طلبت من أخويا يدفع لي 30 ألف دولار؟
عملت عشاء عائلي في بيتي، كان موجود عيلتي وكمان أخويا وأطفاله اللي عمرهم 4 و 8 سنين. أنا متجوزة، قبل ما أتجوز لما كنت لسه في بداية خطوبتي كنت دايمًا بلبس خاتم الخطوبة💍 اللي ثمنه 30 ألف دولار، بس بعد كده قررت أحتفظ بيه في علبة جوه دولاب الملابس، وبلبسه في المناسبات المهمة.
في يوم العزومة، كنت مشغولة بحضّر ترابيزة السفرة. أولاد أخويا كانوا بيلعبوا وأخويا مكنش بيشرف عليهم. في الوقت ده، أولاد أخويا دخلوا غرفة نومي من غير ما حد ياخد باله، قعدوا يلعبوا في كل حاجتي وكمان خاتم خطوبتي.
لما حسينا بغياب الأطفال قعدنا ندور عليهم، الأطفال لما سمعوا صوتنا خافوا جدًا لأنهم عارفين إن مش مسموح لهم يطلعوا الطابق العلوي، من خوفهم طلعوا يجروا على الحمام وكان معاهم خاتم خطوبتي.
للأسف الخاتم وقع في الحمام. اتصلنا على السباك يكون معاه مصيدة مخصوصة للحاجات دي علشان يحاول يساعدنا، للأسف السباك قال الخاتم اختفى للأبد 😩
أنا معايا الإيصال الخاص بالخاتم، اتصلت بعد كده بأخويا وبعت له نسخة من صورة الإيصال، علشان أتأكد من ثمن الخاتم، وطلبت منه يدفع لي تعويض.
رد وقال لي إني أكيد غبية، علشان إحنا عيلة وكمان دول مجرد أطفال، ورفض يدفع لي ثمن الخاتم! عرفته إني هرفع عليه قضية علشان يدفع لي التعويض.
دلوقتي كل شوية حد من عيلتي يتصل بيّا، بيقولوا لي مينفعش أرفع قضية على أخويا ده تصرف مش مسموح، ولازم أخلي الموضوع يعدي.
ملحوظة:
🌿 للأسف جوزي مكنش عامل تأمين على الخاتم. لما سألته قال لي إنه قعد يأجل الموضوع وبعدين نسي يأمن عليه.
🌿 أخويا بيقول إنه مش معاه حتى 100 دولار يدفعها لي كل شهر علشان يسدد ثمن الخاتم، ورفض كل الحلول إنه يقسط المبلغ على دفعات.
🌿 كمان اعتذار أخويا كان من غير طعم مجرد كلمة آسف من غير أي مشاعر، لأنه بيقول لي دول مجرد أطفال والتصرف ده طبيعي في سنهم، وهو مش المفروض يتحمل مسؤولية ضياع الخاتم، مع إنه كان المفروض يشرف على الأطفال وقت لعبهم لما أنا كنت مشغولة بالتنظيف وبحضّر العشاء.
🌿 كمان أنا مش مصدقة خالص إن أخويا ومراته ميقدروش يدفعوا ثمن الخاتم لأن دخلهم كبير جدًا. كمان مش بيدفعوا إيجار للبيت لأن بابا سايب لهم بيته القديم هدية علشان يعيشوا فيه (البيت اللي يساوي دلوقتي أكثر من 3 مليون دولار) في كاليفورنيا. بابا سايب لهم البيت لأنه اشترى لنفسه بيت جديد.
أنا زعلانة قوي لأني كنت بحب الخاتم💍 بتاعي قوي.
أنا اتكلمت مع محامي عيلة جوزي علشان يرفع قضية. في الوقت ده بفكر أعيّن محقق خاص علشان يقولي أخويا يقدر فعلاً يدفع المبلغ ده ولا ميقدرش!
(القصة مترجمة من ريديت، أصحاب القصة أجانب).
