افكار ومواضيع للتحدث في فتره الخطوبه
السلام عليكم ورحمة الله وبركاته. ازيكم يا بنات؟ ان شاء الله تكونوا بخير. انا كنت لسة قريب منزلة فيديو عن فرق الكلام بين الستات والرجالة. وقلت لك ايه الحاجات اللي تحاولي انك تراعيها وانت بتفتحي حوار مع جوزك او مع خطيبك؟ بس دايما بتسأل السؤال ده. انا مش لاقية مواضيع اتكلم فيها مع خطيبي؟ او محتاجه افكار ومواضيع للتحدث في فتره الخطوبه
انا انهارده ان شاء الله هقول لك مقترحات لمواضيع ممكن تتكلمي فيها.
افكار ومواضيع للتحدث في فتره الخطوبه
في الاول بس عايزة اقول لك على حاجة. مش اول ما تعلني رغبتك في الكلام ده هيحول جوزك لمكنة كلام
يعني ايه؟
يعني ما تروحيش تقولي له احنا بقى لنا كتير ما اتكلمناش مع بعض. يلا نتكلم! هتلاقي الرد اللي بيقولهولك نتكلم في ايه؟ وهتحسي ان دماغه بقت فاضيه فجأة كده وما فيش ولا موضوع في الدنيا جه في دماغه.
فالصح لو انت حابة انك تتكلمي في موضوع معين او في اي موضوع عامة يعني
ابدئي انتي بالكلام وهتلاقي هو كمان بيشاركك في الحوار. لكن ما تروحيش تقولي له يلا نتكلم.
بيتهيأ لي لو احنا سألنا دلوقتي اي راجل ايه مواصفات البنت اللي نفسك انك ترتبط بها؟
اول حاجة هيقول مواصفاتها مثلا كذا (مواصفات شكليه او اخلاقيه) تاني حاجة هيقول نفسي ارتبط ببنت دمها خفيف كده وفرفوشة وبتحب المرح.
فعلشان كده يا بنات ابوس ايديكم كفاية نكد. انا بيتهيأ لي ان الرجالة اللي بتتحمل نكدنا دي خلاص انقرضت مع الديناصورات 😆
يعني حضرتك مش زي الشاطرة كده اول ما يتصل بيكي
تقولي له انا زعلانة ومخنوقة ومين جرحني, ومين ضايقني, كل ده يعني يا ريت بلاش تتكلمي فيه. انا عايزاه اول ما يفكر فيك اول حاجة تيجي في باله ضحكتك وابتسامتك. تمام, عايزاه حتى لو هو تعبان ومخنوق
يبقى عارف ان هو اول ما هيتصل بك انت مصدر البهجة ليه, انت اللي هتخرجيه من الحالة دي.
مش يبقى ماسك التليفون وهيتصل بيك حاطط ايده على قلبه ويقول ربنا يستر عشان ما تنكدش عليه كالعادة 😹
ماشي يا بنات اتفقنا , علشان كمان لو لا قدر الله حصلت حاجة وزعلتك فعلا ان هو يتعاطف معاك.
يعني لو انت الطبيعي بتاعك انك على طول زعلانة وعلى طول متضايقة. فهيتعاطف معاكي ليه؟
لكن لو انت الطبيعي بتاعك انك على طول بتضحكي وبتهزري وبعدين حصل موقف ضايقك وعبرتي عن ضيقك ده
هيحس فعلا ان في تغيير وهيقدر بجد ان هو يتعاطف معاك عشان هيعرف ان دي مش الحالة الطبيعية بتاعتك.
طيب انا هتكلم في ايه؟ افكار ومواضيع للتحدث في فتره الخطوبه
اول حاجة الخيال
بيتهيأ لي من واحنا صغيرين كلنا كنا بنحب الافلام الخياليةوكانت بتعجبنا جدا. ولغاية دلوقتي نسبة كبيرة مننا بتنجذب برضو لافلام الخيال ودايما بتحقق ايرادات عالية جدا.
علشان كده انا عايزاكي تعيشي جوزك او خطيبك في الخيال ده. هتقولي لي ازاي يعني؟؟؟
يعني مثلا هو بيتصل بيكي. بدل ما تردي عليه على اساس ان انت خطيبته اتقمصي اي شخصية تانية وعيشيها.
قولي له مثلا على فكرة انا طالبة اوردر والاوردر اتأخر عليه!!! لا لا لا انتم الخدمة عندكم سيئة جدا. انا مش هتصل بيكم تاني. وعيشيه حالة كأنك انت عميلة وطالبة اوردر من محل معين
هتلاقيه هو كمان بيشاركك وهتبتدي المكالمة بمرح.
