خطيبتي عايزة تنفصل عني بسبب مقلب!!!
أنا شاب عمري 24 سنة، وخطيبتي عمرها 23.
خطيبتي وعيلتها قرروا يعملوا رحلة تخييم، وهي رحلة عائلية كبيرة هيكون فيها خطيبتي وأسرتها، كمان عمها وعمتها وأولادهم. خطيبتي قالت لي على كل حاجة تخص الرحلة، وعرفت المكان بالضبط، فقررت أستفيد من الموضوع ده.
رُحت لبيت خطيبتي وسلمت عليهم قبل ما يمشوا، وبعد كده ركبت عربيتي وذهبت لمكان المخيم. أنا عارف المكان ده كويس وعرفت أخبّي عربيتي بعيد عنهم، ووقفت في مكان أراقبهم منه.
لما الليل جاء، لبست زي دب وحاولت أخليه شكله دب بري 🐻، واستنيت لما العيلة كلها اتجمعت على نار المخيم، وبدأت أحرك الأشجار وأعمل أصوات. العيلة لاحظت بس محدش اهتم قوي، فبدأت أعمل أصوات أعلى. في حد من العيلة اتحرك لمكان الصوت، وكان واضح الذعر عليهم كلهم.
بمجرد ما الشخص قرب مني، جريت عليهم وأنا بعمل أصوات، وبدأت أهز خيامهم وأرمي الكراسي في كل حتة، وجريت ورا ابن عمها. وقتها سمعت حمايا بيصرخ ويقول: “هاتوا المسدس!”
عرفت إن لازم أنهي المقلب، فخلعت الزي وقلت لهم إنه مقلب. كلهم صرخوا عليّ وعملوا دوشة جامدة، ومدير المخيم طردني لما عرف اللي حصل.
النهاردة خطيبتي بعتت لي رسالة بتقولي إنها بتفكر جدياً في الانفصال عني، وهي محتاجة وقت للتفكير علشان تعرف تاخد قرارها. أنا دلوقتي عايز أعتذر وأنقذ العلاقة. محتاج نصايح، إيه اللي ممكن أعمله علشان يقبلوا اعتذاري؟؟؟
تحديث
حاسس بالإحراج جداً بسبب اللي حصل. بصراحة فكرت إني ما أعملش تحديث، بس محتاج أعبّر عن إحباطي.
الليلة اللي فاتت، عيلة خطيبتي عملت حفلة شواء، وخطيبتي أقنعت باباها إني أجي الحفلة. هو كان الأول رافض، بس بعد محاولات وافق بشرط إني أقدم اعتذار صادق عن المقلب اللي عملته فيهم.
دخلت حديقتهم وكان موجود كل العيلة، قعدت جنب خطيبتي وبدأت أعتذر، قلت إن المقلب كان غير مناسب ومش ناضج، وقلت أنا آسف علشان أفسدت عليهم رحلة المخيم. حاولت يكون اعتذاري صادق على قد ما أقدر، ولما خلصت كلامي استنيت رد منهم، بس كلهم كانوا ساكتين خالص وبيبصوا لي وخلاص.
بعد كده عم خطيبتي همس بحاجة لحمايا، وفجأة انفجروا في الضحك! مش عارف هو قال له إيه، بس حمايا قال لي إنه مش قابل اعتذاري وطلب مني أمشي.
فقدت أعصابي وقلت لهم: “ماشي، اذهبوا إلى ********** كلكوا ********!”
لما مشيت من الحديقة، خطيبتي جت ورايا وقالت لي إنها خلاص هتقطع علاقتها معايا، وإنّي غير ناضج ومتسرع جداً. قالت لي: “سيبني أنا وعيلتي في حالنا وابعد عننا خالص!”
حاولت أعتذر وقلت لها: “أنا آسف يا حبيبتي، أرجوكي، أنا عايز فرصة تانية! أرجوكي، أوعدك مش هعمل كده تاني!”
قعدت أتحايل عليها كتير، لكنها رفضت وقالت لي: “مستحيل يكون في أي فرصة تانية، ومستحيل تتغير!”
صرخت عليها وشتمتها، وقعدت أخبط برجلي في السياج الخشبي الموجود في الحديقة وكسرته، وبعدها مشيت.
دلوقتي مش عارف أعمل إيه. أنا عايز أثبت لها إنّي ممكن أتغير وأقدر أسيطر أكتر على أعصابي. أصلح الموقف إزاي؟
تحديث
مش قادر أبطل تفكير فيها، حتى مش عارف آكل ولا أنام. مفيش حاجة بتخليني سعيد، وطول الوقت عمال أفكر في علاقتنا وزعلان جداً علشان الانفصال. أنا عايز أرجع لها تاني.
تحديث
فكرت ألبس زي الدب مرة تانية، مش علشان أخوفها، لأ… بطريقة رومانسية.
فكرتي إني ألبس الزي 🐻 وأروح عند بيتها وأمسك استريو وأشغل أغنية رومانسية بصوت عالي علشان تسمعها. هو الاستريو قديم بس لسه شغال.
عندي أمل تقبل اعتذاري وتعتبره اعتذار لطيف. أنا عارف إن الطريقة مبتذلة شوية، بس عندي أمل تحب طريقتي وتتقبل اعتذاري.
