أنا بعدت عن عيلتي….
أنا عملت حاجة دلوقتي وحاسة بتأنيب ضمير جامد، وبجد محتاجة حد يوضح لي الأمور.
أنا بنت عندي 25 سنة، وكل اللي هقوله هنا من وجهة نظري أنا……….لكن أصحابي بيقولوا إن من وجهة نظر أهلي والعيلة الموضوع مختلف تمامًا.
طول عمري كنت حاسة إن أهلي بيفضلوا أختي عليا. هي موهوبة في الرقص، وعشان كده حياتنا كلها كانت عبارة عن حاجات ليها علاقة بيها هي وبس، زي البروفات، الحفلات، والسفر عشان تجارب الأداء، وهكذا.
أنا أكبر منها بثلاث سنين، وبسبب ده، عمرنا ما كنا قريبين من بعض.
جدتي توفت في عيد ميلادي. والدتي اتأثرت قوي بموتها، وكل سنة كانت بتعيط في يوم عيد ميلادي، ومش قادرة تحتفل معايا. عشان كده دايمًا كنت بعمل حفلات عيد ميلاد صغيرة وبسيطة، لكن أختي كانت بتعمل حفلات كبيرة.
دلوقتي عيلتي بتقول لي إن السبب في دة. إن أهلي مكنش معاهم فلوس كفاية يعملوا الحفلة اللي كنت عايزاها (كان نفسي في حفلة باربي)، ولما اقترحوا عليا فكرة تانية، أنا زعلت وعيطت.
وقالولي كمان إن السبب الوحيد اللي خلاني أحس إن حفلات أختي كبيرة عشان كان في ناس كتير بيحضروا (أصحابها من الرقص وعيلتهم)، وده خلاها تاخد هدايا أكتر.
لما كان عندي 19 سنة، انتقلت عشان فرصة شغل، وأهلي ما اهتموش يسألوا عن شغلي أو يساعدوني في الانتقال. عيلتي بتقول إن السبب الحقيقي في دة لأني كنت “بصد” أي حد يحاول يسألني، فافترضوا إني مش عايزة أتكلم.
نرجع بقى للحاضر. أهلي عارفين إني مرتبطة، لكن أنا ما قلتلهمش إني اتجوزت في فبراير. حسيت بما إنهم اساسا مش مهتمين بيا، ليه أشاركهم تفاصيل حياتي؟ ماما كانت بتكلمني مرة واحدة في الأسبوع تقريبًا، الكلام بينا بسيط يعني مجرد بتقولي “أخبارك إيه؟” وخلاص وكنت بحس إنها بتعمل كده من باب الواجب مش أكتر.
يوم الاتنين اللي فات، أهلي اكتشفوا إني اتجوزت (عرفوا من الفيسبوك!) كانوا في حالة هستيريا. عمتي كلمتني وهي منهارة وبتعيط، وسألتني ليه بكرههم كده، وإنهم حاولوا كتير يقربوا مني. وبابا قال لي إني خييبت أملهم بشكل كبير.
رديت عليه وقلتله إنهم مالهمش حق يزعلوا دلوقتي، هما طول عمرهم ما اهتموش بيا ولا بحياتي. قال لي إن ده مش حقيقي تمامًا.
أختي بعتت لي رسالة طويلة، بتقولي أد اية إنا أنانية، وإن مامتي حالتها صعبة من كتر الحزن.
ولا حد منهم فاهم أنا كنت حاسة بإيه طول عمري، وكلهم بيقولوا إنهم كانوا دايمًا مهتمين بيا لكن أنا كنت طفلة مدلعة و دايمًا متوقعة أكتر من اللي يقدروا يدوهولي، وإن اللي أنا عملته دلوقتي”جوازي من وراهم” هو القشة الاخيرة.
جدي، اللي بحبه قوي، بيقول لي إني ألفت قصة في دماغي مش حقيقية وصدقتها وعشت الوهم.
أنا موجوعة جدًا، كنت فاكرة إني عملت الصح بقطع علاقتي بأهلي عشان كنت حاسة إن طريقتهم معايا (محدش كان مهتم بيا وبيحسسوني إني مش كفاية) سبب كافي علشان أبعد عنهم خالص، لكن دلوقتي بيقولوا لي إن دي غلطتي وإن كل ده وهم في دماغي.
هل أنا فعلا غلطانة؟ 🤔
🌹تعديل:
حبيت أضيف حاجة، أنا اتكلمت من أصحابي المقربين من الطفولة – وناس يعرفوني من وأنا صغيرة، لكن مش قريبين مني قوي دلوقتي – وكلهم تقريبًا قالوا لي إني كنت طفلة صعبة. بيحكوا لي عن مواقف من الطفولة أنا فاكرها بطريقة مختلفة تمامًا، لكن هما متفقين إني كنت بعمل نوبات غضب وأتصرف كأني مستحقة لحاجات كتير عشان أجبر أهلي “يحققوا” كل رغباتي.
مش حاسة إن كل الناس دي بتحاول تخدعني أو تتلاعب بيا، خصوصًا صاحبة عمري. الظاهر في حاجة غلط فيّا وفي الطريقة اللي شفت بيها عيلتي طول حياتي.
🌹 تعديل:
امبارح بالليل قعدت قعدة طويلة جدًا مع جدي، الراجل اللي دايمًا كان غالي عليا. هو قال لي شوية حاجات وجعتني قوي، بس أنا شايفة إنها فعلا صحيحة.
جدي راجل كبير وهادي ودايمًا كنت بحسه “معايا” وفي صفي لأنه كان دايمًا بيبذل مجهود عشان يقضي وقت معايا وأنا صغيرة.
امبارح قاللي إني بعدت نفسي عن الناس من وأنا صغيرة.
جدي راجل صادق وعمره ما هيكدب عليا، وكمان هو معندوش طاقة للف والدوران وللحوارات دي.
حاسة إن في حاجات كتير لسه محتاجة أفكر فيها وأهضمها.
جوزي بيحاول يقف جنبي على قد ما يقدر. وبيقولي إنه اتجوزني وبيحب شخصيتي زي ماهي دلوقتي.
أعتقد أني بدأت أفهم إن سبب المشاكل اللي حصلت بيني وبين أهلي وأصحابي القدامى كان غالبًا بسبب “أني كنت أنانية وأستحقاقية”.
أهلي وأختي مش بيتكلموا معايا دلوقتي، وجدي قال لي بصراحة إن الموضوع مش هيتغير بسهولة، وبلاش أحسن أتوقع إنهم هيسامحوني دلوقتي.
طلبت منه يبلغهم إني مستعدة أتكلم في أي وقت.
مش عارفة أبدأ منين أو أعمل اية بعد كده.
أصحابي من الطفولة بيساعدوني أفهم شوية تفاصيل عن طفولتي (زي مثلاً إني كَسَرت مناخير جار عشان كنت فاكرة أنه بيغيظني، لكن هو في الواقع كان بيحاول يشاركني في اللعب)
كمان في ناس في العيلة بدأوا يتواصلوا معايا عشان يساعدوني برضه….
(القصة حقيقية)
#قصص
#قصة