ممكن مثلا تقولي له احنا شركة الاتصالات وانت اتأخرت في الاتصال بخطيبتك عشان كده احنا خلاص هنشيل منك الخط 😆
يعني اعملي ميكس كده بين الخيال وبين المرح
فعايزة كل واحدة كده فيكم تشغل دماغها وتألف كده قصة معينة وتعيش فيها مع خطيبها. تمام
اه عايزة اقول لك على حاجة لما تكون كمان بداية المكالمة
صوتك كله ضحكة وكله ابتسامة , وعاملة حاجة مش تقليدية فده هيكسر الروتين اللي ما بينكم. تمام يعني كل فترة كده ممكن تعملي الحكاية دي. وفي نص المكالمة برضه ممكن تسألي سؤال برضو خيالي ممكن تقولي له مثلا
تخيل كده ان احنا كسبنا مليون دولار طب هتديني منهم كام ؟طب هنعمل بيهم ايه ؟ ممكن مثلا تقولي له لو احنا عايشين في عصر تاني تخيل ان انت مثلا سي السيد وانا امينة طب كنت هتخرجني برضو ولا هتحبسني
يعني عايزة كل واحدة كده زي ما قولتلك شغلي دماغك وهتلاقي في افكار كتير
الحاجة التانية اللي ممكن نتكلم فيها ذكريات الماضي.
طبعا ما حدش فينا ما عندوش ذكريات حلوة حصلت له ايام المدرسة مواقف مثلا كوميدية ممكن تكون حصلت بينك وبين زمايلك ممكن انك تشركيه فيها
مواد معينة مثلا كنت بتحبيها او مادة ما كنتيش بتحبيها.
المدرسين اللي كانوا قريبين منك. يعني شوفي كده افتكري ذكريات الماضي وهتلاقي اكيد كلام كتير ممكن تتكلمي فيه
ممكن برضو تقولي له الالعاب اللي كنت بتلعبيها وانت صغيرة مع اخواتك او مع اصحابك. اي رحلة او مكان روحتيه مع اهلك برضه او مع اصحابك. ذكريات العيد ذكريات المصيف زي ما قلت لك كل واحد فينا عنده اكيد ذكريات كتير ممكن ان هو يحكيها
وعلى فكرة ذكريات الماضي دي هتخليه يسمعك باهتمام وهو كمان هيفتكر حاجات ويحكيها لك وهتحسوا ان انتم قربتوا من بعض اكتر.
تالت حاجة الحاضر
سواء كنت بتدرسي او بتشتغلي او قاعدة في البيت
في احداث يومية بتحصل لك فاكيد برضو بتحكيها لخطيبك. حتى لو حدث واحد بس حصل لك. طب لو انت حاسة كده بروتين وما فيش اي حاجة خالص جاية في دماغك تتكلمي فيها دلوقتي؟
ما فيش حد فينا ما بيدخلش على النت واكيد كل يوم بتشوف حاجات
جديدة قصص مواضيع فيديو عجبك فكل ده برضو ممكن تحفظيه وتشيليه في دماغك وتحكي لخطيبك مثلا عجبني حاجة معينة قريتها قصة لفتت نظري وهكذا
رابع حاجة المستقبل.
لو انت عندك طموحات معينة نفسك تعمليها ان شاء الله في المستقبل. ممكن تشركيه فيها.
ممكن تقولي له مثلا الفترة اللي جاية ان شاء الله, انا بتمنى اطور نفسي او مثلا اتعلم حاجه جديده.
وتسأليه برضو. انت نفسك تتعلم ايه؟ او تطور نفسك في ايه؟
ممكن كمان تتكلموا ان شاء الله عن بيتكم. فيه الوان معينة نفسك تعمليها تقولي له عليها وتسأليه برضه انت ايه الالوان اللي بتحبها. لو فيه مثلا صور معينة عجبتك على النت برضه. نفسك تعملي زيها في البيت. ممكن تشيلي الصور دي وتفرجيه عليها مثلا نفسي
انتريه شكله زي كده. او مطبخ نفسي اعمله لون كده.
ده كله برضه مواضيع للكلام ممكن تتكلموا فيها. ممكن كمان برضه تسأليه ان شاء الله ايه رأيك لو ربنا كرمنا ببنت هنسميها ايه؟ طب لو خلفنا ولد هنسميه ايه؟ وهكذا
ولو انت كمان زوجة مش معنى انك اتجوزتي وخلفتي ان خلاص ما يبقاش عندك احلام وطموحات. لا لازم كمان تفكري ان شاء الله في المستقبل. نفسك تطوري نفسك في ايه؟ واولادك كمان ان شاء الله
نفسك ان شاء الله اولادك يدرسوا ايه ويتعلموا ايه وكل ده برضو ممكن تشاركيه مع جوزك.
وعلى فكرة من الحاجات كمان اللي بتقوي العلاقة جدا جدا بين الزوجين ان هم الاتنين يبقى عندهم احلام مشتركة
فياريت كده انت وجوزك تخططي ان شاء الله دايما كمان خمس سنين بتحلموا بايه؟ وتحاولوا تنفذوا الاحلام دي مع بعض ان شاء الله.
اخر حاجة الاهتمامات
لو في بينك وبين جوزك او خطيبك اهتمامات مشتركة
دي برضو حاجة كويسة جدا بتفتح مجال الكلام. سواء هواية معينة اه لعبة معينة انتم الاتنين بتحبوها. اه شخصية بتابعوها.
مواضيع تانيه للقراءه :
