أنا معجبة بزميلي في الشغل واتعلقت بيه . لكنه يتجاهلني . كيف تتعامل الفتاة مع الشاب الذي يتجاهلها؟

-صباح الخير يا وائل.
=صباح الخير يا هبة.
-بداية اسبوع جديدة بقى ربنا يعيننا على الشغل يا رب.
=اه اه ان شاء الله.
-عملت ايه في الاجازة امبارح؟
=ما فيش عادي زي كل مرة.
-انا شفتك منزل story امبارح بس استغربت بصراحة كان الوقت متأخر قوي
=استغربتي لي يعني؟.
– يعني ان انت بتفضل في الشارع كل ده استغربت يعني مفيش حد يسأل عليك مثلا ؟
=قصدك يعني حد زي مين ؟
-يعني ممكن تكون مثلا متكلم على حد او حاجة.
=ايه يا هبة انت مش عارفة ان انا مش خاطب ولا ايه! لأ لأ ما فيش اي حد في حياتي.
-اه طب ليه بقى!
= ليه ايه ؟
-ليه يعني ما فيش حد في حياتك؟ يعني قصدي ليه ما خطبتش لغاية دلوقتي ؟
=ما فيش لسة بدور على بنت الحلال.
-يعني معقولة احنا كل البنات اللي حواليك ما فيش ولا واحدة فينا لفتت نظرك خالص؟
=طبعا كلكم بنات كويسين جدا. والحقيقة ان انتم زي اخواتي
-اخواتك؟ 😞اه. طيب انا هروح دلوقتي اكمل شغلي. عايز مني حاجة؟
-لا ياهبه شكرا.

بعد ما اتخرجت على طول اشتغلت في شركة لمدة اربع سنين. والحقيقة ان طبيعة شغلي في الشركة دي خلتني اتعرف على كمية بنات كتير جدا جدا والحقيقه ان في منهم كتير جدا ارتاح لي وقعد معايا وحكى لي مشاكله. وانا كل فترة كده والتانية ان شاء الله هحكي لكم مشكلة عاطفية من المشاكل اللي مرت علي. واكيد طبعا من غير ما اقول اي تفاصيل شخصية عن صاحبة القصة الحقيقية.

واحدة واحدة من القصص اللي اثرت فيا جدا هي قصة لبنت حقيقي انا حبيتها جدا جدا. قد ايه كانت طيبة ومحترمة. والبنت دي كانت معجبة بشاب شغال معانا في الشغل. والحقيقة برضه ان الشاب كان اخلاقه عالية جدا جدا. وكان محترم وفي حاله. وكمان تعليمه كان كويس اوي

مرة كده واحنا قاعدين بنتغدى مع بعض قالت لي هي قد ايه معجبة بيه. وطلبت مني لو اقدر اشوف وسيط يتكلم مع الشاب ده ويحاول يلفت نظره لها. او يعني لو يعرف بطريقة كده غير مباشرة لو هو بيدور على عروسة وبعدين يرشحها ليه انا طبعا ما كانش عندي مشكلة ووافقت ووعدتها ان انا ان شاء الله هعمل ده.

والحقيقة ان هي جت تاني يوم غيرت رأيها وقالت لي ارجوكي كأني ما قلتلكيش اي حاجة. وبلاش تتكلمي مع وسيط.

عدت الايام والاسابيع والشهور وبعد كده اكتشفنا ان هو حدد خطوبته على بنت تانية وكان بيعزم طبعا كل اصحابه اللي موجودين في الشركة.

هي طبعا اتأثرت جدا وزعلت وفاكرة ان هي وقتها قالت لي طب ليه? انا حاولت كتير ان انا المح له ان انا معجبة بيه. ايه اللي خلاه ما يفكرش فيه? وليه خطب بنت تانية وما خطبنيش

انا الحقيقة ما قدرتش اتكلم ولا اقول لها اي حاجة. كل اللي عملته ان انا حاولت ان انا اواسيها واخرجها من اللي هي فيه. وطبعا متأكدة ان كل محاولاتي ما كانش لها اي لازمة. لان اكيد مشاعر الحزن اللي كانت حاسة به وقتها اكيد اكبر من اي كلام ممكن انا اقوله عشان اخفف عنها

الحقيقة انا افتكرت القصة دي وقعدت افكر مع نفسي. طب فعلا ليه? ليه الشاب ده رغم ان هو اكيد اخد باله من تلميحاتها وان هي معجبة به قرر ان هو يتجاهل مشاعرها واختار بنت تانية. وطبعا في احتمالات

اول احتمال ان هو ممكن يكون مش بيبادلها نفس الشعور.

ولازم تبقي عارفة طالما انت لكي حق الرفض او القبول يعني لو اتقدم لك عريس من حقك طبعا تقولي اه او لا. لو بدلنا الادوار وقررت ان انت تلمحي للشاب فلازم تتقبلي ان هو كمان اكيد عنده نفس الحق

الاحتمال التاني انه ممكن يكون اخد انطباع غلط على البنت.

يعني هو ممكن يكون ترجم تلميحاتها دي على انها جرأة زيادة منها. او انه مثلا زي معظم الشباب بيفضل ان هو اللي يبدأ وان هو اللي ياخد الخطوه الاولى.

ممكن كمان يكون هو وقت ما هي كانت بتلمح له.

هو وقتها كان مثلا بيفكر في بنت تانية.

طيب لو اي بنت مكانها اتحطت في نفس الظروف واتعرضت للرفض. المفروض تتصرف ازاي؟

اول حاجة لازم تعيشي مشاعر الحزن.

ما تقعديش تضحكي على نفسك وتقولي انا كويسة ومفيش حاجة مزعلاني. عيشي مشاعر الالم وخليكي عارفة ومتأكدة ان هي فترة وهتعدي ان شاء الله.

حاجة كمان حاولي على قد ما تقدري ان انت تشغلي نفسك.

اشتغلي اكتر اقعدي مع اصحابك. قضي وقت مع عيلتك. لان كل ما قعدتي لوحدك فترة اطول كل ما حسيتي بالالم

اكتر اوعي تخلي الرفض يخليكي تفقدي الثقة في نفسك.

فكري بايجابية خليكي عارفة كمان ان الرفض اللي انت اتعرضتي له مش معناه ابدا ان انت انسانة فاشلة. او ان انت غير مرغوب فيك.

ولو كنت مضطرة ان انت تتعاملي معاه

زي ان هو مثلا يكون زميلك في الشغل فحاولي على قد ما تقدري ان انت تتعاملي عادي جدا وكأن ما فيش اي حاجة حصلت واوعي تبيني حزنك قدامه او اوعي يخطر في بالك ان انت تروحي تسأليه ليه عملتي كده؟ لان التصرف ده للاسف معناه ان انت بتقللي من نفسك

انا كده خلصت يا رب الفيديو يكون عجبكم. بتمنى كل بنت بتسمعني دلوقتي ربنا يرزقها الزوج الصالح وتعيش معه حياة سعيدة. اشوفكم على خير والسلام عليكم ورحمة الله وبركاته.

مصدر