البنت اللي بحبها 👩🦰❤️
أنا شاب عمري 21 سنة وهي عمرها 19 سنة.
قابلت البنت دي في شهر يناير، مع بداية الترم التاني في الجامعة.
اتعرفت عليها بالصدفة لما اشتغلنا مع بعض في نفس مركز الترفيه.
هي كانت طالبة سنة أولي، وأنا كنت في تالتة. هي بدأت الكلية متأخر ترم (قالت بسبب مشاكل عائلية)، وكانت متوترة شوية، فقررت أساعدها وأعرفها على المكان.
خرجنا نتغدى كام مرة مع بعض(في الشهر الأول من الترم) ،ووريتها الجامعة ولففتها فيها شوية.
اتفاهمنا مع بعض على طول، وعرفت إني وقعت في حبها فورًا.
المهم، بعد كده، طلبت منها نخرج مع بعض (نرتبط)، بس هي قالت لأ.
قلبي اتكسر، بس علي فكرة هي وافقت اننا نفضل أصحاب (للأسف ما عنديش دليل مكتوب على ده ).
حاولت كذا مرة خلال الترم أوريها قد إيه هي مهمة بالنسبة لي، لكن كانت بتتجاهلني وتطنش كل المجهود والهدايا اللي قدمتها لها.
حصل بينا مشكلة كبيرة لما كلمتها وأنا مش وعيي، ولما حاولت أشرحلها بعد كده أن مكنش قصدي، قالت لي سيبني في حالي وخلاص💔
قضيت الشهر اللي فات في اكتئاب حاد. بفكر فيها كل يوم.
هي عملت لي بلوك على السوشيال ميديا، فمش عارف أشوف بروفايلها، ما حاولتش أبعت لها أي رسالة من ساعة ما الدراسة خلصت. لكن الموضوع بقى فوق احتمالي. قررت أجرب آخر محاولة عشان أوريها قد إيه أنا بحبها.
كنت عارف المدينة اللي هي عايشة فيها (على بعد ساعة مني تقريبًا وعندي قرايب ساكنين قريب – كنا اتكلمنا عن الموضوع ده قبل كده).
بعت لها رسالة وقلت لها إني جاي أقابلها. كنت مخطط أقابلها في كافيه معين وأتكلم معاها عن كل حاجة. بس مرة تانية، ما كلفتش نفسها حتى ترد عليّا.
في نفس الليلة، فتحت إنستجرام وشوفت إنها خارجة تسهر. كان فيه صور ليها وهي ماسكة الكحول (وهي لسه تحت السن القانوني) ولابسة لبس غير لائق شوية (رغم إنها قالتلي قبل كده إنها بتكره السهرات والحفلات). حاسس إنها بقت شخص تاني تمامًا!
بصراحة، اتخضيت شوية واتصرفت بانفعال. قلت لها قد إيه أنا مهتم بيها، وعيب جدا تتجاهلني بالطريقة دي واللي بتعمله ده فظيع.
قلت لها كمان إني هروح الكافيه في اليوم اللي حددته، وإنها المفروض تحترمني ولازم تيجي تقابلني.
هي ما ردتش خالص، لكن النهارده وصلني جواب في البريد. طلعت (إخطار بالتوقف). هي بتقول إنها هتلجأ للقانون لو ما بطلتش “أضايقها”.
إيه اللي بيحصل ده يا جماعة؟ أنا محتاج أعرف إيه اللي ممكن أعمله قانونيًا عشان أتكلم معاها وأتأكد إنها مش فاهماني غلط!
أنا مش عايز أعيش حياتي وأنا عارف إنها بتكرهني.
كمان أنا مش بضايقها ولا قصدي أخوفها أو أذيها، ف ازاي ممكن ترفع قضية عليّا؟ هل الكلام ده صح؟ وهل أنا محتاج محامي عشان أرد على الرسالة دي؟
⭐تعديل:
واو، كل الناس هنا بتتكلم معايا كأني إنسان وحش جدًا.
بس للتوضيح، أنا ما حاولتش أتواصل معاها من ساعة ما وصلني الأخطار. أنا بس بحاول أفكر في الخطوة اللي جاية. مش مصدق إن جروب مخصص للنصايح القانونية ياخد الموضوع بشكل شخصي كده!
💡(طبعا اتعرض لهجوم جامد من المتابعين علي ريديت وقعد يدافع عن نفسة)
⭐دي شوية من رده علي التعليقات:
🌸إزاي ده ممكن يكون تحرش لو مفيش نية للأذى أو التهديد؟
🌸مش المفروض أكون قاصد ازعجها أو أضايقها؟ لا، لا، أنا بالعكس بحاول أهدي الموضوع كله.
🌸مش ممكن أروح المحكمة لو أنا ما عملتش حاجة غير قانونية. مفيش حد هنا أكدلي إن اللي بعمله مش قانوني.
