تسيطر عليك مشاعر الخنقة والضيق والزعل.
ايه العلامات اللي لو انا حسيت بها في نفسي اعرف ان انا متعلقة بالشخص ده مش بحبه.
*لو حسيت ان انا طول الوقت عندي رغبة ان انا اسيطر عليه.
عشان اضمن ان هو يكون معايه.
*لو عندي غيرة زيادة عن اللزوم.
*لو بحط شريك حياتي دايما في اختبار
اقعد مثلا اعمل اكونت فيك واكلمه علشان اشوف هو بيحبني ما بيحبنيش بيخوني ما بيخونيش وهكذا.
*لو طول الوقت عمال تحسسه ان هو مقصر معاك
انه مش مهتم بيك زياده, ودايما حاسس ان هو بيخيب ظنك فيه.
*لما بتنسى نفسك والحاجات اللي انت بتحبها
وبتحب بس الحاجات اللي الشخص اللي انت متعلق به بيحبها.
*ولو لقيت نفسك بتتنازل عن حقوقك طول الوقت
لو حسيت ان الشخص اللي انت مرتبط به عامل زي الادمان بالظبط.
*ممكن كمان لو انت متعلق بشخص قوي
ممكن يوصل بيك الحال ان انت تأذيه عشان تسيطر عليه , ومخليهوش يبعد عنك
. طبعا كلنا عارفين قصة سيدنا يوسف عليه السلام والسيدة زليخة
وقد ايه هي كانت بتحبه. انا من رأيي ان ده كان تعلق مش حب.
لان هي عرضته للاذي. بصوا هي على قد ما كانت متعلقة بيه. لكن هو لما رفضها دخلته السجن عشر سنين.
وكانت بتعاني جدا جدا لدرجة ان هي كانت بتبكي
بالايام وبالسنين وتحس طول الوقت ان هي مشتاقة له
وقفت حياتها عليه لدرجة ان نظرها ضعف وجمالها راح وكبرت في السن بسرعة.
انا من وجهة نظري ان هو ده التعلق.
على فكرة بقى العكس بيحصل مع الحب. الحب بيقوي المناعة
يعني احنا لما بنكون مع اشخاص بنحبهم هنلاقي ان صحتنا بتكون احسن شكلنا بيكون احلى وبنكون مرتاحين وناجحين كمان في حياتنا.
على فكرة مش الستات بس اللي بتتعلق لا كمان في رجالة بتتعلق جدا بالبنت اللي بيحبها لدرجه
ان هو بيخنقها ويبقى عايز طول الوقت ان هو يسيطر عليها.
وممكن لو سابته وفكرت ترتبط بشخص تاني ممكن يخرب لها فرحها , او يشوه لها شكلها.
وعلى فكرة انا شايفة ان ده كمان ما بيكونش حب على قد ما بيكون انانية.
لان لو لاحظتوا الصفات اللي انا بقولها كلها هتلاقيه دايما هو مركز على نفسه.
يعني لو مثلا انا بحب شخص ومحصلش نصيب اه هزعل بس مش لدرجة ان انا بكون عايزة انتقم منه .
يبقى انا كده اناني ما بفكرش غير في نفسي بس. ما بفكرش كمان في سعادة الشخص التاني.
كمان لما اكون عايزه ان هو يكون معايه طول الوقت , مهتم بيا طول الوقت.
برضه هنا العلاقة بتدور حواليا انا. في انانية.
ما بفكرش هو عايز يكون بيعمل ايه دلوقتي. او ان هو عنده اهتمامات تانية غيري.
طيب ايه الاسباب اللي بتخلي الشخص يكون عنده التعلق الشديد ده؟
- ممكن يكون اتعرض لطفولة قاسية جدا.
- ممكن يكون ما عنديش ثقه بنفسه او بكون فاقدة الامان.
فبيخلي الشخص اللي بيرتبط بيه ده هو مصدر امانه الوحيد.
عشان كده بيحس انه مرتاح معاه وانه متعلق بيه جدا جدا.
معظم الوقت نتيجة التعلق الزيادة بتكون سلبية.
يعني انت لو متعلق بشخص زيادة عن اللزوم ممكن قوي ان هو يسيبك يضايقك يجرحك. ممكن كل ما تتحايل عليه ان هو ييجي يزورك او يقعد معاك فترة اطول تلاقيه بيعمل حجج واعذار و يبعد عني اكتر
على قد ما اتحايل عليه على قد ما هو بيكون عايز يسيبك ويمشي.
طيب دلوقتي انا سمعت الفيديو وعرفت خلاص ان الحالة اللي انا فيها دي تعلق مش حب.
ازاي بقى اقدر اتخلص من التعلق ده
اول حاجة لازم تبقى عارف ان انت بتأذي نفسك وبتأذي شريك حياتك وانك ممكن تفقده بالطريقة دي.
عارفين في قصة سيدنا يوسف امتى زليخة ارتاحت لما امنت بربنا سبحانه وتعالى وحب ربنا ملا قلبها وبقى مصدر طاقتها وامانها هو ربنا وقتها ارتاحت.
واتخلصت من التعلق الزايد اللي كانت عايشة فيه.
فانت كمان المفروض تعمل كده.
ما تخليش مصدر طاقتك البني ادم. لان انت كده هتكون عبد عنده.
*خلي مصدر طاقتك وراحتك وامانك هو ربنا سبحانه وتعالى
وقتها فعلا هتكون مرتاح وما فيش اي حد ممكن يقدر ان هو يتحكم فيك وفي حياتك.
حاجة كمان حب نفسك واهتم بها.
ولازم يكون عندي هدف في الدنيا متبقاش عايش كده من غير هدف.
لأ لازم يكون عندي حاجة في حياتك يشغلك. وقتها هتحس فعلا ان انا مستمتع بحياتك
ولما ترتبط بشخص هيكون هو اللي بيزود سعادتك وهدوئك واستمتاعك
مش بقى انت عايش بيه ومن غيره تموت.
لأ انا كده كده عايش ومرتاح ومبسوط وهو بس بيجي اضافة جديدة وحلوة في حياتي
حاجة كمان بطل تكون اناني وبتفكر بس في نفسك طول الوقت.
لا اعرف ان شريك حياتك هو كمان عنده اهتمامات.
وان طبيعي ان هو اوقات هيكون مش فاضي ليك. هيكون مشغول شوية فلازم تتقبل ده.
واعرف كمان ان كل شخص فينا عنده مميزات وعنده عيوب.
فطبيعي ان الطرف التاني هيكون عنده عيوب. وطالما انت بتحبه المفروض تكون متقبل العيوب دي.
وما احاولش ان انا اسيطر عليه.
طيب لو انت كنت مرتبط بشخص ومحصلش نصيب
وانفصلتم عن بعض لكن انت لسة متعلق بيه جدا لدرجة ان انت حاسس ان حياتك كلها لسه واقفة عليه. ومش قادر ان انت تكمل حياتك بشكل طبيعي.
اسمع الفيديو ده
كيف انسي شخص احببته ؟ ما هي المدة المطلوبة كي ننسى الحبيب السابق؟
انا كده خلصت يا رب الفيديو ان شاء الله يكون عجبكم. لو حد حابب يسألني عن اي حاجة يتفضل على يسأل هنا
ولو عندك مقترحات لمواضيع تانية تحبي ان انا اتكلم فيها. اتفضلي اكتبيها لي في التعليقات.
اشوفكم على خير ان شاء الله. والسلام عليكم ورحمة الله وبركاته