تحديث
لبست زي الدب 🐻، أخدت الاستريو وروحت على بيت خطيبتي بالليل. إحنا الاتنين ساكنين في نفس الحي، فقررت أمشي من طريق مختصر في الغابة.
وقفت قدام البيت وأنا ماسك الاستريو. هو أصلاً جهاز قديم جداً والصوت ماكنش عالي قوي، وبصراحة كنت خايف أخاطر وأقرب من البيت أكتر.
وقفت أبص على شباك أوضة خطيبتي، شُفتها قاعدة على السرير وبتلعب بالموبايل. كانت وحشاني وفرحان إني شوفتها 😍.
بعدها لقيت حد من جيرانهم واقف في البلكونة وبيبص لي ومعاه تليفونه، الظاهر إنه اتصل بالشرطة.
كنت خايف قوي، وعملت حاجة غبية… قررت أدخل بيت خطيبتي!
حاولت أفتح الباب الخلفي للحديقة، لكن حماتي شافتني وخافت وصرخت!
جريت على طول على الغابة، وأنا بجري وقع مني الاستريو، ولما وطيت علشان أخده، ظهري وجعني والوجع أثّر على رجلي الشمال، فسيبته على الأرض وفضلت أجري وأنا بعرج، وأشتم نفسي علشان خطتي فشلت.
الأسوأ من كده إن خطيبتي بعتت لي رسالة النهاردة الصبح بتقول لي إنها شافتني، وإن ده آخر تحذير قبل ما تبلغ عني بتهمة الملاحقة!
قالت لي: “مستحيل نرجع لبعض تاني، كمل حياتك بعيد عني!”
أنا دلوقتي زعلان ومكتئب، وكمان رجلي وظهري بيوجعوني قوي، يعني بعاني عاطفياً وجسدياً. مش عارف أعمل إيه؟؟
تحديث
خطيبتي بعتت لي رسالة بتهددني إنها هتعمل أمر قضائي ضدي علشان ما أقدرش أقرب منها تاني.
أنا عارف إنه مجرد تهديد، بس عايز أتأكد: لو عملت كده فعلاً، هل ده ممكن يأثر على مستقبلي؟ هل هكون مسجل إني ملاحق؟ وممكن ما أقدرش أشتغل في وظيفة كويسة بعد كده؟
تحديث
مش عايز أدخل في تفاصيل، بس أنا سيبت جهاز استريو في بيت خطيبتي السابقة، وتاني يوم والدها بعت لي رسالة فيها صورة الجهاز وهو مدمر بالكامل وجنبه مضرب بيسبول!
قال لي في الرسالة: “دي صورة رأسك لو فكرت تقرب من بيتي مرة تانية!”
دلوقتي أنا عايز أعرف، هل لازم أخد إجراء ضده لأنه دمر جهاز الاستريو بتاعي وكمان هددني؟ طيب إيه الإجراءات اللي المفروض أعملها في الحالة دي؟
تحديث
بقالي أسابيع عمال أفكر إزاي أرجع لخطيبتي السابقة، لكنها رافضة الرجوع تماماً، وفي مشاكل كتير مع عيلتها.
دلوقتي عايز أنساها، بس مش عارف أعمل إيه.
أخويا الكبير معزوم على فرح قريب، وأنا زعلان قوي، لأنّي كنت متفق مع خطيبتي نحضر الفرح ده مع بعض.
والمؤلم بجد إني شفتها عارضة الفستان اللي كانت هتلبسه في الفرح للبيع على الفيس بوك!
مش عارف أنسى الذكريات وكل الوقت اللي قضيناه مع بعض، وزعلان علشان هي سابتني بسبب غبائي وتصرفاتي المتهورة.
ممكن تساعدوني إزاي أتغلب على حزني؟
تحديث:
طبعًا كلكم عارفين إن الهالوين كان امبارح.
أنا عادةً مش بلبس زيّ الهالوين في السن ده، بس فكرت أروح مع ابن عمي الصغير نتمشى مع بعض في الحي.
ما عنديش أي أزياء تنكرية غير زيّ الدب 🐻، فلبسته.
مشينا شوية في الحي، وبعدين وصلنا للشارع اللي ساكنة فيه خطيبتي.
كنت عارف إنه ممكن أعدي على بيتها، بس عادي، ماكنتش قلقان.
قلت أكيد باباها مش هيكون موجود هناك دلوقتي.
لما وصلت، اكتشفت إنه كان واقف ومعاه علبة حلويات بيوزعها. أول ما شفته، مسكت ابن عمي وجريت الناحية التانية بسرعة، بس للأسف كان شافني.
صرخ بصوت عالي وقال: “أنا شايفك!”
مسكت إيد ابن عمي وجرينا لحد البيت.
بعد حوالي ساعة، الشرطة وصلت بيتي وقالولي إن والد خطيبتي رفع عليّ دعوى قضائية، وأنا دلوقتي مستني ميعاد المحاكمة.
طبعًا ده ظلم! أنا أصلًا ماكنتش ناوي أقرب منهم، كل الموضوع إني كنت بحتفل بالهالوين مع ابن عمي.
تفتكروا، إزاي أخرج من الموضوع ده وأقول إيه في المحكمة!
(القصة مترجمة من ريديت).