🌸إزاي ده يُعتبر مطاردة؟ مفيش قانون بيقول إن ده مطاردة!
🌸إيه اللي عملته ويُعتبر غير قانوني؟؟؟؟
⭐رد حد من المتابعيين عليه:
أنت محتاج تبعد عن البنت دي وتسيبها في حالها وتطلب المساعدة.
البوست بتاعك عامل زي تجميع لكل “الحاجات اللي الناس الغير مستقرة عاطفيًا بتقولها وبتعملها قبل ما تحصل حاجة خطيرة”. أنت عملت:
🌸– طلبت منها الخروج وهي رفضت.
🌸– ما قبلتش الرفض واستمريت تطلب منها تخرج ورفضتك تاني وأكتر من مره بشكل واضح جدا.
🌸– ما فهمتش إن لو اتعملك بلوك على السوشيال ميديا ده معناه بطريقة واضحة وصريحة “ممنوع تتكلم معايا”.
🌸– بتراقبها على الإنترنت بشكل مهووس.
🌸– رحت وراها لمدينة تانية من غير ما تسألها (بعد كل ده) علشان تحاول تجبرها على لقاء هي مش عايزاه.
🌸– هاجمت شخصيتها وأدخلت في حاجات ملكش دعوي بيها ومتخصكش.
🌸– مقتنع إنك ممكن تجبرها على الكلام معاك بالعافية وفاكر انها “مديونة” ليك بكلام بعد ما قالتلك بوضوح أكتر من مره إنها مش عايزة تكون في أي علاقة معاك.
بجد، لازم تطلب مساعدة من مختص. التصرفات دي ممكن توصلك انك تتفصل من الجامعة وتتس/*جن.
بصراحة، أنت محظوظ إنها لسه مابلغتش عنك للجامعة لأن موقفك فعلاً خطير. امشي، بعيد عنها خالص ومتتصلش بيها ده تاني أبدًا.
⭐تحديث:
أول حاجة، عايز أطمن الكل إني مكلّمتش البنت دي تاني خالص.
أنا ندمان علي تصرفاتي معاها واني خوفتها كده.
جزء مني عايز أتكلم معاها وأعتذر لها، لكن عارف من الكورسات اللي أخدتها إن ده:
1. ممكن يخليها تعيش التجربة المؤذية تاني.
2. هيكون تصرف أناني لأن هدفي أني اريح ضميري مش علشان أساعدها أو يخليها تحس أفضل.
3. مش عايز أغلط وأستغل الاعتذار واخليها تحس إنها مضطرة ترجع تتكلم معايا تاني. عرفت من الكورس إن الرجالة بيعملوا كده كتير.
أنا مش عايز أوجعها تاني، وعلشان كده هحاول أتعامل مع إحساسي بالذنب من غير ما أكلمها أبداً.
كنت متضايق جدًا بعد آخر بوست كتبته هنا.
بصراحة، عايز أعترف إني جيت هنا أدور على تأييد وموافقة علي تصرفاتي، مش طلب مساعدة.
كان عندي إحساس غلط بالاستحقاق، خلاني أفتكر إن محدش ممكن يختلف معايا. بس طبعًا، مئات الناس قالولي إني كنت غلطان جدًا، ووصفوني إني مفترس، ومطارد، ومحتاج مساعدة. وكل الناس دي عندهم حق.
مش عارف إيه اللي حصل، بس حاجة جوة دماغي اتغيرت لما شفت الكومنتات دي (رغم إني كنت عدواني وردودي كانت وحشة على الناس اللي انتقدوني).
رحت علاج نفسي بعد البوست بأسبوع.
كنت عارف إن في حاجة غلط، بس كنت لسه في حالة إنكار. كنت فاكر إني محتاج مساعدة عشان أتغلب على وجع القلب. مكنتش مدرك إن المشكلة أكبر من كده.
بعد كذا جلسة، بدأت أشوف دكتور نفسي كمان.
في النهاية، حصلت تغييرات كتير في حياتي خلال الثلاث شهور ونص اللي فاتوا. الكورس اللي باحضره مدته سنة، وأنا بحضر من شهر بس، لكن اتعلمت حاجات كتير جدًا لحد دلوقتي.
عرفت أن السلوك الغلط كان بأرادتي وباختياري. علشان كده سهل أتغير للأحسن.
المعالج طلب مني أسيب المدينة خالص وفعلا عملت كده ورحت أعيش مع عمتي.
اتعلمت كمان قد إيه مهم يكون عندي أصحاب يدعموني، عشان كده كونت صداقات مع شباب وبنات في الشغل. بيعزموني عندهم عشان نلعب فيديو جيمز مع بعض.
شكرًا لكل الناس اللي قالولي الحقيقة زي ما هي، الحمد لله دلوقتي كل حاجة بقت افضل.
(القصة حقيقية مترجمة من ريديت)
