هل التقل صنعة والمفروض اتعلم ازاي اتقل على خطيبي واطنشه علشان اخليه يتجنن عليه؟
وهل الراجل فعلا مبيحبش غير البنت التقيلة
ولا العكس هو الصح والمفروض ان انا ادلع خطيبي وابينله قد ايه انا بحبه واهتم بيه طول الوقت
علشان يحبني قوي وما يفكرش في ولا بنت غيري.
اتقل عليه واطنشه ولا اهتم بيه وادلعه!!!
الحقيقة ان انا لو اتسألت السؤال ده من كام سنة كنت هرد على طول من غير تفكير طبعا اتقلي.
وان الراجل ما بيحبش غير البنت التقيلة.
لكن بعد ما دخلت في موضوع العلاقات ودرست كويس واخدت دورات وطورت نفسي اتأكدت ان العلاقة الصحية لازم يكون فيها توازن.
مفيش حاجة اسمها ان انا ابالغ اوي ان انا اتعلق بيه زيادة عن اللزوم وابقى انا اللي بدي طول الوقت وبس ومش باخد اي حاجة من العلاقة. وفي نفس الوقت برضه مفيش حاجة اسمها ان انا اتقل زيادة عن اللزوم
يوصل لدرجة الاهمال لان ده برضو بيدمر العلاقات.
ايه اللي بيحصل لما انا بتعلق بخطيبي او بجوزي قوي وبحس ان انا بغير عليه زيادة عن اللزوم , ببقى عايزة اتواصل معه طول الوقت
طبعا انا اللي ببدأ على طول , انا اللي بكلمه انا اللي ببعت له رسايل كل شوية لو ما ردش عليه او مكلمنيش بحس ان انا بتجنن, حتى لو عارفة ان هو عنده ظروف مانعاه ,بس انا غصب عني بحس بخنقة وضيق, لدرجة في بنات بتقولي بحس ان انا مش قادرة اخد نفسي.
مبدئيا ده مسمهوش حب ده اسمه تعلق. وانا هعمل لكم ان شاء الله فيديو قريب هتكلم فيه بالتفصيل عن الفرق بين الحب والتعلق.
ربنا سبحانه وتعالى خالق الكون بنظام معين وخلق الانسان حر
لما انت تقرر بنفسك( انا اسفة على اللي اقوله ) يعني ان انت تتحول لعبد عند شخص تاني ,ما انت لما تتعلق بيه زيادة عن اللزوم لدرجة ان انت مش قادر تاخد نفسك وهو بعيد عنك ده بيكون تعلق وعبوديه
وقتها الكون لازم يتدخل ويديك كده الم جامد
علشان تفوق على نفسك ويحصل التوازن. وتعرف ان التعلق الزيادة ده ما كانش ابدا صح.
علشان كده هتلاقيه دايما الانسان اللي انت متعلق بيه زيادة عن اللزوم يا اما بيعاملك باسلوب مش كويس
او بيتعمد يضغط عليك بيجرحك او بيسيبك او بيتعامل معك بتعالي وغرور.
يبقى احنا عرفنا خلاص ان المبالغة في الحب والتعلق والاهتمام ده مش صح. نفس الحكاية المبالغة في الاهمال
لو انتي بقى عاملة نفسك المرأة الحديدية وما بتسأليش خالص في خطيبك ولا جوزك و مش حطاه اصلا في حساباتك ولا مهتمية بيه ولا بمشاعره. ده برضو تطرف في العلاقة.
التوازن ان انا اخد على قد ما بدي
يعني ان انا ادي للطرف اللي قدامي ادي له حب ادي له اهتمام ادي له رعاية وفي نفس الوقت استقبل برضه انا كمان حب واهتمام ورعاية.
لو فجأة لقيتي نفسك انتي بس اللي بتسألي على خطيبك وانت اللي بتتصلي عليه انت اللي بتشتري الهدايا بتغيري عليه زيادة عن اللزوم
وانت اللي بتبدأي دايما في كل حاجة لازم كده تاخدي وقفة مع النفس وتراجعي نفسك وتوقفي عطاء شوية , تتعلمي تستقبلي لغاية ما يحصل التوازن وبعد كده ترجعي تاني للعطاء.
اي خلل في الموضوع ده للاسف بيدمر العلاقات.
قريب ان شاء الله هنزل لكم فيديو هتكلم فيه عن الفرق بين الحب والتعلق. انا كده خلصت يا رب الفيديو يكون عجبكم. اشوفكم على خير. والسلام عليكم ورحمة الله وبركاته
مجله جنتي
https://gannaty.com/
التواصل الاجتماعي
youtube
https://www.youtube.com/@gannaty77
instagram
https://www.instagram.com/esraagannaty/
twitter
https://twitter.com/lr33MpMYBRayDK1
facebook
https://www.facebook.com/profile.php?id=100092132992651
tiktok
https://www.tiktok.com/@gannatyesraa77
#اسأل_جنتي
